ദുബായ്: നഗരത്തിന്റെ ഉയരങ്ങളിലേക്കുള്ള ഓരോ ചുവടിലും തങ്ങളുടെ അധ്വാനത്തിന്റെ ചുവപ്പുരേഖ പതിപ്പിച്ചിരിക്കുന്ന ആയിരക്കണക്കിന് സാധാരണ തൊഴിലാളികൾക്ക്, ഈ വർഷത്തെ അന്താരാഷ്ട്ര തൊഴിലാളി ദിനം ഒരു ആഘോഷമാത്രമായിരുന്നില്ല, ഹൃദയത്തെ തൊടുന്ന ഒരു അനുഭവമായിരുന്നു. ഉന്നതരായ ഉദ്യോഗസ്ഥർ, ഈ ദിവസം അവരുടെ സ്വന്തം താമസസ്ഥലങ്ങളിലേക്കെത്തി നന്ദിയും സ്നേഹവും പങ്കുവെച്ചപ്പോൾ, അത് പലർക്കും പ്രവാസ ജീവിതത്തിലെ മറക്കാനാവാത്ത നിമിഷങ്ങളായി മാറി.
ദുബായ് ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ്, എമിറേറ്റിൽ സംഘടിപ്പിച്ച ഈ വർഷത്തെ തൊഴിലാളി ദിനാഘോഷം, ഔപചാരികതയുടെ ചട്ടക്കൂടുകൾ തകർത്ത് മനുഷ്യബന്ധങ്ങളുടെ ചൂട് പകരുന്ന ഒരു വലിയ സംഗമായി മാറി. അൽ ഖൂസിലും ജബൽ അലിയിലുമായി വ്യാപിച്ചുകിടക്കുന്ന 34 ലേബർ ക്യാമ്പുകളിലേക്ക് ഉദ്യോഗസ്ഥർ നേരിട്ട് എത്തി തൊഴിലാളികളുമായി സംവദിച്ചു. അവരുടെ ജീവിതവും പരിശ്രമവും കുറിച്ച് ചോദിച്ചറിയുകയും, ഓരോരുത്തരെയും വ്യക്തിപരമായി ആദരിക്കുകയും ചെയ്തപ്പോൾ, “ഞങ്ങൾ കാണപ്പെടുന്നു” – എന്ന ആത്മവിശ്വാസം തൊഴിലാളികളുടെ മുഖങ്ങളിൽ തെളിഞ്ഞു.
36,000-ത്തിലധികം തൊഴിലാളികൾ നേരിട്ട് പങ്കെടുത്ത ഈ സന്ദർശനം, ദുബായുടെ വികസന കഥയിൽ തൊഴിലാളികളുടെ പങ്ക് എത്രത്തോളം വിലമതിക്കപ്പെടുന്നതാണെന്ന് വീണ്ടും ഓർമ്മിപ്പിച്ചു. അതേസമയം, സാങ്കേതികവിദ്യയുടെ കരുത്തും ഈ ആഘോഷത്തെ കൂടുതൽ വിപുലമാക്കി. ‘Blue Connect’ ആപ്പിലൂടെ തത്സമയം സംപ്രേക്ഷണം ചെയ്ത പരിപാടിയിൽ, ക്യാമ്പുകൾക്കപ്പുറം ആയിരക്കണക്കിന് തൊഴിലാളികളും ഓൺലൈനായി പങ്കുചേർന്നു. ആകെ 41,272 പേർ പങ്കെടുത്ത ഈ മഹാസംഗമം, തൊഴിലാളികളുമായി ബന്ധപ്പെടുന്നതിൽ ഒരു പുതിയ മാതൃകയായി മാറി.
എന്നാൽ, ഈ ആഘോഷത്തിന്റെ ഏറ്റവും ഹൃദയസ്പർശിയായ നിമിഷങ്ങൾ മറ്റൊന്നായിരുന്നു. തൊഴിലാളികൾ അറിയാതെയാണ് അവരുടെ നാട്ടിലുള്ള കുടുംബാംഗങ്ങൾ അയച്ച സ്നേഹസന്ദേശങ്ങൾ വലിയ സ്ക്രീനുകളിൽ തെളിഞ്ഞത്. ആ ശബ്ദങ്ങളും മുഖങ്ങളും കണ്ടപ്പോൾ പലർക്കും കണ്ണീരടക്കാനായില്ല. ദൂരെ നിൽക്കുന്ന പ്രിയപ്പെട്ടവർ പോലും ഈ ആഘോഷത്തിന്റെ ഭാഗമാണെന്ന ബോധ്യം, ഓരോ ഹൃദയത്തെയും നിശ്ശബ്ദമായി തൊട്ടുപോയി.
ക്യാമ്പുകളിലെ ആഘോഷങ്ങൾക്കൊപ്പം കായിക മത്സരങ്ങളും വിനോദ പരിപാടികളും സംഘടിപ്പിച്ചു. ടെലികോം കമ്പനിയായ ഡു ഉൾപ്പെടെ വിവിധ സ്ഥാപനങ്ങളുടെ സഹകരണത്തോടെ നൂറിലധികം സമ്മാനങ്ങളും സ്മാർട്ട്ഫോണുകളും വിതരണം ചെയ്തു. വിജയികൾക്കുള്ള ആഹ്ലാദം മാത്രമല്ല, പങ്കെടുത്ത ഓരോരുത്തരുടെയും മുഖത്തെ പുഞ്ചിരിയും ആഘോഷത്തിന്റെ വിജയമാക്കി.
മനുഷ്യരെ മുൻനിർത്തിയുള്ള ദുബായുടെ കാഴ്ചപ്പാടാണ് ഈ പരിപാടി. സാധാരണക്കാരായ തൊഴിലാളികളുടെ ജീവിത നിലവാരം മെച്ചപ്പെടുത്തുകയാണ് ഇത്തരം പരിപാടികളിലൂടെ ലക്ഷ്യമൊന്നും ജി ഡി ആർ എഫ് എ-ദുബായ് അസിസ്റ്റന്റ് ഡയറക്ടർ മേജർ ജനറൽ ഉബൈദ് മുഹൈർ ബിൻ സുറൂർ പറഞ്ഞു.തൊഴിലാളികളുമായി നേരിട്ടും ഡിജിറ്റലായും ബന്ധപ്പെടുന്ന ഈ മാതൃക, കൂടുതൽ ആളുകളിലേക്കു സന്ദേശങ്ങൾ എത്തിക്കാൻ സഹായിക്കുന്നുവെന്നും തൊഴിലാളികളെ ആദരിക്കുകയും പങ്കാളികളാക്കുകയും ചെയ്യുന്നത് അവരുടെ ആത്മവിശ്വാസവും അനുഭവവും ഉയർത്തുന്നുവെന്ന് ലേബർ റിലേഷൻസ് റെഗുലേഷൻ വിഭാഗം അസിസ്റ്റന്റ് ഡയറക്ടർ ജനറൽ കേണൽ ഒമർ മതർ അൽ മുസൈന അഭിപ്രായപ്പെട്ടു.
