ദുബൈ: തൊഴിലാളികളുമായി കൂടുതൽ അടുപ്പമുള്ള ആശയവിനിമയം ഉറപ്പാക്കുകയും അവരുടെ ആവശ്യങ്ങളും നിർദേശങ്ങളും നേരിട്ട് മനസ്സിലാക്കുകയും ചെയ്യുന്നതിനായി ദുബൈ പൊലീസ് പ്രത്യേക പദ്ധതി സംഘടിപ്പിച്ചു. ‘നിങ്ങളുടെ ശബ്ദം കേൾക്കുന്നു’ (We Hear Your Voice) എന്ന പേരിൽ സംഘടിപ്പിച്ച പരിപാടി തൊഴിലാളികൾക്കിടയിൽ വലിയ സ്വീകാര്യത നേടി.
അൽ തായ് കമ്യൂണിറ്റി ഫോറത്തിന്റെ ഭാഗമായി പോസിറ്റീവ് സ്പിരിറ്റ് കൗൺസിൽ, അൽ ഖവാനീജ് പൊലീസ് സ്റ്റേഷൻ എന്നിവയുടെ സഹകരണത്തോടെയാണ് പരിപാടി നടന്നത്. വിവിധ മേഖലകളിൽ ജോലി ചെയ്യുന്ന തൊഴിലാളികൾ പരിപാടിയിൽ പങ്കെടുത്ത് തങ്ങളുടെ അഭിപ്രായങ്ങളും നിർദേശങ്ങളും അധികൃതരുമായി പങ്കുവെച്ചു.
തൊഴിലാളികളുടെ ജീവിത നിലവാരം മെച്ചപ്പെടുത്തുന്നതിനും പൊതുസേവനങ്ങളുടെ ഗുണനിലവാരം ഉയർത്തുന്നതിനും സമൂഹത്തിലെ വിവിധ വിഭാഗങ്ങളുമായുള്ള പങ്കാളിത്തം ശക്തിപ്പെടുത്തുന്നതിനുമാണ് പദ്ധതിയിലൂടെ ലക്ഷ്യമിടുന്നതെന്ന് അധികൃതർ അറിയിച്ചു. തൊഴിലാളികളുടെ പ്രശ്നങ്ങളും ആശങ്കകളും നേരിട്ട് കേൾക്കുന്നതിനൊപ്പം പൊലീസ് സേവനങ്ങളെക്കുറിച്ചുള്ള അവബോധം വർധിപ്പിക്കാനും പരിപാടി സഹായകമായി.
പങ്കെടുത്ത തൊഴിലാളികൾക്ക് വിവിധ പൊലീസ് സേവനങ്ങളെക്കുറിച്ച് വിശദമായ വിവരങ്ങൾ ലഭിക്കുകയും സംശയങ്ങൾ നേരിട്ട് ഉന്നയിക്കാനും അവസരം ലഭിച്ചു. സമൂഹത്തിലെ എല്ലാ വിഭാഗങ്ങളുമായും തുറന്ന ആശയവിനിമയം നിലനിർത്തുന്നതിനും പൊതുജനങ്ങളുടെ അഭിപ്രായങ്ങൾക്ക് പ്രാധാന്യം നൽകുന്നതിനുമുള്ള ദുബൈ പൊലീസിന്റെ പ്രതിബദ്ധതയുടെ ഭാഗമായാണ് ഇത്തരം പരിപാടികൾ സംഘടിപ്പിക്കുന്നതെന്ന് അധികൃതർ വ്യക്തമാക്കി.
