കൊച്ചി: വെള്ളാപ്പള്ളി നടേശന് നൽകിയ പത്മഭൂഷൺ പുരസ്കാരം പിൻവലിക്കണമെന്ന് ആവശ്യപ്പെട്ട് എസ്എൻഡിപി സംരക്ഷണ സമിതി രംഗത്തെത്തി. 124 തട്ടിപ്പ് കേസുകളിൽ വെള്ളാപ്പള്ളി പ്രതിയാണെന്നാരോപിച്ചാണ് സമിതി ശക്തമായ പ്രതിഷേധവുമായി മുന്നോട്ട് വന്നിരിക്കുന്നത്.
പുരസ്കാര പ്രഖ്യാപനത്തിനെതിരെ വെള്ളാപ്പള്ളി നടത്തിയ പ്രതികരണം രാജ്യത്തെയും പത്മ പുരസ്കാരങ്ങളെയും അപമാനിക്കുന്നതാണെന്നും സമിതി ആരോപിച്ചു. ഇതുസംബന്ധിച്ച് രാഷ്ട്രപതിക്കും പ്രധാനമന്ത്രിക്കും എസ്എൻഡിപി സംരക്ഷണ സമിതി ഔദ്യോഗികമായി പരാതി നൽകിയതായി നേതാക്കൾ അറിയിച്ചു.
വെള്ളാപ്പള്ളിക്ക് നൽകിയ പത്മഭൂഷൺ പിൻവലിച്ചില്ലെങ്കിൽ പ്രതിഷേധം ശക്തമാക്കുമെന്നും, ആവശ്യമായാൽ കോടതിയെ സമീപിക്കുമെന്നും സംരക്ഷണ സമിതി വ്യക്തമാക്കി. പത്മവിഭൂഷൺ ജേതാവായ വി.എസ്. അച്ചുതാനന്ദനാണ് ഈ വിഷയത്തിൽ പരാതി നൽകിയത്. വെള്ളാപ്പള്ളിയെ പത്മ പുരസ്കാരത്തിന് ശിപാർശ ചെയ്തത് ആരാണെന്നും, അദ്ദേഹത്തിന് പുരസ്കാരം നൽകുന്നതിലൂടെ എന്ത് സന്ദേശമാണ് നൽകുന്നതെന്നും പരാതിയിൽ ചോദിക്കുന്നു.
77-ാം റിപ്പബ്ലിക് ദിനത്തോടനുബന്ധിച്ച് പ്രഖ്യാപിച്ച പത്മ പുരസ്കാര പട്ടികയിലാണ് വെള്ളാപ്പള്ളി നടേശന് പത്മഭൂഷൺ ലഭിച്ചത്. സാമൂഹിക സേവന രംഗത്തും പൊതുജീവിതത്തിലുമുള്ള സംഭാവനകൾ പരിഗണിച്ചാണ് അദ്ദേഹത്തിന് പുരസ്കാരം നൽകാൻ തീരുമാനിച്ചതെന്നാണ് ഔദ്യോഗിക വിശദീകരണം.
എന്നാൽ, വിവിധ ക്രിമിനൽ കേസുകൾ നിലവിലിരിക്കെ പുരസ്കാരം നൽകിയത് ചോദ്യം ചെയ്യപ്പെടേണ്ടതാണെന്നും, ഇത് പുരസ്കാരങ്ങളുടെ വിശ്വാസ്യതയെ ബാധിക്കുമെന്നും സംരക്ഷണ സമിതി ആരോപിച്ചു.
