ദുബൈ: ഗൾഫ് മേഖലയിലേക്കുള്ള വ്യോമപാതകൾ അടച്ചതോടെ ആശങ്കയിലായിരുന്ന പ്രവാസികൾക്ക് ആശ്വാസമായി യു.എ.ഇയിൽ നിന്ന് നിരവധി വിമാന കമ്പനികൾ പരിമിതമായ സർവിസുകൾ പ്രഖ്യാപിച്ചു. Emirates, flydubai, Etihad Airways, Air Arabia എന്നീ വിമാനക്കമ്പനികൾ അടിയന്തര സർവിസുകൾ ഭാഗികമായി ആരംഭിച്ചതിന് പിന്നാലെ ഇന്ത്യൻ എയർലൈനുകളായ Air India Express, IndiGo, SpiceJet എന്നിവയും പ്രത്യേക സർവിസുകൾ പ്രഖ്യാപിച്ചു.
മണിക്കൂറിൽ 48 വിമാനങ്ങൾക്ക് കടന്നുപോകാൻ കഴിയുന്ന രീതിയിൽ യു.എ.ഇ സുരക്ഷിതമായ വ്യോമ ഇടനാഴി തുറന്നതോടെയാണ് കൂടുതൽ വിമാന കമ്പനികൾക്ക് സർവിസുകൾ ആരംഭിക്കാൻ കഴിഞ്ഞത്.
എയർ ഇന്ത്യ എക്സ്പ്രസ് മാർച്ച് 5 മുതൽ 7 വരെ റാസൽഖൈമയിൽ നിന്ന് ഡൽഹി, കൊച്ചി, മുംബൈ എന്നിവിടങ്ങളിലേക്ക് പ്രത്യേക സർവിസുകൾ നടത്തുമെന്ന് അറിയിച്ചു. കൊച്ചിയിൽ നിന്ന് വൈകിട്ട് 4.25ന് പുറപ്പെടുന്ന വിമാനം രാത്രി 8.55ന് റാസൽഖൈമയിൽ എത്തും. തുടർന്ന് 9.55ന് പുറപ്പെടുന്ന വിമാനം പുലർച്ചെ 1.55ന് കൊച്ചിയിൽ എത്തുന്ന രീതിയിലാണ് സർവീസ് ക്രമീകരിച്ചിരിക്കുന്നത്. കൂടാതെ അൽഐനിൽ നിന്ന് കോഴിക്കോട് നഗരത്തിലേക്കും എയർ ഇന്ത്യ എക്സ്പ്രസ് സർവിസുകൾ നടത്തും.
അതേസമയം, സാധാരണ ഷെഡ്യൂൾ സർവിസുകൾ മാർച്ച് 9 വരെ നിർത്തിവെച്ചിട്ടുണ്ടെങ്കിലും ഇന്ത്യയിൽ നിന്ന് അബൂദബിയിലേക്ക് മാർച്ച് 6, 7 തീയതികളിൽ പ്രത്യേക സർവിസ് നടത്തുമെന്ന് എയർ അറേബ്യ അറിയിച്ചു. അഹമ്മദാബാദ്, കോഴിക്കോട്, കൊച്ചി, തിരുവനന്തപുരം, ചെന്നൈ എന്നീ നഗരങ്ങളിലേക്കാണ് സർവിസുകൾ.
യു.എ.ഇയിൽ കുടുങ്ങിയ ഇന്ത്യൻ യാത്രക്കാർക്കായി സ്പൈസ് ജെറ്റ് മാർച്ച് 4, 5 തീയതികളിൽ ഫുജൈറയിൽ നിന്ന് ഡൽഹി, മുംബൈ, കൊച്ചി എന്നിവിടങ്ങളിലേക്ക് പ്രത്യേക സർവിസുകൾ നടത്തുമെന്ന് പ്രഖ്യാപിച്ചു. ഇതിൽ രണ്ട് സർവിസുകൾ മുംബൈയിലേക്കായിരിക്കും.
മാർച്ച് 4 മുതൽ ആകെ 58 വിമാനങ്ങൾ സർവിസ് ആരംഭിക്കുമെന്ന് ഇന്ത്യൻ സിവിൽ ഏവിയേഷൻ അതോറിറ്റിയുടെ കണക്കുകൾ സൂചിപ്പിക്കുന്നു. ഇതിൽ ഇൻഡിഗോ 30 സർവിസുകളും എയർ ഇന്ത്യ എക്സ്പ്രസ് 23 സർവിസുകളും ഗൾഫ് രാജ്യങ്ങളിലേക്ക് നടത്തുമെന്നാണ് വിവരം.
അതേസമയം കേരളം ഉൾപ്പെടെയുള്ള റൂട്ടുകളിൽ ഉയർന്ന ടിക്കറ്റ് നിരക്കാണ് പ്രവാസികൾക്ക് വലിയ വെല്ലുവിളിയായി മാറുന്നത്. ഫ്ലൈ ദുബൈ കൊച്ചി, കോഴിക്കോട്, മുംബൈ, ഹൈദരാബാദ് നഗരങ്ങളിലേക്ക് 2850 ദിർഹം (ഏകദേശം 71,400 രൂപ) വരെ ടിക്കറ്റ് നിരക്ക് ഈടാക്കുന്നുണ്ട്. ഡൽഹി, ലഖ്നൗ, കൊൽക്കത്ത, അഹമ്മദാബാദ് നഗരങ്ങളിലേക്ക് 2800 ദിർഹം (ഏകദേശം 70,200 രൂപ) വരെ നിരക്കുണ്ട്.
അതേസമയം അൽഐൻ-കോഴിക്കോട് റൂട്ടിൽ എയർ ഇന്ത്യ എക്സ്പ്രസ് 300 ദിർഹം (ഏകദേശം 7,000 രൂപ) മുതൽ ടിക്കറ്റ് നിരക്ക് ലഭ്യമാണെന്നും റിപ്പോർട്ടുകൾ പറയുന്നു. എന്നാൽ പരിമിതമായ സർവിസുകളായതിനാൽ ടിക്കറ്റുകൾ വേഗത്തിൽ വിറ്റുപോകുന്ന സാഹചര്യമാണുള്ളത്. യാത്രാ സമയങ്ങളിൽ മാറ്റം വരുന്നതിനാൽ ടിക്കറ്റുകൾ റദ്ദാകാനുള്ള സാധ്യതയും കൂടുതലാണെന്ന് ട്രാവൽ ഏജൻസികൾ വ്യക്തമാക്കുന്നു.
Airlines including Emirates, flydubai, Air India Express, IndiGo, and SpiceJet have started limited flight services from the UAE, providing relief to expatriates affected by airspace restrictions in the Gulf region.
