ലോകോത്തര ബ്രാൻഡുകൾ കുറഞ്ഞ വിലയിൽ സ്വന്തമാക്കാം; യുഎഇയിലെ പെരുന്നാൾ വിപണികൾ സജീവമാകുന്നു.
ഷാർജ: ബലിപെരുന്നാൾ ആഘോഷങ്ങൾക്കായി യുഎഇ ഒരുങ്ങിക്കഴിഞ്ഞു. പെരുന്നാൾ വിപണികൾ സജീവമാകുന്നതിന്റെ ഭാഗമായി ഷാർജ എക്സ്പോ സെന്ററിൽ വൻ ഡിസ്കൗണ്ടുകളോടെയുള്ള പ്രത്യേക വിപണനമേളയായ ‘ഈദ് അൽ അദ്ഹ’ എക്സിബിഷന് തുടക്കമായി. ലോകോത്തര ബ്രാൻഡുകളുടെ ഉൽപന്നങ്ങൾ ഏറ്റവും കുറഞ്ഞ വിലയിൽ ഉപഭോക്താക്കളിലേക്ക് എത്തിക്കുക എന്ന ലക്ഷ്യത്തോടെ ഷാർജ എക്സ്പോ സെന്ററാണ് മേള സംഘടിപ്പിക്കുന്നത്.
തുണിത്തരങ്ങൾ, പാദരക്ഷകൾ, രാജ്യാന്തര ബ്രാൻഡുകളുടെ സുഗന്ധദ്രവ്യങ്ങൾ, ഹാൻഡ് ബാഗുകൾ തുടങ്ങി പെരുന്നാൾ ആഘോഷങ്ങൾക്ക് മാറ്റുകൂട്ടുന്ന വിപുലമായ ഉൽപന്ന ശേഖരമാണ് മേളയിൽ ഒരുക്കിയിരിക്കുന്നത്. ഈ മാസം 20-ന് ആരംഭിച്ച മേള 31 വരെ നീണ്ടുനിൽക്കും. പെരുന്നാൾ ഷോപ്പിങ്ങിനെത്തുന്ന കുടുംബങ്ങൾക്കായി കുട്ടികളുടെ പ്രത്യേക വിനോദ പരിപാടികളും എക്സിബിഷന്റെ ഭാഗമായി സജ്ജീകരിച്ചിട്ടുണ്ട്.
പ്രവർത്തന സമയം:വെള്ളിയാഴ്ചകളിൽ വൈകിട്ട് 3 മണി മുതൽ രാത്രി 12 മണി വരെയും, ആഴ്ചയിലെ മറ്റ് ദിവസങ്ങളിൽ രാവിലെ 11 മണി മുതൽ രാത്രി 12 മണി വരെയുമാണ് മേളയിലേക്ക് പൊതുജനങ്ങൾക്ക് പ്രവേശനം.
ഷോപ്പിങ് കേവലം ഒരു ക്രയവിക്രയത്തിനപ്പുറം കുടുംബസമേതം ആസ്വദിക്കാനാകുന്ന ഒരു മികച്ച അനുഭവമാക്കി മാറ്റുകയാണ് ലക്ഷ്യമെന്ന് എക്സ്പോ സെന്റർ അധികൃതർ വ്യക്തമാക്കി. മികച്ച ബ്രാൻഡുകൾ ആകർഷകമായ വിലക്കുറവിൽ സ്വന്തമാക്കാനുള്ള ഈ സുവർണ്ണാവസരം പ്രയോജനപ്പെടുത്താൻ മലയാളികൾ ഉൾപ്പെടെ യുഎഇയുടെ വിവിധ ഭാഗങ്ങളിൽ നിന്നുള്ള വലിയൊരു ജനവിഭാഗമാണ് ദിവസേന ഷാർജയിലേക്ക് ഒഴുകിയെത്തുന്നത്.
