ടെഹ്റാൻ: ദക്ഷിണ ഇറാനിലെ രണ്ട് സൈനിക കേന്ദ്രങ്ങൾക്ക് നേരെ വ്യോമാക്രമണം ഉണ്ടായതായി ഇറാൻ ഔദ്യോഗിക മാധ്യമങ്ങൾ റിപ്പോർട്ട് ചെയ്തു. എന്നാൽ ഇത്തരമൊരു ആക്രമണത്തിൽ തങ്ങൾക്ക് പങ്കില്ലെന്ന് അമേരിക്ക വ്യക്തമാക്കിയതോടെ സംഭവത്തിൽ നിഗൂഢതയേറുകയാണ്.
ഇറാന്റെ ഔദ്യോഗിക വാർത്താ ഏജൻസിയായ ‘ഇർന’ (IRNA) പുറത്തുവിട്ട വിവരങ്ങൾ പ്രകാരം ബുഷെഹർ (Bushehr) പ്രവിശ്യയിലെ ഒരു സൈനിക താവളത്തിന് നേരെയാണ് ആദ്യ ആക്രമണമുണ്ടായത്. ഇത് അമേരിക്കയുടെയും ഇസ്രായേലിന്റെയും സംയുക്ത ആക്രമണമാണെന്ന് ബുഷെഹർ സെക്യൂരിറ്റി ഡെപ്യൂട്ടി ഗവർണർ ഇഹ്സാൻ ജഹാനിയൻ ആരോപിച്ചു. ഇറാന്റെ ഏക ആണവനിലയം സ്ഥിതി ചെയ്യുന്ന പ്രവിശ്യയാണിത്. എന്നാൽ ആണവനിലയത്തിന് കേടുപാടുകൾ സംഭവിച്ചിട്ടില്ലെന്നാണ് സൂചന.
ഇതിനുപുറമെ ഒമാൻ ഉൾക്കടലിന്റെ തീരത്തുള്ള തന്ത്രപ്രധാന തുറമുഖ നഗരമായ കൊനാരകിലെ (Konarak) നാവികസേനാ കേന്ദ്രത്തിന് നേരെയും രണ്ട് തവണ യുദ്ധവിമാനങ്ങൾ ആക്രമണം നടത്തിയതായി ഇറാന്റെ സ്റ്റേറ്റ് ബ്രോഡ്കാസ്റ്ററായ IRIB റിപ്പോർട്ട് ചെയ്തു.
എന്നാൽ ഈ സമയത്ത് ഇറാനിൽ തങ്ങൾ യാതൊരുവിധ സൈനിക നീക്കങ്ങളും നടത്തിയിട്ടില്ലെന്ന് യുഎസ് ഉദ്യോഗസ്ഥർ സിഎൻഎന്നിനോട് (CNN) പ്രതികരിച്ചു. ആക്രമണത്തെക്കുറിച്ച് തങ്ങൾക്ക് അറിവില്ലെന്ന് ഇസ്രായേലും വ്യക്തമാക്കിയിട്ടുണ്ട്. മേഖലയിൽ ഇരുവിഭാഗങ്ങളും തമ്മിൽ മുൻപ് മിസൈൽ ആക്രമണങ്ങൾ നടന്നിട്ടുള്ളതിനാൽ നിലവിലെ റിപ്പോർട്ടുകൾ വലിയ ആശങ്കയ്ക്ക് കാരണമായിട്ടുണ്ട്.
