പ്രായമായവരുടെ എണ്ണം കുതിച്ചുയരുന്നു: ആഗോള ആരോഗ

യുഎഇ ആരോഗ്യ–രോഗപ്രതിരോധ മന്ത്രാലയത്തിന്റെ രക്ഷാകർതൃത്വത്തിൽ നടക്കുന്ന ‘ഡബ്ല്യുഎച്ച്എക്സ് ലീഡേഴ്സ് 2027’ സമ്മേളനം ജനുവരി 26-ന് ദുബായ് വേൾഡ് ട്രേഡ് സെന്ററിൽ അരങ്ങേറും.

ദുബായ് — ലോകമെമ്പാടും പ്രായമായവരുടെ ജനസംഖ്യയിലുണ്ടാകുന്ന വൻ വർധനവും ജീവിതശൈലീ രോഗങ്ങൾ ഉയർത്തുന്ന സാമ്പത്തിക ബാധ്യതകളും നേരിടാൻ ആഗോള നയരൂപീകരണ വിദഗ്ധരും മന്ത്രിമാരും ദുബായിൽ ഒത്തുചേരുന്നു. യുഎഇ ആരോഗ്യ–രോഗപ്രതിരോധ മന്ത്രാലയത്തിന്റെ (MOHAP) രക്ഷാകർതൃത്വത്തിൽ സംഘടിപ്പിക്കുന്ന അന്താരാഷ്ട്ര മന്ത്രിതല ഉച്ചകോടി ‘ഡബ്ല്യുഎച്ച്എക്സ് ലീഡേഴ്സ് 2027’ (WHX Leaders 2027) ജനുവരി 26-ന് ദുബായ് വേൾഡ് ട്രേഡ് സെന്ററിൽ നടക്കും.

2027 ജനുവരി 25 മുതൽ 28 വരെ നടക്കുന്ന ‘വേൾഡ് ഹെൽത്ത്‌കെയർ വീക്കി’ന്റെ പ്രധാന നേതൃത്വ സംഗമമാണിത്. ‘ഹെൽത്ത് 2050’ എന്ന പ്രമേയത്തിൽ ഊന്നിയ ചർച്ചകളിൽ വിവിധ രാജ്യങ്ങളിലെ ആരോഗ്യ മന്ത്രിമാർ, അന്താരാഷ്ട്ര ആരോഗ്യ സംഘടനകളുടെ പ്രതിനിധികൾ, നിക്ഷേപകർ എന്നിവർ പങ്കെടുക്കും.

ജനസംഖ്യാ ഘടനയിലുണ്ടാകുന്ന ദ്രുതഗതിയിലുള്ള മാറ്റങ്ങൾ ലോകത്തെ പല പൊതുജനാരോഗ്യ സംവിധാനങ്ങളെയും കടുത്ത സമ്മർദ്ദത്തിലാക്കുന്നുണ്ട്. ലോകാരോഗ്യ സംഘടനയുടെ (WHO) കണക്കുകൾ പ്രകാരം 2019-ൽ 100 കോടിയായിരുന്ന 60 വയസ്സിന് മുകളിലുള്ളവരുടെ എണ്ണം 2050-ഓടെ ഇരട്ടിയിലധികമായി വർധിച്ച് 210 കോടിയിലെത്തും.

യുഎഇ ഉൾപ്പെടെയുള്ള ഗൾഫ് മേഖലയിൽ ഈ മാറ്റത്തിന്റെ ആക്കം വളരെ കൂടുതലാണ്. യുഎൻ പോപ്പുലേഷൻ ഫണ്ടിന്റെ (UNFPA) റിപ്പോർട്ട് അനുസരിച്ച്, യുഎഇയിൽ 60 വയസ്സിന് മുകളിലുള്ളവരുടെ എണ്ണം 2020 നും 2050 നും ഇടയിൽ ആറ് മടങ്ങിലധികം വർധിക്കും. 2020-ൽ രാജ്യത്തെ ജനസംഖ്യയുടെ 3.1 ശതമാനം (ഏകദേശം 3.11 ലക്ഷം പേർ) മാത്രമായിരുന്ന മുതിർന്ന പൗരന്മാർ, 2050-ഓടെ ആകെ ജനസംഖ്യയുടെ 19.7 ശതമാനമായി (ഏകദേശം 20 ലക്ഷം) ഉയരുമെന്നാണ് വിലയിരുത്തൽ.

ദീർഘകാല ചികിത്സാ ചെലവുകൾ വർധിക്കുന്നതും ഭാവി പകർച്ചവ്യാധി ഭീഷണികളും സർക്കാരുകളുടെ ആരോഗ്യ ബജറ്റുകളിൽ വലിയ വെല്ലുവിളിയാണ് ഉയർത്തുന്നത്. ഈ പ്രതിസന്ധി മുൻകൂട്ടി കണ്ട് യുഎഇ ഇതിനകം നയപരമായ മുൻകരുതലുകൾ സ്വീകരിച്ചിട്ടുണ്ട്. ദുബായ് ഇക്കണോമിക് അജണ്ട (D33), ദുബായ് സോഷ്യൽ അജണ്ട 33 എന്നിവയുടെ ഭാഗമായി രൂപീകരിച്ച ‘ദുബായ് ലോംഗ്വിറ്റി അതോറിറ്റി’ പ്രതിരോധ ചികിത്സകൾക്കും ആരോഗ്യകരമായ വാർധക്യ സംരക്ഷണത്തിനുമായി പ്രത്യേക ചട്ടക്കൂട് ഒരുക്കുന്നു. ഫെഡറൽ തലത്തിൽ ‘നാഷണൽ സ്ട്രാറ്റജി ഫോർ വെൽബീയിംഗ് 2031’, ‘യുഎഇ ശതാബ്ദി 2071’ എന്നിവയിലൂടെ സമഗ്ര ആരോഗ്യ സുരക്ഷ രാജ്യത്തിന്റെ സാമ്പത്തിക ലക്ഷ്യങ്ങളുമായി സംയോജിപ്പിച്ചിരിക്കുന്നു.

രണ്ട് സുപ്രധാന വിഷയങ്ങളിലാണ് ഉച്ചകോടി ശ്രദ്ധ കേന്ദ്രീകരിക്കുന്നത്:

സുരക്ഷിത രാജ്യങ്ങൾ (Resilient Nations): പകർച്ചവ്യാധി പ്രതിരോധം, സുസ്ഥിര ആരോഗ്യ ധനസഹായം, മുൻകൂർ രോഗനിർണയ സംവിധാനങ്ങൾ, അവശ്യ മരുന്നുകളുടെ ലഭ്യത ഉറപ്പാക്കൽ.
സമ്പന്നമായ ജീവിതം (Thriving Lives): പ്രിസിഷൻ മെഡിസിൻ, പ്രാരംഭ ഘട്ട രോഗനിർണയം, ജീവിതശൈലീ രോഗങ്ങളുടെ നിയന്ത്രണം, ആരോഗ്യകരമായ വാർധക്യം ഉറപ്പാക്കൽ.

ആശുപത്രി കിടക്കകൾ വർധിപ്പിക്കുന്നതിനേക്കാൾ ഉപരി, രോഗങ്ങൾ വരാതെ തടയുന്ന നൂതന നയങ്ങളിലേക്ക് ലോകം മാറണമെന്ന് റീജിയണൽ ഹെൽത്ത്‌കെയർ രംഗത്തെ വിദഗ്ധർ ചൂണ്ടിക്കാട്ടുന്നു. ജനോമിക്സ്, നിർമ്മിത ബുദ്ധി (AI) തുടങ്ങിയ സാങ്കേതികവിദ്യകൾ വികസ്വര രാജ്യങ്ങൾക്ക് കുറഞ്ഞ ചെലവിൽ രോഗപ്രതിരോധ മാതൃകകൾ നിർമ്മിക്കാൻ അവസരമൊരുക്കുമെന്ന് വിദഗ്ധർ വ്യക്തമാക്കുന്നു.

വേൾഡ് ഹെൽത്ത് എക്സ്പോ (പഴയ അറബ് ഹെൽത്ത്), ഡിജിറ്റൽ ഹെൽത്ത് ഇന്നൊവേഷൻ വേദിയായ ഡബ്ല്യുഎച്ച്എക്സ് ടെക്, മന്ത്രിതല ഉച്ചകോടിയായ ഡബ്ല്യുഎച്ച്എക്സ് ലീഡേഴ്സ് എന്നിവ ചേർന്നാണ് 2027 ജനുവരിയിൽ ദുബായിൽ വേൾഡ് ഹെൽത്ത്‌കെയർ വീക്ക് സംഘടിപ്പിക്കുന്നത്.