ദുബായ്: യുഎഇയിലെ യുവ ക്രിക്കറ്റ് താരങ്ങൾക്ക് ആഗോളതലത്തിൽ ശ്രദ്ധിക്കപ്പെടാനുള്ള സുവർണ്ണാവസരമൊരുക്കി റോബിൻസ് സ്പോർട്സ് റിലേഷൻസ് സ്കോളർഷിപ്പ് വിതരണം പൂർത്തിയായി. വിവിധ എമിറേറ്റുകളിൽ നിന്നുള്ള 125-ഓളം അപേക്ഷകരിൽ നിന്ന് കഠിനമായ തിരഞ്ഞെടുപ്പ് പ്രക്രിയയിലൂടെയാണ് 16 പ്രതിഭകളെ കണ്ടെത്തിയത്. ഷാർജ ഡൽഹി പ്രൈവറ്റ് സ്കൂളിലെ ലോകേഷ് റെഡ്ഡി ഒന്നാം സ്ഥാനവും ദുബായ് ജെംസ് മോഡേൺ അക്കാദമിയിലെ അദ്വൈ ഘോഷ് രണ്ടാം സ്ഥാനവും കരസ്ഥമാക്കി. ഒന്നാം സ്ഥാനത്തെത്തിയ വിദ്യാർത്ഥിയുടെ മുഴുവൻ പരിശീലന ചെലവും സ്ഥാപനം ഏറ്റെടുക്കുമ്പോൾ, രണ്ടാം സ്ഥാനക്കാരന് ഭാഗികമായ ഇളവുകൾ ലഭിക്കും.
തിരഞ്ഞെടുക്കപ്പെട്ട 16 വിദ്യാർത്ഥികൾക്കും ഒരു വർഷത്തെ സമഗ്രമായ പരിശീലനമാണ് സ്കോളർഷിപ്പിലൂടെ ഉറപ്പാക്കുന്നത്. പ്രൊഫഷണൽ കോച്ചിംഗ്, ക്രിക്കറ്റ് കിറ്റ്, വസ്ത്രങ്ങൾ എന്നിവയ്ക്ക് പുറമെ രാജ്യാന്തര തലത്തിലുള്ള പരിശീലന ടൂറുകളും ഇതിന്റെ ഭാഗമാണ്. റോബിൻ സിങ്ങിനെ കൂടാതെ മുൻ വെസ്റ്റ് ഇൻഡീസ് താരം ശിവ്നരൈൻ ചന്ദർപോൾ, ദിബേഷ് മെഹന്ദി, ടി. കുമാരൻ തുടങ്ങിയ ഇതിഹാസ താരങ്ങൾ നേരിട്ടാണ് കുട്ടികൾക്ക് പരിശീലനം നൽകുന്നത്. സാങ്കേതിക മികവിനൊപ്പം മാനസിക കരുത്തും വ്യക്തിത്വ വികസനവും ലക്ഷ്യമിട്ടുള്ള വിപുലമായ പാഠ്യപദ്ധതിയാണ് അക്കാദമി തയ്യാറാക്കിയിരിക്കുന്നത്.
യുഎഇ ദേശീയ ടീമിന്റെ ക്രിക്കറ്റ് ഡയറക്ടറായിരുന്ന തന്റെ അനുഭവങ്ങൾ പദ്ധതിക്ക് പിന്നിലുണ്ടെന്ന് റോബിൻ സിങ് വ്യക്തമാക്കി. നിലവിലെ പരിശീലന രീതികളിലെ വിടവ് നികത്താനും കുട്ടികൾക്ക് ഇംഗ്ലീഷ് കൗണ്ടി ടീമുകളോടൊപ്പം പരിശീലിക്കാനും ആഗോള ടി20 ഫ്രാഞ്ചൈസി സ്കൗട്ടുകൾക്ക് മുന്നിൽ തങ്ങളുടെ കഴിവ് തെളിയിക്കാനും ഈ പദ്ധതി വഴി തുറക്കുമെന്ന് അദ്ദേഹം പറഞ്ഞു. നിലവിൽ ദുബായിൽ ആരംഭിച്ച ഈ ക്രിക്കറ്റ്-ഫിറ്റ്നസ് അക്കാദമികൾ വരും വർഷങ്ങളിൽ രാജ്യത്തുടനീളം വ്യാപിപ്പിക്കാനാണ് അധികൃതർ ലക്ഷ്യമിടുന്നത്.
അടുത്ത അധ്യയന വർഷത്തേക്കുള്ള സ്കോളർഷിപ്പ് രജിസ്ട്രേഷൻ ഇതിനോടകം ആരംഭിച്ചതായും താല്പര്യമുള്ള വിദ്യാർത്ഥികൾക്ക് അപേക്ഷിക്കാമെന്നും സംഘാടകർ അറിയിച്ചു. പ്രൊഫഷണൽ ക്രിക്കറ്റിന്റെ ലോകത്തേക്ക് ചുവടുവെക്കാൻ ആഗ്രഹിക്കുന്ന യുഎഇയിലെ മലയാളി വിദ്യാർത്ഥികൾ ഉൾപ്പെടെയുള്ളവർക്ക് വലിയൊരു ഉത്തേജനമാകും ഈ സ്കോളർഷിപ്പ്. കായികരംഗത്തെ ഇത്തരം വലിയ നിക്ഷേപങ്ങൾ വരുംകാലങ്ങളിൽ യുഎഇയിൽ നിന്ന് ലോകോത്തര ക്രിക്കറ്റ് താരങ്ങൾ ഉയർന്നു വരാൻ കാരണമാകുമെന്നതിൽ സംശയമില്ല.
