ഓസ്ട്രേലിയയിലെ പഠനകാലത്ത് തീവ്രവാദ ആശയങ്ങളിൽ ആകൃഷ്ടനായെന്നും ക്യാപ്റ്റനെ കോക്പിറ്റ് മഴു ഉപയോഗിച്ച് ആക്രമിച്ചെന്നും യുഎഇ പ്രോസിക്യൂഷൻ.
അബുദാബി — ഒക്ടോബർ 11, 2026 : ദുബായിൽ നിന്ന് തെൽ അവീവിലേക്ക് പറന്ന ഫ്ലൈദുബായ് വിമാനം റാഞ്ചി ബെൻ ഗുരിയോൻ വിമാനത്താവള ടെർമിനലിലേക്ക് ഇടിച്ചിറക്കാൻ പദ്ധതിയിട്ടിരുന്നതായി ഒമാൻ സ്വദേശിയായ കോ-പൈലറ്റ് യുഎഇ അന്വേഷണ സംഘത്തിന് മൊഴി നൽകി.
സെപ്റ്റംബർ 30-ന് ദുബായിൽ നിന്ന് ഇസ്രായേലിലേക്ക് പുറപ്പെട്ട FZ1073 വിമാനത്തിൽ വെച്ച് ക്യാപ്റ്റനെ എമർജൻസി കോക്പിറ്റ് മഴു ഉപയോഗിച്ച് വധിക്കാൻ ശ്രമിച്ച 29-കാരനാണ് അന്വേഷണ ഉദ്യോഗസ്ഥർക്ക് മുന്നിൽ നിർണായക വിവരങ്ങൾ വെളിപ്പെടുത്തിയത്. യുഎസ് ഇരട്ടഗോപുര ആക്രമണത്തിൽ നിന്ന് പ്രചോദനം ഉൾക്കൊണ്ടാണ് കൃത്യം ആസൂത്രണം ചെയ്തതെന്ന് ഇയാൾ കുറ്റസമ്മതം നടത്തിയതായി യുഎഇ അറ്റോർണി ജനറൽ ഡോ. ഹമദ് സെയ്ഫ് അൽ ശംസി അറിയിച്ചു. അഭിഭാഷകന്റെ സാന്നിധ്യത്തിൽ നിയമപരമായ നടപടിക്രമങ്ങൾ പാലിച്ചാണ് മൊഴി രേഖപ്പെടുത്തിയത്. താൻ ഒറ്റയ്ക്കാണ് കൃത്യം നടത്തിയതെന്നാണ് ഇയാളുടെ വാദം.
ഓസ്ട്രേലിയയിലെ മെൽബണിൽ വിദ്യാർഥിയായിരുന്ന 2017-ലാണ് തീവ്രവാദ ആശയങ്ങളിലേക്ക് തിരിഞ്ഞതെന്ന് ഇയാൾ മൊഴി നൽകി. ആർ‌എം‌ഐ‌ടി സർവകലാശാലയ്ക്ക് സമീപമുള്ള പ്രാർഥനാ കേന്ദ്രത്തിലും ‘മൈ സെന്റർ’ എന്നറിയപ്പെടുന്ന കേന്ദ്രത്തിലും സന്ദർശനം നടത്തിയിരുന്നതായും പ്രതി പറയുന്നു. എന്നാൽ ഇയാൾ പറഞ്ഞ സംഘടനകൾക്കോ വ്യക്തികൾക്കോ ആക്രമണ പദ്ധതിയിൽ പങ്കുള്ളതായി ഔദ്യോഗികമായി സ്ഥിരീകരിച്ചിട്ടില്ലെന്ന് പ്രോസിക്യൂഷൻ വ്യക്തമാക്കി. വിമാനം ഉപയോഗിച്ച് ആക്രമണം നടത്തുകയെന്ന ലക്ഷ്യത്തോടെയാണ് പ്രതി ഏവിയേഷൻ രംഗം കരിയറായി തിരഞ്ഞെടുത്തത്. ആക്രമണത്തിനുള്ള ശാരീരികക്ഷമതയ്ക്കായി ബോക്സിങ് പരിശീലനവും നേടിയിരുന്നു.
2020 മുതൽ 2024 വരെ ഒമാൻ എയറിലും 2025-ൽ കുറച്ചുകാലം റോയൽ എയർ മറോക്കിലും പ്രവർത്തിച്ച ശേഷമാണ് 2026 ജനുവരിയിൽ ഇയാൾ ഫ്ലൈദുബായിൽ ചേർന്നത്. റിക്രൂട്ട്‌മെന്റ് വേളയിൽ നടത്തിയ സ്വഭാവ സർട്ടിഫിക്കറ്റ് പരിശോധനകളിലോ സുരക്ഷാ പരിശോധനകളിലോ ഇയാൾക്ക് ക്രിമിനൽ പശ്ചാത്തലമുള്ളതായി കണ്ടെത്തിയിരുന്നില്ല. റൂട്ടും വിമാനത്താവളവും മുൻകൂട്ടി നിരീക്ഷിക്കുന്നതിനായി ഇയാൾ നേരത്തെ രണ്ട് തവണ തെൽ അവീവിലേക്ക് സർവീസ് നടത്തിയിരുന്നു. മൂന്നാമത്തെ യാത്രയിലാണ് കൃത്യം നടപ്പാക്കാൻ തുനിഞ്ഞത്.
പറക്കലിനിടെ കോക്പിറ്റ് വാതിൽ തുടർച്ചയായി തുറന്നടയുന്നത് ശ്രദ്ധയിൽപ്പെട്ട മറ്റൊരു ഓഫ്-ഡ്യൂട്ടി പൈലറ്റിന്റെ ഇടപെടലാണ് വൻ ദുരന്തം ഒഴിവാക്കിയത്. എമർജൻസി കോഡ് ഉപയോഗിച്ച് ക്യാപ്റ്റന്റെ ക്യാബിനിൽ പ്രവേശിച്ച ഈ പൈലറ്റ്, ജീവനക്കാരുടെയും യാത്രക്കാരുടെയും സഹായത്തോടെ അക്രമിയെ കീഴടക്കുകയായിരുന്നു. ക്യാപ്റ്റന് തലയ്ക്ക് ഗുരുതരമായി പരിക്കേറ്റതിനെ തുടർന്ന് വിമാനം അടിയന്തരമായി സൗദി അറേബ്യയിലെ തബൂക്ക് വിമാനത്താവളത്തിലേക്ക് തിരിച്ചുവിട്ട് സുരക്ഷിതമായി ഇറക്കി.
വിമാനത്തിലെ വോയ്‌സ് റെക്കോർഡറുകളും മറ്റ് സാങ്കേതിക വിവരങ്ങളും പ്രോസിക്യൂഷൻ വിശദമായി പരിശോധിച്ചു വരികയാണ്. പ്രതിക്ക് ബാഹ്യ സഹായങ്ങൾ ലഭിച്ചിട്ടുണ്ടോയെന്ന അന്വേഷണവും തുടരുകയാണെന്ന് യുഎഇ അധികൃതർ വ്യക്തമാക്കി.
Disclaimer: ഈ വാർത്തയ്ക്കൊപ്പം നൽകിയിട്ടുള്ള ചിത്രം uaevartha.com-ന്റേതല്ല. ഇത് @HamdanMohammed എന്ന X ഹാൻഡിലിൽ നിന്ന് എടുത്തിട്ടുള്ളതും വാർത്താ ആവശ്യങ്ങൾക്കായി മാത്രം ഉപയോഗിച്ചിട്ടുള്ളതുമാണ്.
