ദുബൈ: ദുബൈ റോഡ് ഗതാഗത അതോറിറ്റി (ആർ.ടി.എ) ദുബൈയിലെ ജുമൈറ, ഉമ്മുസുഖൈം മേഖലകളിൽ ഡ്രൈവറില്ലാ ടാക്സി സർവിസ് ആരംഭിച്ചു. സുസ്ഥിരവും സാങ്കേതികവിദ്യാധിഷ്ഠിതവുമായ നഗര ഗതാഗത സംവിധാനങ്ങളിലേക്കുള്ള ദുബൈയുടെ നീക്കത്തിന്റെ ഭാഗമായാണ് പുതിയ സേവനം.
യാത്രക്കാർക്ക് ഊബർ, അപ്പോളോ ഗോ ആപ്പുകൾ വഴി ഡ്രൈവറില്ലാ ടാക്സി ബുക്ക് ചെയ്യാൻ സാധിക്കും.
വാണിജ്യാടിസ്ഥാനത്തിൽ സർവിസ് ആരംഭിക്കുന്നതിന് മുമ്പ് ഇരു മേഖലകളിലും പരീക്ഷണ ഓട്ടങ്ങൾ വിജയകരമായി പൂർത്തിയാക്കിയിരുന്നു. വിവിധ റോഡ് സാഹചര്യങ്ങളിലെ വാഹനങ്ങളുടെ പ്രതികരണ ശേഷിയും പ്രവർത്തനക്ഷമതയും പരിശോധിക്കുന്നതിലായിരുന്നു പ്രധാന ശ്രദ്ധ.
പൂർണമായും സ്വയം നിയന്ത്രണ സംവിധാനത്തിൽ പ്രവർത്തിക്കുന്ന വാഹനങ്ങളിലൂടെ യാത്രക്കാർക്ക് പുതിയ യാത്രാനുഭവം നൽകുകയാണ് പദ്ധതിയെന്ന് ആർ.ടി.എ അധികൃതർ അറിയിച്ചു. ഭാവിയിലെ സ്മാർട്ട് ഗതാഗത സംവിധാനങ്ങളിൽ ആഗോള തലത്തിൽ മുൻനിരയിലേക്കുയരാനാണ് ദുബൈയുടെ ലക്ഷ്യം.
നിലവിൽ അബൂദബിയിൽ യാസ് ഐലന്റ് ഉൾപ്പെടെയുള്ള ചില മേഖലകളിൽ ഡ്രൈവറില്ലാ ടാക്സികൾ സർവിസ് നടത്തുന്നുണ്ട്. കൂടാതെ റാസൽഖൈമയിൽ റോബോ ടാക്സികളും ബസുകളും പരീക്ഷണ ഓട്ടം തുടരുകയാണ്. വൈകാതെ എല്ലാ എമിറേറ്റുകളിലും ഡ്രൈവറില്ലാ ടാക്സികൾ സർവിസ് ആരംഭിക്കുമെന്നാണ് സൂചന.
