സ്പേസ്42 അരീനയിൽ 36 പോരാട്ടങ്ങൾ; ജപ്പാൻ, മംഗോളിയ, ഈജിപ്ത് എന്നിവിടങ്ങളിൽ നിന്നുള്ള ഒൻപത് പ്രമുഖ താരങ്ങൾ മാറ്റുരയ്ക്കും
അബുദാബി — സെപ്റ്റംബർ 2, 2026 : യുഎഇയുടെ കായിക ചരിത്രത്തിൽ ആദ്യമായി അന്താരാഷ്ട്ര പ്രൊഫഷണൽ സുമോ ഗുസ്തി ടൂർണമെന്റിന് അബുദാബി വേദിയാകുന്നു. സെപ്റ്റംബർ 26-ന് അബുദാബിയിലെ സ്പേസ്42 അരീനയിലാണ് ‘ഓൾ-സ്റ്റാർ സുമോ കോമ്പറ്റീഷൻ’ അരങ്ങേറുക.
അബുദാബി സാംസ്കാരിക-വിനോദസഞ്ചാര വകുപ്പുമായി (ഡിസിടി അബുദാബി) സഹകരിച്ചാണ് നൂറ്റാണ്ടുകളുടെ പാരമ്പര്യമുള്ള ജാപ്പനീസ് കായിക ഇനം തലസ്ഥാന നഗരിയിലെത്തിക്കുന്നത്. ജപ്പാൻ, മംഗോളിയ, ഈജിപ്ത് എന്നിവിടങ്ങളിൽ നിന്നുള്ള ഒൻപത് ലോകോത്തര സുമോ താരങ്ങൾ (റിക്കിഷി) അണിനിരക്കുന്ന ടൂർണമെന്റിൽ ആകെ 36 മത്സരങ്ങൾ നടക്കും.
ജാപ്പനീസ് സുമോയിലെ പരമോന്നത ബഹുമതിയായ എംപറർ കപ്പ് ജേതാവായ ഇച്ചി, നിലവിലെ സുമോ താരങ്ങളിൽ ഏറ്റവും കൂടുതൽ ഭാരമുള്ളവരിലൊരാളായ ജപ്പാന്റെ ഹിരോക്കി എന്നിവരാണ് പ്രധാന ആകർഷണം. മുൻ ജൂനിയർ ലോക സുമോ ചാമ്പ്യൻ മംഗോളിയയുടെ മെൻഡീ, ഈജിപ്ഷ്യൻ ചാമ്പ്യൻ റാമി എൽ-ഗസാർ എന്നിവരും അബുദാബിയിൽ കളത്തിലിറങ്ങും. അറബ് മേഖലയിൽ നിന്നുള്ള ഏക അന്താരാഷ്ട്ര സാന്നിധ്യമാണ് എൽ-ഗസാർ.
വെറുമൊരു ഗുസ്തി മത്സരത്തിനപ്പുറം, ജാപ്പനീസ് സംസ്കാരവുമായി ഇഴചേർന്നുനിൽക്കുന്ന പാരമ്പര്യ ചടങ്ങുകളും വേദിയിൽ പുനരാവിഷ്കരിക്കും. പ്രത്യേക വേഷവിധാനങ്ങളോടെയുള്ള റിങ് പ്രവേശന ചടങ്ങായ ‘ദോഹ്യോ-ഇരി’, ഉപ്പ് വിതറി കളം ശുദ്ധീകരിക്കുന്ന പുരാതന ആചാരങ്ങൾ എന്നിവയോടെയാണ് മത്സരങ്ങൾ സംഘടിപ്പിക്കുകയെന്ന് സ്പേസ്42 അരീന ജനറൽ മാനേജർ മുഹമ്മദ് യഹ്യ വ്യക്തമാക്കി.
യുഎഫ്സി, ബോക്സിങ് തുടങ്ങിയ ആഗോള പോരാട്ട കായിക മത്സരങ്ങൾക്ക് സ്ഥിരമായി വേദിയാകുന്ന അബുദാബി, അന്താരാഷ്ട്ര സുമോയിലൂടെ കായിക ഭൂപടത്തിൽ തങ്ങളുടെ സ്വാധീനം കൂടുതൽ വിപുലമാക്കുകയാണ്.
