ട്യൂണിസ് സ്ട്രീറ്റിനും അമ്മൻ സ്ട്രീറ്റിനും ഇടയിൽ പുതിയ പാത തുറന്നു; വാഹനാശേഷി പകുതിയോളം വർധിക്കും.
ദുബായ്, ഒക്ടോബർ 2, 2026 : ദുബായ് അൽ മിസ്ഹർ 4-ൽ ട്യൂണിസ് സ്ട്രീറ്റിൽ നിന്ന് അമ്മൻ സ്ട്രീറ്റിലേക്കുള്ള പ്രധാന റോഡിന്റെ വികസന ജോലികൾ പൂർത്തിയായതായി റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർടിഎ) അറിയിച്ചു.
Full Article ഒരു കിലോമീറ്ററിലധികം വരുന്ന ഈ റോഡിൽ ഇരുവശത്തേക്കുമുള്ള രണ്ട് വരി പാത മൂന്ന് വരിയായി വികസിപ്പിച്ചാണ് ഗതാഗതത്തിന് തുറന്നുകൊടുത്തത്. ഇതോടെ റോഡിലെ വാഹനാശേഷിയിൽ 50 ശതമാനം വർധനവുണ്ടാകുകയും യാത്രാസമയത്തിൽ ശരാശരി 25 ശതമാനം കുറവ് രേഖപ്പെടുത്തുകയും ചെയ്യും.
പ്രധാനമായും ട്യൂണിസ് സ്ട്രീറ്റിൽ നിന്ന് അമ്മൻ സ്ട്രീറ്റിലേക്ക് പോകുന്ന വാഹനയാത്രക്കാർക്കാണ് ഈ സൗകര്യം കൂടുതൽ ഗുണം ചെയ്യുന്നത്. അൽ മിസ്ഹർ, മുഹൈസിന എന്നീ റസിഡൻഷ്യൽ മേഖലകളിലെ താമസക്കാർക്ക് പ്രധാന ഹൈവേകളിലേക്ക് പ്രവേശിക്കുന്നതും തിരിച്ചെത്തുന്നതും എളുപ്പമാകും. നഗരവളർച്ചയ്‌ക്കൊപ്പം ജനസാന്ദ്രതയേറിയ റസിഡൻഷ്യൽ ഏരിയകളിലെ ട്രാഫിക് കുരുക്കുകൾ വേഗത്തിൽ പരിഹരിക്കാൻ ആർടിഎ നടപ്പാക്കുന്ന ‘ക്വിക്ക് ഇംപ്രൂവ്‌മെന്റ്’ പദ്ധതികളുടെ ഭാഗമായാണ് ഈ വികസനം.
ഇതിന് പുറമെ, പ്രധാന റോഡുകളിലെ തിരക്ക് ഒഴിവാക്കാൻ ഡ്രൈവർമാർ റസിഡൻഷ്യൽ ഏരിയകളിലെ ഇടറോഡുകൾ കുറുക്കുവഴികളായി (റാറ്റ് റണ്ണിങ്) ഉപയോഗിക്കുന്നത് തടയാനുള്ള പ്രത്യേക പദ്ധതിയും ആർടിഎ അൽ മിസ്ഹർ 4-ൽ ആവിഷ്‌കരിക്കുന്നുണ്ട്. പ്രദേശവാസികളുടെ സുരക്ഷ മുൻനിർത്തി ശാസ്ത്രീയ ട്രാഫിക് നിയന്ത്രണ മാർഗങ്ങളിലൂടെ ഇത്തരം ഗതാഗതം നിയന്ത്രിക്കാനാണ് തീരുമാനം. ദുബായിലെ വിവിധ പ്രദേശങ്ങളിലെ ട്രാഫിക് നിരീക്ഷിച്ച ശേഷമായിരിക്കും സമാനമായ മറ്റ് വികസന പദ്ധതികൾ പ്രഖ്യാപിക്കുകയെന്ന് അധികൃതർ വ്യക്തമാക്കി.
