ഇൻഡിഗോ കൊച്ചി–ദുബായ് സർവീസ് പുനരാരംഭിച്ചു; മറ്റ് ഇന്ത്യൻ വിമാനക്കമ്പനികൾ കാത്തിരിക്കുകയാണ്

ദുബായ്/കൊച്ചി, മാർച്ച് 19:
ഇടവേളയ്ക്ക് ശേഷം ദുബായിലേക്കുള്ള വിമാന സർവീസുകൾ ഇൻഡിഗോ പുനരാരംഭിച്ചു. ഇന്ന് കൊച്ചിയിൽ നിന്ന് ദുബായിലേക്കുള്ള സർവീസ് നടത്തുമെന്ന് കമ്പനി അറിയിച്ചു.

ദുബായിലേക്കുള്ള വിമാന സർവീസുകൾ പുനരാരംഭിച്ചതായി അധികൃതർ അറിയിച്ചതിനെ തുടർന്നാണ് ഇൻഡിഗോ സർവീസ് ആരംഭിച്ചത്. ഈ റൂട്ടിൽ വീണ്ടും സർവീസ് തുടങ്ങുന്ന ആദ്യ ഇന്ത്യൻ വിമാനക്കമ്പനികളിലൊന്നാണ് ഇൻഡിഗോ.

അതേസമയം, എയർ ഇന്ത്യ, എയർ ഇന്ത്യ എക്സ്പ്രസ്, ആകാശ എയർ എന്നീ കമ്പനികൾ ഇതുവരെ ദുബായിലേക്കുള്ള സർവീസുകൾ പുനരാരംഭിച്ചിട്ടില്ല. സാഹചര്യവും സ്ലോട്ടുകളുടെ ലഭ്യതയും അനുസരിച്ചായിരിക്കും ഇവരുടെ സർവീസ് പുനരാരംഭം.

ഇതിനിടെ എമിറേറ്റ്സ്, ഇത്തിഹാദ്, ഫ്ലൈദുബായ്, എയർ അറേബ്യ എന്നീ യുഎഇ ആസ്ഥാനമായ വിമാനക്കമ്പനികൾ ദുബായ്, അബുദാബി, ഷാർജ, റാസൽഖൈമ തുടങ്ങിയ നഗരങ്ങളിലേക്ക് സർവീസുകൾ തുടരുന്നു.

എയർ ഇന്ത്യയും എയർ ഇന്ത്യ എക്സ്പ്രസും യുഎഇയിലേക്കും സൗദിയിലേക്കുമായി ചില പ്രത്യേക സർവീസുകൾ നടത്താൻ പദ്ധതിയിട്ടിട്ടുണ്ട്. കൊച്ചി, കോഴിക്കോട്, തിരുവനന്തപുരം എന്നിവിടങ്ങളിൽ നിന്ന് ഗൾഫ് മേഖലയിലേക്കുള്ള സർവീസുകൾ ഉണ്ടായിരിക്കുമെന്ന് അറിയിച്ചിട്ടുണ്ട്. എന്നാൽ ഇന്ന് ദുബായിലേക്കുള്ള സർവീസ് ഉൾപ്പെടുത്തിയിട്ടില്ല.

ആകാശ എയർ മുംബൈ–റിയാദ് സർവീസ് ഇന്ന് മുതൽ ആരംഭിക്കും. കൂടാതെ ജിദ്ദയിലേക്കുള്ള സർവീസുകളും വിവിധ ഇന്ത്യൻ നഗരങ്ങളിൽ നിന്ന് നടത്തും. അബുദാബി, ദോഹ, കുവൈത്ത് സർവീസുകൾ മാർച്ച് 21 വരെ നിർത്തിവച്ചിരിക്കുകയാണ്.

സർവീസ് തടസ്സപ്പെട്ടതിനെ തുടർന്ന് യാത്രക്കാർക്ക് ടിക്കറ്റ് മാറ്റുന്നതിനും റീഫണ്ട് ലഭിക്കുന്നതിനും വിമാനക്കമ്പനികൾ സൗകര്യം ഒരുക്കിയിട്ടുണ്ട്.

ഇന്ത്യ–ഗൾഫ് മേഖലകളിലേക്കുള്ള യാത്രകൾ അടുത്ത ദിവസങ്ങളിൽ സാധാരണ നിലയിലേക്കു മടങ്ങുമെന്ന പ്രതീക്ഷയിലാണ് വ്യോമയാന രംഗം.

English Summary:
IndiGo has resumed Dubai flights after a brief pause, with Kochi–Dubai services operating today. While Air India and Air India Express are yet to restart Dubai routes, major UAE carriers continue operations. Special flights to other Gulf destinations are ongoing.