2018-ന് ശേഷം മിഡിൽ ഈസ്റ്റിൽ ഒരു ഹെൽത്ത്കെയർ ഗ്രൂപ്പ് ഇറക്കുന്ന ആദ്യ ഇസ്ലാമിക് ബോണ്ട്; വൻ താല്പര്യവുമായി ആഗോള നിക്ഷേപകർ.
ദുബായ്: പ്രമുഖ മലയാളി വ്യവസായി ഡോ. ഷംഷീർ വയലിലിന്റെ നേതൃത്വത്തിലുള്ള പ്രമുഖ ഗൾഫ് ഹെൽത്ത്കെയർ ശൃംഖലയായ ബുർജീൽ ഹോൾഡിങ്സ്, തങ്ങളുടെ ആദ്യ ‘സുക്കൂക്’ (ഇസ്ലാമിക് ബോണ്ട്) വിപണിയിലിറക്കി 500 മില്യൺ ഡോളർ വിജയകരമായി സമാഹരിച്ചു. മിഡിൽ ഈസ്റ്റ്-നോർത്ത് ആഫ്രിക്ക (MENA) മേഖലയിൽ 2018-ന് ശേഷം ഒരു ആരോഗ്യ പരിപാലന ഗ്രൂപ്പ് പുറത്തിറക്കുന്ന ആദ്യ സുക്കൂക്കാണിത്. വിപണിയിൽ നിന്ന് ലഭ്യമായ അപേക്ഷകൾ പ്രതീക്ഷിച്ചതിലും മൂന്നിരട്ടിയിലധികം (1.6 ബില്യൺ ഡോളർ) കടന്നതായി കമ്പനി അറിയിച്ചു.
പുതുമായി രൂപീകരിച്ച 1.5 ബില്യൺ ഡോളറിന്റെ സുക്കൂക് പദ്ധതിയുടെ ഭാഗമായാണ് ബുർജീൽ 2031-ൽ കാലാവധി പൂർത്തിയാകുന്ന 500 മില്യൺ ഡോളറിന്റെ സീനിയർ അൺസെക്യൂർഡ് സുക്കൂക് വിപണിയിലെത്തിച്ചത്. ആഗോളതലത്തിൽ നിക്ഷേപകരിൽ നിന്നുണ്ടായ വൻ ഡിമാൻഡ് കാരണം ലാഭവിഹിത നിരക്ക് (Profit Rate) 7.000 ശതമാനമായും യീൽഡ് (Yield) 7.125 ശതമാനമായും നിജപ്പെടുത്താൻ ബുർജീലിനായി. ജിസിസിയിലെ ഒരു സ്വകാര്യ നോൺ-ഇൻവെസ്റ്റ്മെന്റ് ഗ്രേഡ് കോർപ്പറേറ്റ് സ്ഥാപനത്തിന് 2020-ന് ശേഷം ലഭിക്കുന്ന ഏറ്റവും കുറഞ്ഞ നിരക്കാണിത്.
ഈ സുക്കൂക് നിക്ഷേപത്തിൽ ഭൂരിഭാഗവും രാജ്യാന്തര ഫണ്ടുകളിൽ നിന്നാണ് എത്തിയത് എന്നത് ശ്രദ്ധേയമാണ്. ആകെയുള്ള നിക്ഷേപത്തിന്റെ 61 ശതമാനവും വിദേശ വിപണികളിൽ നിന്നാണ്. ഇതിൽ യുകെ (34%), യുഎസ് ഓഫ്ഷോർ (24%), മറ്റ് അന്താരാഷ്ട്ര വിപണികൾ (3%) എന്നിവ ഉൾപ്പെടുന്നു. ബാക്കി 39 ശതമാനം നിക്ഷേപം ജിസിസി മേഖലയിലെ പ്രമുഖ ധനകാര്യ സ്ഥാപനങ്ങളിൽ നിന്നാണ് ലഭിച്ചത്. ആഗോള റേറ്റിങ് ഏജൻസികളായ എസ് ആൻഡ് പി ‘BB+’ റേറ്റിങ്ങും മൂഡീസ് ‘Ba2’ റേറ്റിങ്ങുമാണ് ബുർജീലിന്റെ ബോണ്ടുകൾക്ക് നൽകിയിട്ടുള്ളത്.
ഈ ബോണ്ടിലൂടെ സമാഹരിക്കുന്ന തുക നിലവിലുള്ള കടങ്ങൾ പുനഃക്രമീകരിക്കാനും ഗ്രൂപ്പിന്റെ തന്ത്രപ്രധാനമായ വികസന പ്രവർത്തനങ്ങൾക്കുമായി ഉപയോഗിക്കുമെന്ന് ബുർജീൽ വ്യക്തമാക്കുന്നു. സുക്കൂക്കിന് ലഭിച്ച വൻ സ്വീകാര്യത ബുർജീലിന്റെ സുസ്ഥിര വളർച്ചയ്ക്കുള്ള ആഗോള അംഗീകാരമാണെന്ന് ബുർജീൽ ഹോൾഡിങ്സ് ചെയർമാനും സിഇഒയുമായ ഡോ. ഷംഷീർ വയലിൽ പറഞ്ഞു.
“ഞങ്ങളുടെ കന്നി സുക്കൂക്കിന് ലഭിച്ച ശക്തമായ പിന്തുണ കമ്പനിയുടെ സുസ്ഥിരമായ ബിസിനസ്സ് നയങ്ങൾക്കുള്ള നിക്ഷേപകരുടെ അംഗീകാരമാണ്. അന്താരാഷ്ട്ര തലത്തിലുള്ള നിക്ഷേപകർ ബുർജീലിൽ കാണിച്ച വിശ്വാസം യുഎഇയിലെ സാമ്പത്തിക വിപണിക്ക് പുതിയ ഊർജ്ജം പകരും. അത്യാധുനിക ക്ലിനിക്കൽ কെയർ, ഗവേഷണം, മെഡിക്കൽ വിദ്യാഭ്യാസം, എഐ അധിഷ്ഠിത ഡിജിറ്റൽ ഹെൽത്ത്കെയർ തുടങ്ങിയ മേഖലകളിലേക്ക് ഈ തുക ഇൻവെസ്റ്റ് ചെയ്യാനാണ് ഞങ്ങൾ ഉദ്ദേശിക്കുന്നത്,” ഡോ. ഷംഷീർ വയലിൽ വ്യക്തമാക്കി.
2026 ജൂലൈ ഒന്നിന് ഈ സുക്കൂക് ലണ്ടൻ സ്റ്റോക്ക് എക്സ്ചേഞ്ചിന്റെ ഇന്റർനാഷണൽ സെക്യൂരിറ്റീസ് മാർക്കറ്റിൽ വ്യാപാരത്തിനായി ലിസ്റ്റ് ചെയ്യും. പ്രമുഖ ബാങ്കുകളായ സിറ്റി ഗ്രൂപ്പ്, എമിറേറ്റ്സ് എൻബിഡി കാപ്പിറ്റൽ, ഫസ്റ്റ് അബുദാബി ബാങ്ക് എന്നിവരാണ് ഈ പ്രക്രിയയുടെ ഗ്ലോബൽ കോർഡിനേറ്റർമാരായി പ്രവർത്തിച്ചത്.
2007-ൽ ഡോ. ഷംഷീർ വയലിൽ തുടക്കം കുറിച്ച ബുർജീൽ ഹോൾഡിങ്സ് നിലവിൽ യുഎഇ, ഒമാൻ, സൗദി അറേബ്യ എന്നീ രാജ്യങ്ങളിലായി 20 ആശുപത്രികളും 41 മെഡിക്കൽ സെന്ററുകളും അടക്കം 89 വലിയ ആരോഗ്യ ആസ്തികൾ നിയന്ത്രിക്കുന്നു. ബുർജീൽ, മെഡിയോർ, എൽഎൽഎച്ച്, ലൈഫ്കെയർ തുടങ്ങിയ ബ്രാൻഡുകളിലൂടെയാണ് ഗ്രൂപ്പ് അറിയപ്പെടുന്നത്. മിഡിൽ ഈസ്റ്റിലെ കോർപ്പറേറ്റ് മേഖലയ്ക്ക് പുതിയ ദിശാബോധം നൽകുന്നതാണ് ബുർജീലിന്റെ ഈ പുതിയ സാമ്പത്തിക ചുവടുവെപ്പ്.
