റിയാദ്: ജിസിസിയിലെ സ്പെഷ്യലൈസ്ഡ് എജ്യുക്കേഷൻ മേഖലയിൽ പുതിയ ചരിത്രമെഴുതി പ്രമുഖ മലയാളി സംരംഭകൻ ഡോ. ഷംഷീർ വയലിൽ ചെയർമാനായ അൽമസാർ അൽഷാമിൽ എജ്യുക്കേഷൻ (Al-Masar Al-Shamil Education). 2025 ഡിസംബറിൽ അവസാനിച്ച സാമ്പത്തിക വർഷത്തിൽ കമ്പനിയുടെ ആകെ വരുമാനം 22 ശതമാനം വളർച്ചയോടെ 534 മില്യൺ സൗദി റിയാലിൽ (ഏകദേശം 1,289 കോടി രൂപ) എത്തിനിൽക്കുന്നു. ആഗോളതലത്തിൽ വിദ്യാഭ്യാസ മേഖല നേരിടുന്ന വെല്ലുവിളികൾക്കിടയിലും, കൃത്യമായ പ്രവർത്തന പദ്ധതികളിലൂടെയും നൂതനമായ അധ്യാപന രീതികളിലൂടെയും കൈവരിച്ച ഈ നേട്ടം കമ്പനിയുടെ വിപണിയിലെ സ്വാധീനം വ്യക്തമാക്കുന്നതാണ്.
കമ്പനിയുടെ അറ്റാദായത്തിലും ശ്രദ്ധേയമായ മുന്നേറ്റമാണ് ഈ വർഷം രേഖപ്പെടുത്തിയിരിക്കുന്നത്. മുൻവർഷത്തെ അപേക്ഷിച്ച് അറ്റാദായം 7 ശതമാനം വർധിച്ച് 158.9 മില്യൺ സൗദി റിയാലായി (384 കോടി രൂപ) ഉയർന്നു. 2025-ന്റെ അവസാന പാദത്തിൽ മാത്രം വരുമാനത്തിൽ 20 ശതമാനത്തിന്റെ വർദ്ധനവ് രേഖപ്പെടുത്തിയിട്ടുണ്ട് എന്നത് സ്ഥാപനത്തിന്റെ സുസ്ഥിരമായ വളർച്ചയെ സൂചിപ്പിക്കുന്നു. സൗദി എക്സ്ചേഞ്ചിൽ വിജയകരമായ ഐപിഒ പൂർത്തിയാക്കിയ ശേഷം പബ്ലിക് ലിസ്റ്റ് ചെയ്ത കമ്പനി എന്ന നിലയിൽ അൽമസാർ പുറത്തുവിടുന്ന ആദ്യത്തെ സമ്പൂർണ്ണ വാർഷിക ഫലമാണിത് എന്ന പ്രത്യേകതയുമുണ്ട്.
മികച്ച സാമ്പത്തിക നേട്ടം കൈവരിച്ച സാഹചര്യത്തിൽ ലാഭവിഹിതം ഓഹരി ഉടമകളുമായി പങ്കുവെക്കാനും കമ്പനി തീരുമാനിച്ചു. 75 മില്യൺ സൗദി റിയാൽ (ഏകദേശം 181 കോടി രൂപ) കാഷ് ഡിവിഡൻഡ് ആയി നൽകാനാണ് ഡയറക്ടർ ബോർഡ് ശുപാർശ ചെയ്തിരിക്കുന്നത്. ഇതനുസരിച്ച് ഓരോ ഓഹരിക്കും 0.7324 സൗദി റിയാൽ വീതം ലാഭവിഹിതം ലഭിക്കും. ജനറൽ അസംബ്ലിയുടെ ഔദ്യോഗിക അംഗീകാരം ലഭിച്ചാലുടൻ ഈ തുക ഓഹരി ഉടമകളിലേക്ക് എത്തും. നിക്ഷേപകർക്ക് മികച്ച മൂല്യം ഉറപ്പാക്കുന്നതിനൊപ്പം ജിസിസിയിലെ വിദ്യാഭ്യാസ സേവനങ്ങളിൽ ഗുണപരമായ മാറ്റങ്ങൾ കൊണ്ടുവരാനും കമ്പനി പ്രതിജ്ഞാബദ്ധമാണെന്ന് ചെയർമാൻ ഡോ. ഷംഷീർ വയലിൽ വ്യക്തമാക്കി.
പ്രത്യേക പരിഗണന അർഹിക്കുന്ന കുട്ടികൾക്കായുള്ള സ്പെഷ്യലൈസ്ഡ് എജ്യുക്കേഷൻ മേഖലയിൽ അൽമസാർ നടത്തുന്ന ഇടപെടലുകൾ അന്താരാഷ്ട്ര ശ്രദ്ധ പിടിച്ചുപറ്റിയതാണ്. സൗദി അറേബ്യയുടെ ‘വിഷൻ 2030’-ന്റെ ഭാഗമായി വിദ്യാഭ്യാസ രംഗത്തുണ്ടാകുന്ന വിപ്ലവകരമായ മാറ്റങ്ങൾക്കൊപ്പം സഞ്ചരിക്കാൻ അൽമസാറിന് സാധിക്കുന്നുണ്ട്. കേവലം ലാഭത്തിനപ്പുറം അറിവും നൈപുണ്യവുമുള്ള ഒരു തലമുറയെ വാർത്തെടുക്കുക എന്ന ലക്ഷ്യത്തോടെയാണ് സ്ഥാപനം മുന്നോട്ട് പോകുന്നത്. വരും വർഷങ്ങളിൽ കൂടുതൽ സാങ്കേതിക വിദ്യകൾ ഉൾപ്പെടുത്തി വിദ്യാഭ്യാസ സേവനങ്ങൾ വിപുലീകരിക്കാനാണ് ഗ്രൂപ്പിന്റെ ലക്ഷ്യം.
