ദുബൈ: ഇന്ത്യയുടെ ചരിത്രത്തിൽ ഏറ്റവും കൂടുതൽ കാലം തുടർച്ചയായി അധികാരത്തിലിരുന്ന പ്രധാനമന്ത്രിയെന്ന നേട്ടം കൈവരിച്ച നരേന്ദ്ര മോദിയെ അഭിനന്ദിച്ച് യു.എ.ഇ പ്രസിഡന്റ് ശൈഖ് മുഹമ്മദ് ബിൻ സായിദ് ആൽ നഹ്‌യാൻ. സമൂഹമാധ്യമമായ ‘എക്‌സ്’ വഴി പങ്കുവെച്ച സന്ദേശത്തിലാണ് അദ്ദേഹം മോദിക്ക് ആശംസകൾ നേർന്നത്.
ജൂൺ 10-ന് പ്രധാനമന്ത്രി പദത്തിൽ തുടർച്ചയായി 4,399 ദിവസം പൂർത്തിയാക്കിയതോടെയാണ് നരേന്ദ്ര മോദി ഈ ചരിത്രനേട്ടം സ്വന്തമാക്കിയത്. ഇതോടെ ഇന്ത്യയുടെ ആദ്യ പ്രധാനമന്ത്രിയായ ജവഹർലാൽ നെഹ്‌റുവിന്റെ 4,398 ദിവസത്തെ റെക്കോർഡാണ് അദ്ദേഹം മറികടന്നത്.
എക്‌സിൽ ഹിന്ദിയിൽ പങ്കുവെച്ച സന്ദേശത്തിൽ, “ആധുനിക ഇന്ത്യയുടെ ചരിത്രത്തിൽ ഏറ്റവും കൂടുതൽ കാലം തുടർച്ചയായി തെരഞ്ഞെടുക്കപ്പെട്ട ഭരണത്തലവൻ എന്ന റെക്കോർഡ് സ്വന്തമാക്കിയ എന്റെ സുഹൃത്ത് നരേന്ദ്ര മോദിക്ക് അഭിനന്ദനങ്ങൾ” എന്ന് ശൈഖ് മുഹമ്മദ് കുറിച്ചു.
രാജ്യത്തെയും ജനങ്ങളെയും കൂടുതൽ പുരോഗതിയുടെയും വികസനത്തിന്റെയും പാതയിലേക്ക് നയിക്കാൻ മോദിക്ക് സാധിക്കട്ടെയെന്നും അദ്ദേഹം ആശംസിച്ചു. ഇന്ത്യയുടെ നാഗരികവും സാംസ്കാരികവുമായ വളർച്ചയിൽ മോദിയുടെ നേതൃത്വത്തിന് നിർണായക പങ്കുണ്ടാകുമെന്ന് പ്രതീക്ഷിക്കുന്നതായും അദ്ദേഹം വ്യക്തമാക്കി.
ഇന്ത്യയും യു.എ.ഇയും തമ്മിലുള്ള ബന്ധം സമീപ വർഷങ്ങളിൽ ഗണ്യമായ വളർച്ച കൈവരിച്ചതായും ശൈഖ് മുഹമ്മദ് ചൂണ്ടിക്കാട്ടി. ഇരു രാജ്യങ്ങളുടെയും ജനങ്ങളുടെ പുരോഗതിക്കും സാമ്പത്തിക വളർച്ചക്കും വേണ്ടിയുള്ള സംയുക്ത ശ്രമങ്ങളാണ് ഈ മാറ്റത്തിന് കാരണമായതെന്ന് അദ്ദേഹം അഭിപ്രായപ്പെട്ടു.
സമഗ്ര നയതന്ത്ര പങ്കാളിത്തത്തിന്റെ അടിസ്ഥാനത്തിൽ ഇന്ത്യ-യു.എ.ഇ ഉഭയകക്ഷി ബന്ധം വരും വർഷങ്ങളിലും കൂടുതൽ ശക്തിപ്പെടുമെന്നും വികസിക്കുമെന്നും തനിക്ക് പൂർണ വിശ്വാസമുണ്ടെന്ന് ശൈഖ് മുഹമ്മദ് തന്റെ സന്ദേശത്തിൽ വ്യക്തമാക്കി.
2014 മെയ് 26-നാണ് നരേന്ദ്ര മോദി ആദ്യമായി ഇന്ത്യയുടെ പ്രധാനമന്ത്രിയായി അധികാരമേൽക്കുന്നത്. തുടർന്ന് 2019-ലും 2024-ലും നടന്ന ലോക്‌സഭാ തെരഞ്ഞെടുപ്പുകളിലും വിജയിച്ച് തുടർച്ചയായി മൂന്നാം തവണയും അദ്ദേഹം പ്രധാനമന്ത്രി പദത്തിലെത്തി. ഇതോടെയാണ് ഇന്ത്യയുടെ ചരിത്രത്തിൽ ഏറ്റവും കൂടുതൽ കാലം തുടർച്ചയായി തെരഞ്ഞെടുക്കപ്പെട്ട ഭരണത്തലവൻ എന്ന നേട്ടവും മോദി സ്വന്തമാക്കിയത്.
