ഇന്റർസിസ്റ്റംസ് ‘ഇന്റലി കെയർ’ പ്ലാറ്റ്‌ഫോം 6 ആശുപത്രികളിലും 25 മെഡിക്കൽ സെന്ററുകളിലും നടപ്പിലാക്കുന്നു; ഡോക്ടർമാരുടെ ജോലിഭാരം കുറയും, രോഗീ പരിചരണം കൂടുതൽ വേഗത്തിലാകും.
ദുബായ്: യൂറോപ്പ്, മിഡിൽ ഈസ്റ്റ്, ആഫ്രിക്ക (EMEA) മേഖലകളിൽ ആദ്യമായി പൂർണ്ണമായ ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യയിൽ പ്രവർത്തിക്കുന്ന ഇലക്ട്രോണിക് ഹെൽത്ത് റെക്കോർഡ് (EHR) സംവിധാനം നടപ്പിലാക്കി ദുബായിലെ പ്രമുഖ പ്രീമിയം ആരോഗ്യ സേവന ദാതാക്കളായ മെഡ്കെയർ ഹോസ്പിറ്റൽസ് ആൻഡ് മെഡിക്കൽ സെന്റേഴ്സ്. ആഗോള ഡാറ്റാ ടെക്നോളജി കമ്പനിയായ ഇന്റർസിസ്റ്റംസുമായി (InterSystems) ചേർന്നാണ് ‘ഇന്റലി കെയർ’ (InterSystems IntelliCare™) എന്ന നെക്സ്റ്റ് ജനറേഷൻ പ്ലാറ്റ്‌ഫോം മെഡ്കെയർ തങ്ങളുടെ ശൃംഖലകളിൽ അവതരിപ്പിച്ചത്.
ആസ്റ്റർ ഡിഎം ഹെൽത്ത്‌കെയർ ഗ്രൂപ്പിന്റെ ഭാഗമായ മെഡ്കെയറിന്റെ 6 അത്യാധുനിക മൾട്ടി-സ്പെഷ്യാലിറ്റി ആശുപത്രികളിലും 25 മെഡിക്കൽ സെന്ററുകളിലുമാണ് ഈ അത്യാധുനിക എഐ സംവിധാനം പ്രവർത്തനക്ഷമമാകുന്നത്. സാധാരണ കമ്പ്യൂട്ടർ റെക്കോർഡുകളിൽ എഐ ഫീച്ചറുകൾ കൂട്ടിച്ചേർക്കുന്ന പഴയ രീതിക്ക് പകരം, ക്ലിനിക്കൽ ജോലികളും ഫയൽ ഡോക്യുമെന്റേഷനും പൂർണ്ണമായും എഐ നിയന്ത്രിക്കുന്ന രീതിയിലാണ് ഈ പ്ലാറ്റ്‌ഫോം രൂപകൽപ്പന ചെയ്തിരിക്കുന്നത്. ഇത് ഡോക്ടർമാരുടെ കമ്പ്യൂട്ടർ ജോലിഭാരവും മാനസിക സമ്മർദ്ദവും ഗണ്യമായി കുറയ്ക്കുകയും രോഗികളുമായി കൂടുതൽ സമയം ചിലവഴിക്കാൻ അവരെ സഹായിക്കുകയും ചെയ്യും.
ആസ്റ്റർ ഡിഎം ഹെൽത്ത് കെയർ മാനേജിംഗ് ഡയറക്ടറും ഗ്രൂപ്പ് സിഇഒയുമായ അലീഷ മൂപ്പൻ, ഇന്റർസിസ്റ്റംസ് മിഡിൽ ഈസ്റ്റ്, ഇന്ത്യ ആൻഡ് സൗത്ത് ആഫ്രിക്ക മാനേജിംഗ് ഡയറക്ടർ അലി അബി റാദ് എന്നിവർ ദുബായിൽ വെച്ച് ഔദ്യോഗിക ധാരണാപത്രത്തിൽ (MoU) ഒപ്പുവെച്ചു. മെഡിക്കൽ രംഗത്ത് വ്യക്തിഗത എഐ ആപ്ലിക്കേഷനുകൾ വ്യാപകമാണെങ്കിലും, ഒരു ആശുപത്രി ശൃംഖലയിലെ എല്ലാ ക്ലിനിക്കൽ ഘടനകളെയും ഒന്നിപ്പിക്കുന്ന ഒരു സമ്പൂർണ്ണ എഐ കോർ സിസ്റ്റം മേഖലയിൽ വരുന്നത് ഇതാദ്യമാണെന്ന് ഇരു കമ്പനികളും വ്യക്തമാക്കി.
നിലവിലുള്ള പ്രക്രിയകളെ വെറുതെ ഡിജിറ്റലാക്കുന്നതിനേക്കാൾ ഉപരി, മനുഷ്യന്റെ വൈദഗ്ധ്യത്തെ കൂടുതൽ ശക്തമാക്കുന്ന ഇന്റലിജന്റ് സംവിധാനങ്ങളിലാണ് ആരോഗ്യരംഗത്തിന്റെ ഭാവി എന്ന് അലീഷ മൂപ്പൻ ചടങ്ങിൽ പറഞ്ഞു. ഡോക്ടർമാർക്ക് അഡ്മിനിസ്ട്രേറ്റീവ് ജോലികൾ ലഘൂകരിക്കാനും കൃത്യമായ നിരീക്ഷണങ്ങൾ വേഗത്തിൽ ലഭ്യമാക്കാനും ഇന്റലി കെയർ സഹായിക്കുമെന്നും അവർ കൂട്ടിച്ചേർത്തു.
നാച്ചുറൽ ലാംഗ്വേജ് പ്രോസസിങ് (NLP), ആംബിയന്റ് ഡോക്യുമെന്റേഷൻ സാങ്കേതികവിദ്യകൾ വഴി രോഗിയുടെ മുൻകാല വിവരങ്ങൾ, മരുന്നുകൾ, ലാബ് പരിശോധനാ ഫലങ്ങൾ എന്നിവ ഡോക്ടർമാർക്ക് വേഗത്തിൽ സ്ക്രീനിൽ ലഭ്യമാകും. മെഡ്കെയർ ഹോസ്പിറ്റൽസ് ഗ്രൂപ്പ് സിഇഒ ഡോ. ഷനില ലൈജു വ്യക്തമാക്കിയതനുസരിച്ച്, ഈ അത്യാധുനിക എഐ സംവിധാനം ചികിത്സയിലെ കൃത്യത വർദ്ധിപ്പിക്കുകയും ഒരേ പരിശോധനകൾ തന്നെ ആവർത്തിക്കുന്നത് ഒഴിവാക്കി രോഗിയുടെ ചികിത്സാച്ചെലവും സമയവും ലാഭിക്കാൻ സഹായിക്കുകയും ചെയ്യും.
ആഗോള ഹെൽത്ത് ഇൻഫോർമാറ്റിക്സ് രംഗത്ത് വിപ്ലവകരമായ മാറ്റങ്ങൾക്കാണ് എഐ-ഫസ്റ്റ് ഇലക്ട്രോണിക് ഹെൽത്ത് റെക്കോർഡുകൾ വഴിയൊരുക്കുന്നത്. 2025-ൽ ആഗോളതലത്തിൽ ലോഞ്ച് ചെയ്ത ഇന്റർസിസ്റ്റംസ് ഇന്റലി കെയർ, യൂറോപ്യൻ യൂണിയന്റെ കർശനമായ ക്ലാസ് IIa മെഡിക്കൽ ഡിവൈസ് റെഗുലേഷൻ (MDR) സുരക്ഷാ സർട്ടിഫിക്കറ്റ് സ്വന്തമാക്കിയ ലോകത്തിലെ ആദ്യത്തെ എഐ ഹെൽത്ത് റെക്കോർഡ് പ്ലാറ്റ്‌ഫോമാണ്. ഇതിനകം തന്നെ ഇന്തോനേഷ്യയിലെ ചില പ്രമുഖ ആശുപത്രികളിൽ ഈ ഡിജിറ്റൽ സംവിധാനം വിജയകരമായി പ്രവർത്തിക്കുന്നുണ്ട്.
