ദുബായ് മെട്രോ ബ്ലൂ ലൈനിലേക്ക് ആർട്ടിഫിഷ്യൽ ഇന്റലിജൻസ്; ഹുവാവേയുമായും കാസ്കോയുമായും കൈകോർത്ത് ആർടിഎ

ചൈനീസ് കമ്പനികളുമായി ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി രണ്ട് സുപ്രധാന ധാരണാപത്രങ്ങളിൽ ഒപ്പുവെച്ചു; മെട്രോ ശൃംഖലയിലും സ്മാർട്ട് സിറ്റി സംവിധാനങ്ങളിലും എഐ വിപ്ലവം.

ദുബായ്: ദുബായിലെ പൊതുഗതാഗത-മെട്രോ സംവിധാനങ്ങളിൽ നിർമ്മിത ബുദ്ധിയും (AI) അത്യാധുനിക സാങ്കേതികവിദ്യകളും വിന്യസിക്കുന്നതിനായി പ്രമുഖ ചൈനീസ് കമ്പനികളായ കാസ്കോ സിഗ്നൽ (CASCO SIGNAL), ഹുവാവേ (Huawei) എന്നിവയുമായി തന്ത്രപ്രധാന പങ്കാളിത്തം പ്രഖ്യാപിച്ച് ദുബായ് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA). ആർടിഎയുടെ ചൈനീസ് സന്ദർശനത്തിനിടെയാണ് ദുബായിലെ ഗതാഗത മേഖലയിൽ വൻ കുതിച്ചുചാട്ടത്തിന് വഴിയൊരുക്കുന്ന രണ്ട് പ്രധാന ധാരണാപത്രങ്ങളിൽ ഇരുരാജ്യങ്ങളും ഒപ്പുവെച്ചത്.

ആർടിഎ ഡയറക്ടർ ജനറലും എക്സിക്യൂട്ടീവ് ഡയറക്ടർ ബോർഡ് ചെയർമാനുമായ മത്തർ അൽ തായറുടെ നേതൃത്വത്തിലുള്ള ഉന്നതതല പ്രതിനിധി സംഘമാണ് ചൈനയിൽ ഔദ്യോഗിക സന്ദർശനം നടത്തിയത്. ദുബായ് ഇന്റർനാഷണൽ ചേംബറിന്റെ ഷാങ്ഹായ് ഓഫീസിന്റെ സഹകരണത്തോടെയായിരുന്നു ഈ സന്ദർശനം. മെട്രോ, റെയിൽ ശൃംഖലകൾക്കായുള്ള സിഗ്നലിങ്, കമ്മ്യൂണിക്കേഷൻസ് രംഗത്തെ പ്രമുഖരായ കാസ്കോ സിഗ്നലുമായി ചേർന്നുള്ള പദ്ധതി വരാനിരിക്കുന്ന ‘ദുബായ് മെട്രോ ബ്ലൂ ലൈൻ’ പ്രൊജക്റ്റുമായി ബന്ധിപ്പിച്ചാണ് നടപ്പാക്കുന്നത്. ഇതിന്റെ ഭാഗമായി ദുബായിൽ അത്യാധുനിക റിസർച്ച് ആൻഡ് ഡെവലപ്‌മെന്റ് (R&D) സെന്ററും ഇന്നൊവേഷൻ ലബോറട്ടറിയും സ്ഥാപിക്കും.

ഗ്ലോബൽ ടെക് ഭീമന്മാരായ ഹുവാവേയുമായുള്ള പങ്കാളിത്തം ദുബായുടെ ’20-മിനിറ്റ് സിറ്റി’ (20-Minute City) എന്ന ദീർഘവീക്ഷണത്തിന് കരുത്തുപകരുന്നതാണ്. റോഡുകളിലെ തത്സമയ അപകടങ്ങളും ഗതാഗതക്കുരുക്കുകളും എഐ സാങ്കേതികവിദ്യ ഉപയോഗിച്ച് കണ്ടെത്തുന്നതിനും വിവിധ ഗതാഗത സംവിധാനങ്ങളെ ഒരുമിച്ച് ബന്ധിപ്പിക്കുന്ന ഏകീകൃത ഡാറ്റാ പ്ലാറ്റ്‌ഫോമുകൾ വികസിപ്പിക്കുന്നതിനും ഹുവാവേയുടെ സാങ്കേതിക വൈദഗ്ധ്യം പ്രയോജനപ്പെടുത്തും.

ചൈനീസ് കമ്പനികളുമായുള്ള ദീർഘകാല തന്ത്രപ്രധാന പങ്കാളിത്തം അടിസ്ഥാന സൗകര്യ വികസനത്തിലും നൂതന സാങ്കേതികവിദ്യകൾ നടപ്പിലാക്കുന്നതിലും ദുബായ്ക്ക് വലിയ മുൻതൂക്കം നൽകുമെന്ന് മത്തർ അൽ തായർ പറഞ്ഞു. ഗതാഗത രംഗത്ത് നൂതനമായ മാതൃകയാണ് ചൈനയുടേതെന്നും അദ്ദേഹം കൂട്ടിച്ചേർത്തു. സന്ദർശനത്തിന്റെ ഭാഗമായി ഷാങ്ഹായിലെ ട്രാൻസ്പോർട്ട് കമാൻഡ് ആൻഡ് കൺട്രോൾ സെന്റർ, ലോകത്തിലെ ഏറ്റവും വേഗതയേറിയ കൊമേഴ്സ്യൽ ട്രെയിനുകളിലൊന്നായ ഷാങ്ഹായ് മാഗ്‌ലേവ്, ഹോങ്ഖിയാവോ ഇന്റഗ്രേറ്റഡ് ട്രാൻസ്‌പോർട്ട് ഹബ് എന്നിവയും ആർടിഎ സംഘം സന്ദർശിച്ചു വിലയിരുത്തി.

ദുബായ് മെട്രോ ബ്ലൂ ലൈൻ പശ്ചാത്തലം: ദുബായുടെ നഗരവികസന ഭൂപടത്തിൽ ഏറ്റവും നിർണായകമായ പദ്ധതിയാണ് ദുബായ് മെട്രോ ബ്ലൂ ലൈൻ. പ്രധാന സാമ്പത്തിക-താമസ മേഖലകളെ പരസ്പരം ബന്ധിപ്പിക്കുന്ന ഈ റൂട്ടിൽ ചൈനീസ് സാങ്കേതികവിദ്യയുടെ സഹായത്തോടെ എഐ അടിസ്ഥാനമാക്കിയുള്ള ഓപ്പറേഷനുകളും പ്രെഡിക്റ്റീവ് മെയിന്റനൻസും നടപ്പിലാക്കുന്നതിലൂടെ സ്മാർട്ട്-സുസ്ഥിര നഗരമെന്ന ദുബായുടെ ലക്ഷ്യം വേഗത്തിലാകും.