യുഎഇയുടെ പാരമ്പര്യവും ഭരണവൈഭവവും വിളിച്ചോതുന്ന സാംസ്കാരിക കേന്ദ്രത്തിന് വീണ്ടും അന്താരാഷ്ട്ര ബഹുമതി.
അബുദാബി : യുഎഇയുടെ സാംസ്കാരിക പാരമ്പര്യവും തനത് വാസ്തുവിദ്യയും ലോകത്തിന് മുന്നിൽ അവതരിപ്പിക്കുന്ന അബുദാബിയിലെ ഖസർ അൽ വതാൻ 2026-ലെ ലോകത്തിലെ ഏറ്റവും മികച്ച 100 യാത്രാനുഭവങ്ങളുടെ പട്ടികയിൽ ഇടം നേടി.
അന്താരാഷ്ട്ര വിനോദസഞ്ചാര മേഖലയിലെ പ്രമുഖ അവലോകനങ്ങൾ അടിസ്ഥാനമാക്കിയാണ് ഈ നേട്ടം. അബുദാബി പ്രസിഡൻഷ്യൽ പാലസ് സമുച്ചയത്തിനുള്ളിൽ സ്ഥിതി ചെയ്യുന്ന ഈ പ്രൗഢഗംഭീര മന്ദിരം രാജ്യത്തിന്റെ ഭരണ നിർവഹണ കേന്ദ്രം എന്നതിലുപരി വിനോദസഞ്ചാരികൾക്ക് അപൂർവ്വമായ സാംസ്കാരിക അനുഭവം കൂടി സമ്മാനിക്കുന്നു.
2019 മാർച്ചിലാണ് യുഎഇ ഭരണകൂടം ഖസർ അൽ വതാൻ പൊതുജനങ്ങൾക്കായി തുറന്നുകൊടുത്തത്. അറബ് നിർമ്മാണ ശൈലിയുടെ നിദർശനമായ ‘ഗ്രേറ്റ് ഹാൾ’, സുപ്രധാന ഉച്ചകോടികൾ നടക്കുന്ന ‘സ്പിരിറ്റ് ഓഫ് കൊളാബറേഷൻ’ ഹാൾ, അമൂല്യ ഗ്രന്ഥ ശേഖരങ്ങളുള്ള ‘ഖസർ അൽ വതാൻ ലൈബ്രറി’ എന്നിവ ഇവിടെ പ്രധാന ആകർഷണങ്ങളാണ്. 50,000-ത്തിലധികം പുസ്തകങ്ങളും അപൂർവ്വ കൈയെഴുത്തുപ്രതികളും ഈ ലൈബ്രറിയിൽ സൂക്ഷിച്ചിട്ടുണ്ട്.
അബുദാബി സാംസ്കാരിക വിനോദസഞ്ചാര വകുപ്പിന്റെ (DCT Abu Dhabi) സാംസ്കാരിക പൈതൃക സംരക്ഷണ പദ്ധതികൾക്ക് വലിയ ഊർജ്ജം നൽകുന്നതാണ് ഈ പുതിയ അംഗീകാരം. ഷെയ്ഖ് സായിദ് ഗ്രാൻഡ് മോസ്ക്, ലൂവ്ര് അബുദാബി എന്നിവയ്ക്കൊപ്പം വിദേശ സഞ്ചാരികളുടെ പ്രിയപ്പെട്ട കേന്ദ്രമായി ഖസർ അൽ വതാൻ മാറിയിട്ടുണ്ട്.
ദിവസവും നടത്തുന്ന ഗൈഡഡ് ടൂറുകൾക്ക് പുറമെ, യുഎഇയുടെ ചരിത്രവും ഭാവികാഴ്ചപ്പാടും ദൃശ്യവൽക്കരിക്കുന്ന ലൈറ്റ് ആൻഡ് സൗണ്ട് ഷോയും സന്ദർശകർക്കായി ഇവിടെ ഒരുക്കിയിട്ടുണ്ട്. ഔദ്യോഗിക വെബ്സൈറ്റ് വഴി പൊതുജനങ്ങൾക്ക് പ്രവേശന ടിക്കറ്റുകൾ ലഭ്യമാണ്.
