ദുബായ്: ആളുകളുടെ പെരുമാറ്റ ശാസ്ത്രവും ഡിസൈൻ തിങ്കിംഗും അടിസ്ഥാനമാക്കി സർക്കാർ നയങ്ങളും സേവനങ്ങളും മെച്ചപ്പെടുത്തുന്നതിനായി രൂപകൽപ്പന ചെയ്ത “നഡ്ജഥോൺ” പരിപാടിയുടെ ആദ്യ ബാച്ചിന്റെ പാസ്സിംഗ് ഔട്ട് ചടങ്ങ് ദുബായിൽ സംഘടിപ്പിച്ചു.ജിഡിആർഎഫ്എ ദുബായിയും മുഹമ്മദ് ബിൻ റാഷിദ് സ്കൂൾ ഓഫ് ഗവൺമെനന്റും (എംബിആർഎസ്ജി)യും സഹകരിച്ചാണ് പരിപാടി സംഘടിപ്പിച്ചത്. ജനറൽ ഡയറക്ടറേറ്റിലെ ജീവനക്കാരുടെ ആദ്യ ബാച്ചാണ് പുറത്തിറങ്ങിയത്
ചടങ്ങിൽ ജിഡിആർഎഫ്എ ദുബായ് മേധാവി ലഫ്റ്റനന്റ് ജനറൽ മുഹമ്മദ് അഹ്മദ് അൽ മർറിയും, എംബിആർഎസ്ജിയിലെ കോർപ്പറേറ്റ് സപ്പോോർട്ട് സർവീസ് സീനിയർ ഡയറക്ടർ മുഹമ്മദ് അൽ ഖത്തീബ്,ഇരുസ്ഥാപനങ്ങളിലെയും മുതിർന്ന ഉദ്യോഗസ്ഥരും ജീവനക്കാരും ചടങ്ങിൽ സംബന്ധിച്ചു.
പരിപാടിയുടെ ഭാഗമായി നടന്ന 100 ദിവസത്തെ ചലഞ്ചിൽ 51 പേർ പങ്കെടുത്തു. പെരുമാറ്റ ശാസ്ത്രത്തെ ആധാരമാക്കി 10 ഗുണാത്മക പദ്ധതികൾ പഠിതാക്കൾ വികസിപ്പിച്ചു. സർക്കാർ പ്രവർത്തന രംഗത്തെ യാഥാർത്ഥ്യ വെല്ലുവിളികൾക്ക് നവീനവും പ്രായോഗികവുമായ പരിഹാരങ്ങൾ നിർദേശിക്കുന്ന പദ്ധതികളായിരുന്നു ഇവ.ചടങ്ങിനോടനുബന്ധിച്ച് വിവിധ പ്രോജക്റ്റുകളുടെ പ്രദർശനവും നടന്നു. പങ്കെടുത്തവർ വികസിപ്പിച്ച പരിഹാര മാതൃകകൾ, പ്രയോഗിച്ച രീതികൾ, ഉപഭോക്തൃ അനുഭവത്തിൽ ഉണ്ടാക്കുന്ന പ്രതീക്ഷിത സ്വാധീനം എന്നിവ വിശദമായി അവതരിപ്പിച്ചു. മികച്ച പ്രകടനം കാഴ്ചവെച്ച ടീമുകളെ ആദരിക്കുകയും അംഗീകാരപത്രങ്ങൾ വിതരണം ചെയ്യുകയും ചെയ്തു.
“നഡ്ജഥോൺ” പരിപാടി മനുഷ്യരുടെ പെരുമാറ്റം മനസ്സിലാക്കി സേവനങ്ങൾ രൂപകൽപ്പന ചെയ്യുന്നതിനുള്ള ജിഡിആർഎഫ്എ ദുബായുടെ ലക്ഷ്യത്തെ പ്രതിഫലിപ്പിക്കുന്നതാണെന്ന് അധികൃതർ വ്യക്തമാക്കി. സഹാനുഭൂതി, നവീകരണം, കൂട്ടായ്മ എന്നിവയെ അടിസ്ഥാനമാക്കി കൂടുതൽ ഫ്ലെക്സിബിളും പ്രോആക്ടീവുമായ സർക്കാർ സംവിധാനമാണ് ലക്ഷ്യമെന്ന് അധികൃതർ പറഞ്ഞു. ഇത് ഉപഭോക്തൃ അനുഭവം മെച്ചപ്പെടുത്തുന്നതിനൊപ്പം സമൂഹത്തിന്റെ സുരക്ഷയും ക്ഷേമവും ശക്തിപ്പെടുത്തുമെന്നും വ്യക്തമാക്കി.
ദുബായ് നഡ്ജഥോൺ ഒരു പരിശീലന പരിപാടി മാത്രമായിരുന്നില്ല; ജനങ്ങളുടെ ദൈനംദിന ജീവിതത്തെ കൂടുതൽ സ്വാധീനിക്കുന്ന രീതിയിൽ സർക്കാർ സേവനങ്ങൾ രൂപകൽപ്പന ചെയ്യാനുള്ള പ്രായോഗിക അനുഭവമായിരുന്നുവെന്ന് ലഫ്: ജനറൽ മുഹമ്മദ് അൽ മർറി അഭിപ്രായപ്പെട്ടു. യഥാർത്ഥ നവീകരണം മനുഷ്യരുടെ പെരുമാറ്റം മനസ്സിലാക്കുന്നതിൽ നിന്നാണ് ആരംഭിക്കുന്നത്. ദേശീയ പ്രതിഭകളിൽ നിക്ഷേപം നടത്തുന്നതിലൂടെ കൂടുതൽ ബുദ്ധിമാനായ സേവനങ്ങളും കൃത്യമായ നയങ്ങളും മെച്ചപ്പെട്ട ജീവിത നിലവാരവും ഉറപ്പാക്കാമെന്നും അദ്ദേഹം കൂട്ടിച്ചേർത്തു
“നഡ്ജഥോൺ ദുബായ് റെസിഡൻസി” സർക്കാർ പ്രവർത്തനങ്ങളിൽ അടിസ്ഥാനപരമായ മാറ്റം സൃഷ്ടിക്കുന്ന പദ്ധതിയാണെന്ന് എംബിആർഎസ്ജി പ്രതിനിധി മുഹമ്മദ് അൽ ഖത്തീബ് പറഞ്ഞു. പെരുമാറ്റ ശാസ്ത്രം ഉപയോഗിച്ച് നയരൂപകൽപ്പനയും സേവന വിതരണവും മെച്ചപ്പെടുത്തുക എന്നതാണ് പ്രധാന ലക്ഷ്യമെന്ന് അദ്ദേഹം വ്യക്തമാക്കി.ജിഡിആർഎഫ്എ ദുബായും എംബിആർഎസ്ജിയും തമ്മിലുള്ള സഹകരണം അക്കാദമിക അറിവും സർക്കാർ പ്രയോഗവും ഏകോപിപ്പിക്കുന്ന വിജയകരമായ മാതൃകയാണെന്നും, നയരൂപീകരണത്തിലും നവീകരണത്തിലും മാറ്റത്തിന് നേതൃത്വം നൽകുന്ന ദേശീയ പ്രതിഭകളെ വളർത്തുന്നതിൽ ഇത് സഹായകരമാണെന്നും അദ്ദേഹം അഭിപ്രായപ്പെട്ടു.
