അബുദാബി: സമുദ്രനിരപ്പിലൂടെ അതിവേഗം പറന്നു നീങ്ങുന്ന വിപ്ലവകരമായ ഇലക്ട്രിക് സീ ഗ്ലൈഡറുകൾ (Sea Glider) അവതരിപ്പിക്കാനൊരുങ്ങി അബുദാബി. ഗതാഗത രംഗത്ത് വൻ കുതിച്ചുചാട്ടം ലക്ഷ്യമിട്ട് അബുദാബി സാംസ്കാരിക-ടൂറിസം ഡിപ്പാർട്ട്മെന്റും (DCT Abu Dhabi) പ്രമുഖ സാങ്കേതിക വിദ്യ കമ്പനിയായ വെർസ അഡ്വാൻസ്ഡ് മാരിടൈം സർവീസസും ഇതുസംബന്ധിച്ച കരാറിൽ ഒപ്പുവെച്ചു. കടലിന് തൊട്ടുമുകളിലൂടെ വിമാനത്തിന് സമാനമായി പറക്കുന്ന ഈ നൂതന സംവിധാനം അബുദാബിയിലെ തീരദേശ യാത്രാ സൗകര്യങ്ങളെ അടിമുടി മാറ്റുമെന്നാണ് കരുതപ്പെടുന്നത്. എമിറേറ്റിലെ വിവിധ പ്രദേശങ്ങൾ തമ്മിലുള്ള കണക്ടിവിറ്റി വർദ്ധിപ്പിക്കുന്നതിനൊപ്പം പരിസ്ഥിതി സൗഹൃദമായ ഒരു യാത്രാസംസ്കാരം വളർത്തിയെടുക്കുക കൂടിയാണ് ഈ പദ്ധതിയൂടെ ലക്ഷ്യം.
അബുദാബി സിറ്റിക്കും അൽ ദഫ്ര മേഖലയ്ക്കും ഇടയിലായിരിക്കും ഈ അതിവേഗ യാത്രാ സംവിധാനം ആദ്യമായി പരീക്ഷണാടിസ്ഥാനത്തിൽ ആരംഭിക്കുന്നത്. കടൽനിരപ്പിൽ നിന്നും നാല് മീറ്റർ മുതൽ 150 മീറ്റർ വരെ ഉയരത്തിലായിരിക്കും ഈ ഇലക്ട്രിക് ഗ്ലൈഡറുകൾ സഞ്ചരിക്കുകയെന്ന് അധികൃതർ വ്യക്തമാക്കി. പൂർണ്ണമായും വൈദ്യുതിയിൽ പ്രവർത്തിക്കുന്നതിനാൽ മലിനീകരണം തീരെയില്ല എന്നതും ഇതിന്റെ പ്രത്യേകതയാണ്. ആദ്യഘട്ടത്തിൽ അഞ്ചോ ആറോ പേർക്ക് സഞ്ചരിക്കാവുന്ന ചെറു ഗ്ലൈഡറുകളായിരിക്കും സർവീസ് നടത്തുക.
അബുദാബി ഇൻവെസ്റ്റ്മെന്റ് ഓഫീസ് (ADIO), അബുദാബി മൊബിലിറ്റി എന്നിവയുമായി ചേർന്നാണ് ഈ പദ്ധതി നടപ്പിലാക്കുന്നത്. 2022 മുതൽ ഇലക്ട്രിക് സീ ഗ്ലൈഡറുകളുടെ വികസന രംഗത്ത് പ്രവർത്തിക്കുന്ന വെർസ കമ്പനിയാണ് ഇതിന്റെ പാരിസ്ഥിതികവും വാണിജ്യപരവുമായ സാധ്യതകൾ പഠിക്കുന്നത്. പദ്ധതി വിജയകരമാകുന്നതോടെ 2028-ൽ സീ ഗ്ലൈഡറുകൾ വാണിജ്യാടിസ്ഥാനത്തിൽ എമിറേറ്റിലുടനീളം സർവീസ് ആരംഭിക്കാനാണ് ലക്ഷ്യമിടുന്നത്. ഇത് ടൂറിസം മേഖലയ്ക്കും വലിയ രീതിയിൽ ഗുണകരമാകും.
ഭാവിയുടെ ഗതാഗത സംവിധാനങ്ങൾ എപ്രകാരമായിരിക്കുമെന്ന് ലോകത്തിന് കാണിച്ചുകൊടുക്കുന്ന ഒന്നായി അബുദാബിയുടെ ഈ സീ ഗ്ലൈഡർ പദ്ധതി മാറും. പുകയും ശബ്ദമലിനീകരണവുമില്ലാതെ തിരമാലകൾക്ക് മുകളിലൂടെയുള്ള ഈ യാത്ര പ്രവാസികൾക്കും വിനോദസഞ്ചാരികൾക്കും ഒരുപോലെ നവ്യാനുഭവമായിരിക്കും. അത്യാധുനിക സാങ്കേതികവിദ്യയുടെ കരുത്തിൽ അബുദാബി ഒരുങ്ങുന്ന ഈ ‘പറക്കുന്ന നൗക’കൾക്കായി കാത്തിരിക്കുകയാണ് ഗതാഗത ലോകം. ഈ മാറ്റത്തെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുകയും ഇത്തരം നൂതന പദ്ധതികളെക്കുറിച്ച് മറ്റുള്ളവരിലേക്ക് എത്തിക്കുകയും ചെയ്യുക.
