അബൂദബി: പരിസ്ഥിതി സംരക്ഷണത്തിലും പ്രകൃതിവിഭവങ്ങളുടെ സുസ്ഥിര പരിപാലനത്തിലും ശ്രദ്ധേയ നേട്ടങ്ങൾ കൈവരിച്ച് അബൂദബി എമിറേറ്റ്. ദേശീയ മാനദണ്ഡങ്ങൾക്കനുസൃതമായി അന്തരീക്ഷ വായുവിന്റെ ഗുണനിലവാരം 98 ശതമാനത്തിലെത്തിച്ചതായി അധികൃതർ അറിയിച്ചു. സമുദ്ര പരിസ്ഥിതിയിലെ സൂക്ഷ്മജീവികളുടെ ജലഗുണനിലവാര സൂചികയും സുസ്ഥിര മത്സ്യബന്ധന സൂചികയും 100 ശതമാനം നിലവാരത്തിൽ തുടരുന്നതും എമിറേറ്റിന്റെ പരിസ്ഥിതി രംഗത്തെ പുരോഗതിക്ക് തെളിവാണ്.
യു.എ.ഇ. പ്രസിഡന്റ് ശൈഖ് മുഹമ്മദ് ബിൻ സായിദ് അൽ നഹ്യാന്റെ സുസ്ഥിര വികസന ദർശനങ്ങൾക്ക് അനുസൃതമായി നടപ്പിലാക്കുന്ന വിവിധ പദ്ധതികളാണ് ഈ നേട്ടങ്ങൾക്ക് പിന്നിലെന്ന് അധികൃതർ വ്യക്തമാക്കി. 2026-ലെ രണ്ടാമത് അബൂദബി പരിസ്ഥിതി ഏജൻസി (EAD) ബോർഡ് യോഗത്തിലാണ് പ്രധാന പരിസ്ഥിതി സൂചികകൾ പുറത്തുവിട്ടത്. ഇ.എ.ഡി. ബോർഡ് ചെയർമാൻ ശൈഖ് ഹംദാൻ ബിൻ സായിദ് അൽ നഹ്യാന്റെ അധ്യക്ഷതയിലാണ് യോഗം ചേർന്നത്.
ജലസുരക്ഷ ഉറപ്പാക്കുന്നതിനുള്ള പദ്ധതികളുടെ ഭാഗമായും നിർണായക പുരോഗതി കൈവരിച്ചിട്ടുണ്ട്. അൽ ദഫ്റ, അൽ ഐൻ മേഖലകളിലെ എട്ട് കേന്ദ്രങ്ങളിലായി ഏകദേശം 520 ഭൂഗർഭ കിണറുകളിൽ ഫീൽഡ് സർവേ പൂർത്തിയാക്കി. ഉമ്മു ഗഫ, അൽ ശുഐബ്, കശൂന എന്നീ പ്രദേശങ്ങൾ പ്രതിദിനം 30,000 ക്യുബിക് മീറ്റർ ശേഷിയുള്ള നാല് ജലശുദ്ധീകരണ പ്ലാന്റുകൾ സ്ഥാപിക്കുന്നതിനായി തെരഞ്ഞെടുത്തിട്ടുണ്ട്. കൂടാതെ ഭൂഗർഭജല വിഭവങ്ങളുടെ സംരക്ഷണത്തിനും കാര്യക്ഷമമായ ഉപയോഗത്തിനുമായി പ്രത്യേക നിയമാവലിയും രൂപീകരിച്ചിട്ടുണ്ട്.
ഹരിതവൽക്കരണ പ്രവർത്തനങ്ങൾ ശക്തിപ്പെടുത്തുന്നതിന്റെ ഭാഗമായി വ്യോമമാർഗം വഴി ഒരു കോടിയിലധികം വിത്തുകൾ വിതറുന്ന പദ്ധതിക്കും തുടക്കമായിട്ടുണ്ട്. പ്രകൃതി ആവാസവ്യവസ്ഥ പുനരുജ്ജീവിപ്പിക്കുന്നതിനും വനവൽക്കരണം പ്രോത്സാഹിപ്പിക്കുന്നതിനുമാണ് ഈ പദ്ധതി ലക്ഷ്യമിടുന്നത്.
സമുദ്ര പരിസ്ഥിതി ഗവേഷണ രംഗത്തും അബൂദബി ശ്രദ്ധേയമായ മുന്നേറ്റമാണ് നടത്തുന്നത്. മിഡിൽ ഈസ്റ്റിലെ ഏറ്റവും ആധുനിക പരിസ്ഥിതി ഗവേഷണ കപ്പലുകളിലൊന്നായ ‘ജെയ്വൂൺ’ ഈ വർഷം മാത്രം 81 കേന്ദ്രങ്ങളിൽ നിന്ന് 206 പരിസ്ഥിതി സാമ്പിളുകൾ ശേഖരിക്കുകയും 2,868 കിലോമീറ്റർ ശാസ്ത്രീയ സർവേ പൂർത്തിയാക്കുകയും ചെയ്തു. 2023-ൽ പ്രവർത്തനം ആരംഭിച്ചതിന് ശേഷം കപ്പൽ 50,300 കിലോമീറ്ററിലധികം സമുദ്ര സർവേകൾ പൂർത്തിയാക്കിയിട്ടുണ്ട്.
സമുദ്ര ജീവവൈവിധ്യം സംരക്ഷിക്കുന്നതിനായുള്ള അബൂദബി കോറൽ ഗാർഡൻസ് പദ്ധതിയിലും മികച്ച പുരോഗതിയാണ് രേഖപ്പെടുത്തിയത്. ഈ വർഷം മാത്രം 3,02,415 പവിഴപ്പുറ്റുകൾ നട്ടുപിടിപ്പിച്ചതോടെ പദ്ധതിയിലൂടെ സംരക്ഷിച്ച ആകെ പവിഴപ്പുറ്റുകളുടെ എണ്ണം 18 ലക്ഷമായി ഉയർന്നു. കൂടാതെ 12,700 കൃത്രിമ പവിഴപ്പുറ്റുകളും സ്ഥാപിച്ചതായി അധികൃതർ അറിയിച്ചു.
പരിസ്ഥിതി സംരക്ഷണം, ജലസുരക്ഷ, സമുദ്ര ആവാസവ്യവസ്ഥ പുനരുദ്ധാരണം, ഹരിതവൽക്കരണം തുടങ്ങിയ മേഖലകളിൽ അബൂദബി കൈവരിച്ച നേട്ടങ്ങൾ ആഗോള സുസ്ഥിര വികസന ലക്ഷ്യങ്ങളിലേക്കുള്ള എമിറേറ്റിന്റെ പ്രതിബദ്ധത വ്യക്തമാക്കുന്നതാണെന്ന് പരിസ്ഥിതി വിദഗ്ധർ വിലയിരുത്തുന്നു.
