ജബൽ അലി, അൽ മക്തൂം സിറ്റി ഉൾപ്പെടെ അഞ്ച് പുതിയ കേന്ദ്രങ്ങളിലേക്ക് ഡ്രൈവിംഗ് പരിശീലന രംഗം വ്യാപിപ്പിക്കുന്നു; നഗരവൽക്കരണത്തിന് വേഗത കൂട്ടാൻ പുതിയ നീക്കം.
ദുബായ്: ദുബായിലെ വർധിച്ചുവരുന്ന ജനസംഖ്യയ്ക്കും നഗരവൽക്കരണത്തിനും അനുസൃതമായി ഡ്രൈവിംഗ് പരിശീലന കേന്ദ്രങ്ങൾ വ്യാപിപ്പിക്കാൻ റോഡ്സ് ആൻഡ് ട്രാൻസ്പോർട്ട് അതോറിറ്റി (RTA) അനുമതി നൽകി. പുതിയ ജനവാസ മേഖലകളിലേക്ക് കൂടി ഈ സേവനം എത്തിക്കുന്നതിനൊപ്പം, സ്വകാര്യ നിക്ഷേപകർക്ക് വലിയ ബിസിനസ്സ് സാധ്യതകൾ തുറന്നുനൽകുന്നതുമാണ് 2026 ജൂൺ 18-ന് പ്രഖ്യാപിച്ച ഈ പുതിയ തീരുമാനം.
വാദി അൽ സഫ, ജബൽ അലി, മുഷ്രിഫ്, അൽ മക്തൂം സിറ്റി, മദീനത്ത് ഹിന്ദ് എന്നീ അഞ്ച് പ്രമുഖ മേഖലകളിലാണ് പുതുതായി ഡ്രൈവിംഗ് ഇൻസ്റ്റിറ്റ്യൂട്ടുകൾക്കും അവയുടെ ബ്രാഞ്ചുകൾക്കും ലൈസൻസ് നൽകാൻ ആർ.ടി.എ തീരുമാനിച്ചിരിക്കുന്നത്. പുതിയ കമ്മ്യൂണിറ്റികളിൽ താമസമാക്കിയ ജനങ്ങൾക്ക് ഡ്രൈവിംഗ് ലൈസൻസ് സംബന്ധമായ ആവശ്യങ്ങൾക്കായി ദീർഘദൂരം യാത്ര ചെയ്യേണ്ടി വരുന്നത് ഒഴിവാക്കാൻ ഈ നീക്കം സഹായിക്കും.
പുതിയ പ്രദേശങ്ങളിലെ താമസക്കാരുടെ ആവശ്യങ്ങൾ കണ്ടറിഞ്ഞ് സേവനങ്ങൾ അവരുടെ തൊട്ടരികിൽ എത്തിക്കുക എന്നതാണ് ഇതിലൂടെ ലക്ഷ്യമിടുന്നതെന്ന് ആർ.ടി.എ ലൈസൻസിംഗ് ഏജൻസി സി.ഇ.ഒ അഹമ്മദ് മഹ്ബൂബ് വ്യക്തമാക്കി. സുരക്ഷിതവും സുഗമവുമായ യാത്രാസൗകര്യം ഒരുക്കുക എന്ന ദുബായുടെ ദീർഘവീക്ഷണത്തിന് കരുത്തുപകരുന്നതാണ് ഈ മാസ്റ്റർ പ്ലാനെന്ന് അദ്ദേഹം കൂട്ടിച്ചേർത്തു.
അംഗീകൃത ഡ്രൈവിംഗ് സ്കൂളുകൾക്കും പുതിയ നിക്ഷേപകർക്കും ഈ മേഖലകളിലേക്ക് ബിസിനസ്സ് വ്യാപിപ്പിക്കുന്നതിനായി അപേക്ഷകൾ സമർപ്പിക്കാവുന്നതാണ്. സ്വകാര്യ പങ്കാളിത്തം പ്രോത്സാഹിപ്പിക്കുന്നതിനായി അപേക്ഷകൾ പരിശോധിച്ച് അനുമതി നൽകുന്നതിൽ ആർ.ടി.എ കൂടുതൽ ഇളവുകളും ഫ്ലെക്സിബിൾ സമീപനവും സ്വീകരിക്കും. ഇത് റോഡ് സുരക്ഷാ നിലവാരം ഉയർത്തുന്നതിനൊപ്പം യു.എ.ഇയിലെ ബിസിനസ്സ് മേഖലയ്ക്ക് കൂടുതൽ ഉണർവേകും.
