‘ഏഴിന്റെ ഏഴുന്നള്ളത്തുമായി’ ഏഴാമത് പതിപ്പ്; മുന്നോടിയായി സെപ്റ്റംബറിൽ ‘ഈണം 2026’; പുതിയ ഭാരവാഹികളെ തിരഞ്ഞെടുത്തു.
ദുബായ്: യുഎഇയിലെ പ്രവാസി തൃശ്ശൂർക്കാരുടെ പ്രമുഖ കൂട്ടായ്മയായ ‘മ്മടെ തൃശ്ശൂർ ഒഫീഷ്യൽ’ സംഘടനയുടെ ഏഴാമത് പൂരത്തിന് തിരുനാൾ കുറിച്ചു. ഒട്ടനവധി സാംസ്കാരിക പുതുമകളോടെ അരങ്ങേറുന്ന ‘മ്മടെ തൃശ്ശൂർ പൂരം 2026’ വരും ഡിസംബർ 2-ന് യുഎഇയിൽ വെച്ച് വിപുലമായ പരിപാടികളോടെ ആഘോഷിക്കും. ദുബായ് ദേര കോറൽ ഹോട്ടലിൽ വെച്ച് നടന്ന സംഘടനയുടെ വാർഷിക പൊതുയോഗത്തിലും പൂരം പ്രഖ്യാപന ചടങ്ങിലുമാണ് “ഏഴിന്റെ ഏഴുന്നള്ളത്ത്” എന്ന് പേരിട്ടിരിക്കുന്ന പൂരത്തിന്റെ ഔദ്യോഗിക വിവരങ്ങൾ ഭാരവാഹികൾ പുറത്തുവിട്ടത്.
തൃശ്ശൂർ പൂരത്തിന്റെ അതേ തനിമയിലും ഗാംഭീര്യത്തിലും കഴിഞ്ഞ ആറ് വർഷങ്ങളായി ദുബായിൽ പൂരം വിജയകരമായി സംഘടിപ്പിച്ചു വരുന്ന കൂട്ടായ്മയുടെ ഏഴാമത് പൂരാഘോഷമാണ് ഇത്തവണ നടക്കുന്നത്. Equity പ്ലസ്, ഹിറ്റ്‌ ഫ്‌എം എന്നിവരുമായി സംയുക്തമായി സഹകരിച്ച് നടത്തുന്ന ഇത്തവണത്തെ പൂരം, പൂർണ്ണമായും വ്യത്യസ്തവും ആകർഷകവുമായ കലാ-സാംസ്കാരിക പരിപാടികൾ കൊണ്ട് യുഎഇയിലെ പ്രവാസി മലയാളി സമൂഹത്തിന് വേറിട്ടൊരു അനുഭവമായിരിക്കുമെന്ന് സംഘാടകർ അറിയിച്ചു.
ഡിസംബറിലെ മഹാപൂരത്തിന് മുന്നോടിയായി വരുന്ന സെപ്റ്റംബർ 27-ന് ‘ഈണം 2026’ എന്ന പേരിൽ വിപുലമായ സാംസ്കാരിക-സംഗീത വിരുന്നും ദുബായിൽ അരങ്ങേറും. പൊതുയോഗത്തിൽ വെച്ച് ഇരു പരിപാടികളുടെയും ഔദ്യോഗിക പോസ്റ്റർ പ്രകാശനം പ്രമുഖരുടെ സാന്നിധ്യത്തിൽ നിർവ്വഹിച്ചു.
മ്മടെ തൃശ്ശൂർ ഒഫീഷ്യൽ പ്രസിഡന്റ് അനൂപ് അനിൽദേവൻ അധ്യക്ഷത വഹിച്ച പൊതുയോഗത്തിൽ ജനറൽ സെക്രട്ടറി സുനിൽ ആലുങ്കൽ വാർഷിക പ്രവർത്തന റിപ്പോർട്ടും, ട്രഷറർ രശ്മി രാജേഷ് സാമ്പത്തിക റിപ്പോർട്ടും അവതരിപ്പിച്ചു. വരും വർഷങ്ങളിൽ ജീവകാരുണ്യ പ്രവർത്തനങ്ങൾക്കും സ്പോർട്സ് മേളകൾക്കും കൂടുതൽ പ്രാധാന്യം നൽകുമെന്നും സാംസ്കാരിക പൈതൃകം കാത്തുസൂക്ഷിക്കാൻ സംഘടന മുന്നിൽ നിൽക്കുമെന്നും യോഗം വിലയിരുത്തി.
യോഗത്തിൽ വെച്ച് 2026-2027 വർഷത്തേക്കുള്ള പുതിയ ഭാരവാഹികളുടെ പാനലിനെയും ഐകകണ്ഠ്യേന തിരഞ്ഞെടുത്തു. അനൂപ് അനിൽദേവൻ (പ്രസിഡന്റ്), സുനിൽ ആലുങ്കൽ (ജനറൽ സെക്രട്ടറി), സജിത്ത് ശ്രീധരൻ (ട്രഷറർ) എന്നിവരെ പ്രധാന ഭാരവാഹികളായി വീണ്ടും ചുമതലപ്പെടുത്തി.
മറ്റു ഭാരവാഹികളായി സുധീഷ് കോക്കാട്ട് (സീനിയർ വൈസ് പ്രസിഡന്റ്), ഷഹീർ, അനിൽ അരങ്ങത്ത്, ബിജു ഭാസ്കർ (വൈസ് പ്രസിഡന്റുമാർ), മനീഷ് സദാനന്ദൻ, വിഷ്ണു ആനന്ദ്, റോഷൻ വെണ്ണിക്കൽ (ജോയിന്റ് സെക്രട്ടറിമാർ), രാജേഷ് മാരാത്ത്, രഞ്ജിത്ത് ചന്ദ്രൻ, സുശാന്ത് സുരേന്ദ്രൻ (ജോയിന്റ് ട്രഷറർമാർ) എന്നിവരെയും തിരഞ്ഞെടുത്തു.
കൂടാതെ, സംഘടനയുടെ വിവിധ വിങ്ങുകളുടെ നടത്തിപ്പിനായി ഷാജു പഴയാറ്റിൽ (ഇവന്റ്സ് കൺവീനർ), ശ്രീലക്ഷ്മി രാജു (ആർട്ട് സെക്രട്ടറി), ദീപേഷ് അന്ദേഴത്ത് (സ്പോർട്സ് സെക്രട്ടറി), അക്ബർഷാ (വെൽഫയർ സെക്രട്ടറി) എന്നിവർ ചുമതലയേറ്റു. അഡ്വ. ബക്കർ അലി (ലീഗൽ അഡ്വൈസർ), അജയ് ജോർജ് (മീഡിയ കൺവീനർ), മിനി ഇന്ദുകുമാർ (വനിതാ വേദി കൺവീനർ), അഗ്നി അനിൽ (യൂത്ത് വിംഗ് കൺവീനർ), അനുജ നായർ (യൂത്ത് അംബാസഡർ) എന്നിവരടങ്ങുന്ന പുതിയ എക്സിക്യൂട്ടീവ് കമ്മിറ്റിയെയും, എക്സിക്യൂട്ടീവ് ഡെവലപ്മെന്റ് കമ്മിറ്റിയെയും ജനറൽ ബോഡി യോഗം തിരഞ്ഞെടുത്തു.
ഗൾഫ് മണ്ണിൽ കേരളീയ സംസ്കാരത്തിന്റെ പെരുമ വിളിച്ചോതുന്നതിൽ യുഎഇയിലെ തൃശ്ശൂർ പ്രവാസി കൂട്ടായ്മകൾ എപ്പോഴും സജീവമാണ്. ഇലഞ്ഞിത്തറ മേളത്തിന്റെയും കുടമാറ്റത്തിന്റെയും നാട്ടുവെളിച്ചം പ്രവാസലോകത്ത് പുനഃസൃഷ്ടിക്കുന്ന ‘മ്മടെ തൃശ്ശൂർ പൂരം’, ഗൾഫ് മലയാളികൾക്ക് തങ്ങളുടെ ജന്മനാടിന്റെ സാംസ്കാരിക വേരുകളിലേക്കുള്ള തിരിച്ചുപോക്കാകുന്നു. വരും വർഷങ്ങളിൽ കൂടുതൽ വിപുലമായ ജീവകാരുണ്യ-സാംസ്കാരിക പ്രവർത്തനങ്ങളുമായി മുന്നോട്ട് പോകാനാണ് സംഘടനയുടെ ലക്ഷ്യം.
