യാത്രാമധ്യേയുണ്ടായ അനിഷ്ട സംഭവത്തെ തുടർന്ന് എഫ്‌സെഡ് 1073 വിമാനം തബൂക്കിൽ ലാൻഡ് ചെയ്തു; യാത്രക്കാരും ജീവനക്കാരും സുരക്ഷിതർ.
ദുബായ് — ദുബായിൽ നിന്ന് ഇസ്രായേലിലെ ടെൽ അവീവിലേക്ക് പറക്കുകയായിരുന്ന ഫ്ലൈദുബായ് യാത്രാവിമാനം സാങ്കേതിക-സുരക്ഷാ കാരണങ്ങളാൽ സൗദി അറേബ്യയിലെ തബൂക്ക് വിമാനത്താവളത്തിൽ അടിയന്തരമായി ഇറക്കി. ബുധനാഴ്ച രാവിലെ സർവീസ് നടത്തിയ എഫ്‌സെഡ് 1073 (FZ 1073) വിമാനമാണ് വഴിതിരിച്ചുവിട്ടത്. വിമാനത്തിലുണ്ടായിരുന്ന മുഴുവൻ യാത്രക്കാരും ജീവനക്കാരും പൂർണ്ണ സുരക്ഷിതരാണെന്ന് എയർലൈൻ അധികൃതർ വ്യക്തമാക്കി.
ദുബായ് രാജ്യാന്തര വിമാനത്താവളത്തിൽ നിന്ന് ബെൻ ഗുറിയൻ വിമാനത്താവളത്തിലേക്ക് പോകുകയായിരുന്ന വിമാനം തബൂക്ക് എയർപോർട്ടിൽ സുരക്ഷിതമായി ലാൻഡ് ചെയ്തതായി ഫ്ലൈദുബായ് വക്താവ് അറിയിച്ചു. സംഭവത്തിൽ ബന്ധപ്പെട്ട വ്യോമയാന അധികൃതരുമായി ചേർന്ന് ആവശ്യമായ നടപടികൾ സ്വീകരിച്ചുവരികയാണെന്നും യാത്രക്കാരുടെയും ജീവനക്കാരുടെയും സുരക്ഷയ്ക്കാണ് പ്രഥമ പരിഗണനയെന്നും കമ്പനി കൂട്ടിച്ചേർത്തു.
വിമാനത്തിന്റെ കോക്ക്പിറ്റിൽ പൈലറ്റുമാർ തമ്മിലുണ്ടായ തർക്കമാണ് അടിയന്തര ലാൻഡിങ്ങിലേക്ക് നയിച്ചതെന്ന് ഇസ്രായേൽ വൃത്തങ്ങൾ അറിയിച്ചു. വിമാന റാഞ്ചൽ അല്ലെങ്കിൽ നിയമവിരുദ്ധമായ ഇടപെടലുകൾ സൂചിപ്പിക്കുന്ന ട്രാൻസ്‌പോണ്ടർ കോഡായ 7500 ആണ് വിമാനത്തിൽ നിന്ന് ആദ്യം സിഗ്നൽ നൽകിയത്. തുടർന്ന് തബൂക്കിന് സമീപം എത്തിയപ്പോൾ അടിയന്തര സാഹചര്യം വ്യക്തമാക്കുന്ന ജനറൽ എമർജൻസി കോഡ് 7700 ലേക്ക് മാറ്റുകയും തബൂക്കിൽ ലാൻഡ് ചെയ്യുകയുമായിരുന്നുവെന്ന് ഫ്ലൈറ്റ് റഡാർ വിവരങ്ങൾ വ്യക്തമാക്കുന്നു.
സംഭവത്തെ തുടർന്ന് ഇസ്രായേൽ പ്രതിരോധ സേനയുടെ (IDF) ചീഫ് ഓഫ് സ്റ്റാഫ് ലഫ്റ്റനന്റ് ജനറൽ ഇയാൽ സാമിറിന്റെ നേതൃത്വത്തിൽ ഉന്നതതല യോഗം ചേർന്ന് സ്ഥിതിഗതികൾ വിലയിരുത്തി. എയർഫോഴ്സ് മേധാവി മേജർ ജനറൽ ഒമർ ടിഷ്ലർ, ഇന്റലിജൻസ്-ഓപ്പറേഷൻസ് ഡയറക്ടറേറ്റ് തലവന്മാർ എന്നിവരും യോഗത്തിൽ പങ്കെടുത്തു. കോക്ക്പിറ്റിലെ തർക്കത്തെക്കുറിച്ചുള്ള റിപ്പോർട്ടുകളിൽ ഔദ്യോഗിക പ്രതികരണം വരാനിരിക്കുന്നതേയുള്ളൂ.
