അബുദാബി: ആഗോള ഊർജമേഖലയുടെ ഭാവി നിർണയിക്കുന്ന നിക്ഷേപ തീരുമാനങ്ങളിൽ ജലസുരക്ഷയ്ക്ക് കൂടുതൽ പ്രാധാന്യം നൽകണമെന്ന് യുഎഇ. ജലലഭ്യതയും ഊർജസുരക്ഷയും പരസ്പരം ബന്ധപ്പെട്ടിരിക്കുന്നതിനാൽ ഇരു മേഖലകളെയും സംയോജിപ്പിച്ചുള്ള ആസൂത്രണവും നിക്ഷേപവും അനിവാര്യമാണെന്ന് യുഎഇ വിദേശകാര്യ മന്ത്രാലയത്തിലെ ഊർജ, സുസ്ഥിരത വിഭാഗം അസിസ്റ്റന്റ് മന്ത്രി ഹിസ് എക്സലൻസി അബ്ദുല്ല ബലാല അഭിപ്രായപ്പെട്ടു.
വ്യവസായങ്ങളുടെ വൈദ്യുതീകരണം, പുനരുപയോഗ ഊർജത്തിന്റെ വികസനം, നിർണായക ധാതുക്കളുടെ ഉൽപ്പാദനം, ആർട്ടിഫിഷ്യൽ ഇന്റലിജൻസ് സംവിധാനങ്ങൾക്കായുള്ള ഡാറ്റാ സെന്ററുകളുടെ നിർമാണം തുടങ്ങിയവയെല്ലാം വലിയ തോതിൽ ജലം ആവശ്യപ്പെടുന്ന മേഖലകളാണ്. എന്നാൽ ഊർജമേഖലയിലെ നിക്ഷേപ തീരുമാനങ്ങളിൽ ജലത്തിന്റെ ആവശ്യകതയും ലഭ്യതയുമായി ബന്ധപ്പെട്ട അപകടസാധ്യതകളും വേണ്ടത്ര പരിഗണിക്കപ്പെടുന്നില്ലെന്ന് അദ്ദേഹം ചൂണ്ടിക്കാട്ടി.
2025-ൽ ആഗോള ഡാറ്റാ സെന്ററുകളുടെ ജല ഉപഭോഗം 4.5 ട്രില്യൺ ലിറ്ററായിരുന്നുവെങ്കിൽ 2030-ഓടെ ഇത് 9.32 ട്രില്യൺ ലിറ്ററായി ഉയരുമെന്നാണ് പുതിയ റിപ്പോർട്ട് പ്രവചിക്കുന്നത്. എഐ സാങ്കേതികവിദ്യയുടെ വളർച്ചയും ഡിജിറ്റൽ അടിസ്ഥാന സൗകര്യങ്ങളുടെ വികസനവും ജലത്തിന്റെ ആവശ്യകത വർധിപ്പിക്കുമെന്നും അദ്ദേഹം വ്യക്തമാക്കി.
യുഎഇ ജലസുരക്ഷയ്ക്ക് തന്ത്രപ്രധാനമായ മുൻഗണന നൽകുന്ന രാജ്യങ്ങളിലൊന്നാണ്. 2036-ഓടെ ജല ഉപഭോഗം 21 ശതമാനം കുറയ്ക്കുകയും ശുദ്ധീകരിച്ച മലിനജലത്തിന്റെ 95 ശതമാനം പുനരുപയോഗിക്കുകയും ചെയ്യുക എന്നതാണ് യുഎഇ വാട്ടർ സെക്യൂരിറ്റി സ്ട്രാറ്റജിയുടെ ലക്ഷ്യം. ഏകദേശം 70 കടൽജല ശുദ്ധീകരണ പ്ലാന്റുകളുടെ ശൃംഖലയും രാജ്യത്തിന്റെ ജലസുരക്ഷയിൽ നിർണായക പങ്കുവഹിക്കുന്നു.
പുനരുപയോഗ ഊർജം ഉപയോഗിച്ചുള്ള കടൽജല ശുദ്ധീകരണം, മലിനജല പുനരുപയോഗം, ജലക്ഷമതയുള്ള വ്യാവസായിക സംവിധാനങ്ങൾ, എഐ അധിഷ്ഠിത നിരീക്ഷണ സാങ്കേതികവിദ്യകൾ എന്നിവയിലൂടെ ജല-ഊർജ മേഖലകളിലെ സമ്മർദം കുറയ്ക്കാൻ കഴിയുമെന്നും അദ്ദേഹം പറഞ്ഞു.
ജലലഭ്യതയും കാലാവസ്ഥാ വ്യതിയാനത്തിന്റെ പ്രത്യാഘാതങ്ങളും ഊർജപദ്ധതികളുടെ ആദ്യഘട്ടത്തിൽ തന്നെ വിലയിരുത്തണം. നിക്ഷേപകരും ധനകാര്യ സ്ഥാപനങ്ങളും ജലവുമായി ബന്ധപ്പെട്ട അപകടസാധ്യതകൾ കണക്കിലെടുത്ത് പദ്ധതികൾക്ക് ധനസഹായം നൽകണമെന്നും അദ്ദേഹം ആവശ്യപ്പെട്ടു.
അതേസമയം, ജലസുരക്ഷയും സുസ്ഥിര വികസനവും സംബന്ധിച്ച ആഗോള ചർച്ചകൾക്ക് വേദിയാകുന്ന 2026-ലെ യുഎൻ വാട്ടർ കോൺഫറൻസിന് ഡിസംബർ 8 മുതൽ 10 വരെ അബുദാബി ആതിഥേയത്വം വഹിക്കും. യുഎഇയും സെനഗലും സംയുക്തമായാണ് സമ്മേളനം സംഘടിപ്പിക്കുന്നത്. ആഗോളതലത്തിൽ ജലസുരക്ഷ ഉറപ്പാക്കുന്നതിനും സുസ്ഥിര വികസന ലക്ഷ്യം ആറിന്റെ പുരോഗതി വേഗത്തിലാക്കുന്നതിനും നിക്ഷേപവും അന്താരാഷ്ട്ര സഹകരണവും ശക്തിപ്പെടുത്തുകയാണ് സമ്മേളനത്തിന്റെ ലക്ഷ്യം.
ഊർജമേഖലയിലെ ഓരോ തീരുമാനവും ജലസുരക്ഷയെയും സ്വാധീനിക്കുന്നതാണെന്നും ഭാവിയിലെ അടിസ്ഥാന സൗകര്യ വികസനത്തിലും നിക്ഷേപങ്ങളിലും ജലത്തെ നിർണായക ഘടകമായി പരിഗണിക്കണമെന്നും അബ്ദുല്ല ബലാല ലേഖനത്തിൽ വ്യക്തമാക്കി.
