കൊച്ചി ∙ വ്യവസായി CJ Royയെ കുറിച്ചുള്ള കേന്ദ്ര ഏജൻസികളുടെ അന്വേഷണ പശ്ചാത്തലം ഇപ്പോഴും വ്യക്തമായിട്ടില്ല. ദുബായിലെ ബിസിനസ് ഇടപാടുകളുമായി ബന്ധപ്പെട്ട സംശയങ്ങളാണ് ആദായനികുതി വകുപ്പിന്റെ ശ്രദ്ധ റോയിയിലേക്കു തിരിച്ചതെന്നാണു സൂചന. എന്നാൽ ഔദ്യോഗികമായി ഇതുസംബന്ധിച്ച് പ്രതികരിക്കാൻ ഉദ്യോഗസ്ഥർ തയ്യാറായിട്ടില്ല.
കോൺഫിഡന്റ് ഗ്രൂപ്പിന്റെ കോർപറേറ്റ് ആസ്ഥാനം ബെംഗളൂരുവിലായിരുന്നിട്ടും പരിശോധനകൾ ഏകോപിപ്പിച്ചത് കൊച്ചി ഐടി യൂണിറ്റായിരുന്നു എന്നതും ശ്രദ്ധേയമാണ്. റോയിയുടെ അസ്വാഭാവിക മരണത്തിനുശേഷവും അന്വേഷണത്തിന്റെ സ്വഭാവത്തെക്കുറിച്ച് വ്യക്തത വന്നിട്ടില്ല.
ബിസിനസ് വിപുലീകരണത്തിന്റെ ഭാഗമായി കഴിഞ്ഞ നവംബറിൽ ദുബായിൽ സംഘടിപ്പിച്ച വൻ ആഘോഷവും ഏജൻസികളുടെ നിരീക്ഷണത്തിലായിരുന്നുവെന്നാണു വിവരം. മലയാള സിനിമാ രംഗത്തെ നിരവധി പ്രമുഖർ പങ്കെടുത്ത ഈ പരിപാടിയിൽ പങ്കെടുത്ത ചിലരെ പിന്നീട് ചോദ്യം ചെയ്തതായും റിപ്പോർട്ടുണ്ട്. റോയിയുമായി അടുത്ത ബന്ധം പുലർത്തിയിരുന്ന ചില ബിസിനസ് സഹപ്രവർത്തകരും അന്വേഷണ പരിധിയിൽ എത്തിയതായി സൂചന.
ഇതിനിടെ, കോൺഫിഡന്റ് ഗ്രൂപ്പിന്റെ കേരളത്തിലെ റിയൽ എസ്റ്റേറ്റ് പദ്ധതികളുമായി ബന്ധപ്പെട്ട നിക്ഷേപകരും ഭൂമിയുടമകളും അനിശ്ചിതത്വത്തിലാണ്. ദുബായിൽനിന്നു നിക്ഷേപം കണ്ടെത്താനുള്ള ശ്രമങ്ങൾ പുരോഗമിക്കുകയായിരുന്നുവെന്ന് ഗ്രൂപ്പിനോടനുബന്ധിച്ച വൃത്തങ്ങൾ പറയുന്നു.
English Summary:
Questions remain over why central agencies were closely tracking businessman CJ Roy. Investigators reportedly focused on his Dubai business dealings and a high-profile corporate event attended by film personalities. After his death, officials have not issued detailed clarifications, leaving investors and associates uncertain about ongoing projects.
