അൽ ഐൻ: അൽ ഐൻ മേഖലയിലെ അടിസ്ഥാനസൗകര്യ, ഗതാഗത, ലോജിസ്റ്റിക്സ് മേഖലകളെ കൂടുതൽ ശക്തിപ്പെടുത്തുന്നതിനുള്ള വികസന-തന്ത്രപ്രധാന പദ്ധതികളുടെ പുരോഗതി യു.എ.ഇ പ്രസിഡന്റ് പ്രതിനിധിയായ ഹിസ് ഹൈനെസ് ഷെയ്ഖ് ഹസ്സ ബിൻ സായിദ് അൽ നഹ്യാൻ വിലയിരുത്തി. അബുദാബി എയർപോർട്സ്, എ.ഡി പോർട്സ് ഗ്രൂപ്പ്, ഇത്തിഹാദ് റെയിൽ എന്നിവയുടെ ഉന്നത പ്രതിനിധി സംഘങ്ങളുമായാണ് അദ്ദേഹം പ്രത്യേക യോഗങ്ങൾ നടത്തിയത്.
അബുദാബി എയർപോർട്സ് സി.ഇ.ഒ അഹമ്മദ് ജുമ അൽ ഷമിസിയുടെ നേതൃത്വത്തിലുള്ള സംഘവുമായി നടത്തിയ കൂടിക്കാഴ്ചയിൽ അൽ ഐൻ ഇന്റർനാഷണൽ എയർപോർട്ടിലെ ഫ്രീസോൺ വികസന പദ്ധതികളും വിമാനത്താവളവുമായി ബന്ധിപ്പിച്ച സമഗ്ര ലോജിസ്റ്റിക്സ് സംവിധാനങ്ങളും ചർച്ചയായി. വ്യോമഗതാഗതവും റെയിൽ ഗതാഗതവും തമ്മിലുള്ള ഏകോപിത കണക്റ്റിവിറ്റി ശക്തിപ്പെടുത്തി അൽ ഐനെ പ്രധാന ഗതാഗത-ലോജിസ്റ്റിക്സ് ഹബ്ബായി ഉയർത്തുകയാണ് ലക്ഷ്യമെന്ന് അധികൃതർ വ്യക്തമാക്കി.
യാത്രക്കാരുടെ എണ്ണം വർധിക്കുന്ന സാഹചര്യത്തിൽ വിമാനത്താവളത്തിന്റെ സൗകര്യങ്ങളും സേവനങ്ങളും വിപുലീകരിക്കുന്നതിനുള്ള പദ്ധതികളും യോഗത്തിൽ അവതരിപ്പിച്ചു. മേഖലയുടെ സാമ്പത്തിക, ടൂറിസം വളർച്ചയ്ക്ക് പിന്തുണ നൽകുന്ന തരത്തിലായിരിക്കും ഭാവി വികസനങ്ങൾ നടപ്പാക്കുകയെന്ന് അധികൃതർ അറിയിച്ചു.
തുടർന്ന് എ.ഡി പോർട്സ് ഗ്രൂപ്പ് മാനേജിങ് ഡയറക്ടറും ഗ്രൂപ്പ് സി.ഇ.ഒയുമായ ക്യാപ്റ്റൻ മുഹമ്മദ് ജുമ അൽ ഷമിസിയുടെ നേതൃത്വത്തിലുള്ള പ്രതിനിധി സംഘത്തെയും ഷെയ്ഖ് ഹസ്സ സ്വീകരിച്ചു. അൽ ഐൻ മേഖലയെ വ്യാവസായിക-സാമ്പത്തിക കേന്ദ്രമായി ശക്തിപ്പെടുത്തുന്നതിനായി എ.ഡി പോർട്സ് ഗ്രൂപ്പും ഖലീഫ ഇക്കണോമിക് സോണ്സ് അബുദാബിയും (കേസാഡ്) നടപ്പാക്കുന്ന പദ്ധതികളുടെ പുരോഗതി അദ്ദേഹം വിലയിരുത്തി.
ഭക്ഷ്യസംസ്ക്കരണം, കാർഷിക സാങ്കേതിക വിദ്യ, പാക്കേജിങ്, ലോജിസ്റ്റിക്സ് തുടങ്ങിയ മേഖലകളിലെ ഭാവി ആവശ്യങ്ങൾ പരിഗണിച്ചുള്ള പുതിയ പദ്ധതികളും യോഗത്തിൽ ചർച്ചയായി. നിക്ഷേപം ആകർഷിക്കുകയും വ്യാവസായിക-സേവന മേഖലകളിലെ മത്സരക്ഷമത ഉയർത്തുകയും ചെയ്യുന്നതിൽ ഈ പദ്ധതികൾ നിർണായകമാകുമെന്ന് വിലയിരുത്തപ്പെട്ടു.
ഇത്തിഹാദ് റെയിൽ സി.ഇ.ഒ ഷാദി മലാക്കിന്റെ നേതൃത്വത്തിലുള്ള സംഘവുമായി നടത്തിയ കൂടിക്കാഴ്ചയിൽ യു.എ.ഇ-ഒമാൻ റെയിൽ ബന്ധപദ്ധതിയുടെ പുതിയ പുരോഗതികളും വിശദമായി അവതരിപ്പിച്ചു. പദ്ധതിയുടെ പ്രധാന പാതയിലുള്ള തന്ത്രപ്രധാന മേഖലയായ അൽ ഐനിൽ നടക്കുന്ന പ്രവർത്തനങ്ങളാണ് പ്രധാനമായും ചർച്ചയായത്.
ഇത്തിഹാദ് റെയിൽ, ഒമാൻ റെയിൽ, മുബദാല ഇൻവെസ്റ്റ്മെന്റ് കമ്പനി എന്നിവയുടെ സംയുക്ത സംരംഭമായ ഹഫീത് റെയിലിന്റെ നേതൃത്വത്തിൽ നടപ്പാക്കുന്ന പദ്ധതി നിലവിൽ 40 ശതമാനം പൂർത്തിയായതായി അധികൃതർ അറിയിച്ചു. ഭാവിയിൽ യാത്രക്കാരുടെയും ചരക്കുഗതാഗതത്തിന്റെയും റെയിൽ സേവനങ്ങൾ വ്യാപിപ്പിക്കുന്നതിനുള്ള പദ്ധതികളും യോഗത്തിൽ വിശദീകരിച്ചു.
അടിസ്ഥാനസൗകര്യ, ഗതാഗത, ലോജിസ്റ്റിക്സ് മേഖലകളുടെ സമഗ്ര വികസനം അൽ ഐൻ മേഖലയെ കൂടുതൽ മത്സരക്ഷമമാക്കുമെന്നും രാജ്യത്തിന്റെ സുസ്ഥിര സാമ്പത്തിക വളർച്ചയ്ക്ക് ഇത് നിർണായക പിന്തുണയാകുമെന്നും ഷെയ്ഖ് ഹസ്സ ബിൻ സായിദ് അഭിപ്രായപ്പെട്ടു. യു.എ.ഇയെ ആഗോള വ്യാപാര-ലോജിസ്റ്റിക്സ് കേന്ദ്രമായി ശക്തിപ്പെടുത്തുന്നതിലും ഈ പദ്ധതികൾക്ക് വലിയ പങ്കുണ്ടാകുമെന്ന് അദ്ദേഹം കൂട്ടിച്ചേർത്തു.
തന്ത്രപ്രധാന പദ്ധതികൾ കാര്യക്ഷമമായും ഉയർന്ന നിലവാരത്തിലും നടപ്പാക്കുന്ന ദേശീയ പ്രതിഭകളുടെയും വിവിധ ഏജൻസികളിലെ പ്രവർത്തക സംഘങ്ങളുടെയും സേവനങ്ങളെ അദ്ദേഹം അഭിനന്ദിക്കുകയും ചെയ്തു. അൽ ഐൻ മേഖലയിലെ ജനങ്ങളുടെ ജീവിത നിലവാരം ഉയർത്തുന്നതിലും ഈ വികസന പദ്ധതികൾ വലിയ സ്വാധീനം ചെലുത്തുമെന്ന് അദ്ദേഹം വ്യക്തമാക്കി.
ഷെയ്ഖ് മുഹമ്മദ് ബിൻ ഹംദാൻ ബിൻ സായിദ് അൽ നഹ്യാനും അബുദാബി എയർപോർട്സ്, എ.ഡി പോർട്സ് ഗ്രൂപ്പ്, ഇത്തിഹാദ് റെയിൽ എന്നിവയിലെ വിവിധ ഉന്നത ഉദ്യോഗസ്ഥരും യോഗങ്ങളിൽ പങ്കെടുത്തു.
