സാങ്കേതികവിദ്യയും സുസ്ഥിര വികസനവും മുൻനിർത്തിയുള്ള 33-ാമത് എഡിഷൻ ദുബായ് വേൾഡ് ട്രേഡ് സെന്ററിൽ തുടരുന്നു
ദുബായ്, സെപ്റ്റംബർ 14, 2026 : ആഗോള വിനോദസഞ്ചാര-യാത്രാ മേഖലയുടെ ഭാവി രൂപപ്പെടുത്തുന്നതിൽ ദുബായിക്കുള്ള മുൻനിര പങ്കിടിവരയിട്ട് യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂം അറേബ്യൻ ട്രാവൽ മാർക്കറ്റ് (എടിഎം) 2026 പ്രദർശന നഗരി സന്ദർശിച്ചു.
ദുബായ് വേൾഡ് ട്രേഡ് സെന്ററിൽ നടക്കുന്ന മേളയുടെ 33-ാമത് പതിപ്പിൽ ദുബായ് രണ്ടാം ഉപഭരണാധികാരി ശൈഖ് അഹമ്മദ് ബിൻ മുഹമ്മദ് ബിൻ റാഷിദ് അൽ മക്തൂമും ഉന്നത ഉദ്യോഗസ്ഥരും ശൈഖ് മുഹമ്മദിനൊപ്പമുണ്ടായിരുന്നു. സെപ്റ്റംബർ 17 വരെയാണ് മേള നടക്കുന്നത്.
മേളയിലെ പ്രധാന പവലിയനുകളിലൂടെ സഞ്ചരിച്ച ശൈഖ് മുഹമ്മദ്, പ്രദർശകരുമായി സംവദിക്കുകയും പുത്തൻ സേവനങ്ങളും സാങ്കേതിക മുന്നേറ്റങ്ങളും വിലയിരുത്തുകയും ചെയ്തു. ഈ വർഷത്തെ പ്രദർശനത്തിന്റെ പ്രധാന സവിശേഷതകളും ആഗോള പങ്കാളിത്തവും സംബന്ധിച്ച് ദുബായ് ഡിപ്പാർട്ട്മെന്റ് ഓഫ് ഇക്കോണമി ആൻഡ് ടൂറിസം ഡയറക്ടർ ജനറലും ഡിഡബ്ല്യുടിസി അതോറിറ്റി ഡയറക്ടർ ജനറലുമായ ഹിലാൽ സഈദ് അൽമർറി ശൈഖ് മുഹമ്മദിന് വിശദീകരിച്ചു നൽകി.
തുറന്ന സാമ്പത്തിക നയങ്ങൾ, നവീന ആശയങ്ങൾ, മികച്ച വിനോദസഞ്ചാര അനുഭവങ്ങൾ എന്നിവയിലൂടെ യുഎഇയും ദുബായിയും ഈ മേഖലയുടെ ആഗോള കേന്ദ്രമായി സ്ഥാനം ഉറപ്പിച്ചുവരികയാണെന്ന് ശൈഖ് മുഹമ്മദ് വ്യക്തമാക്കി. അന്താരാഷ്ട്ര തലത്തിലുള്ള വൻ പങ്കാളിത്തം ദുബായിലുള്ള ആഗോള നിക്ഷേപക വിശ്വാസത്തിന്റെ തെളിവാണെന്നും അദ്ദേഹം കൂട്ടിച്ചേർത്തു.
ഖത്തർ എയർവേസ്, ഇത്തിഹാദ് എയർവേസ്, കുവൈത്ത് എയർവേസ് എന്നീ എയർലൈൻ പവലിയനുകളും ബഹ്റൈൻ, ഖത്തർ, അബുദാബി, സ്പെയിൻ തുടങ്ങിയ രാജ്യങ്ങളുടെയും നഗരങ്ങളുടെയും ടൂറിസം സ്റ്റാളുകളും ശൈഖ് മുഹമ്മദ് സന്ദർശിച്ചു. കൂടാതെ യുഎഇ സാമ്പത്തിക-ടൂറിസം മന്ത്രാലയത്തിന്റെയും ദുബായ് ഡിപ്പാർട്ട്മെന്റ് ഓഫ് ഇക്കോണമി ആൻഡ് ടൂറിസത്തിന്റെയും പവലിയനുകളിലെത്തി പ്രവർത്തനങ്ങൾ വിലയിരുത്തി.
മാരിയറ്റ് ബോൺവോയ്, ഐഎച്ച്ജി ഹോട്ടൽസ് & റിസോർട്ട്സ്, മൈനർ ഹോട്ടൽസ്, സ്റ്റോറി ഹോസ്പിറ്റാലിറ്റി തുടങ്ങിയ ആഗോള ഹോസ്പിറ്റാലിറ്റി ഗ്രൂപ്പുകളുടെ സ്റ്റാളുകളിലും ഭരണാധികാരി എത്തി. നിർമ്മിതബുദ്ധി (എഐ), ഡിജിറ്റൽ പരിവർത്തനം, സുസ്ഥിര വിനോദസഞ്ചാരം, സ്മാർട്ട് മൊബിലിറ്റി എന്നിവ അടിസ്ഥാനമാക്കിയുള്ള നൂതന പദ്ധതികൾ കമ്പനി പ്രതിനിധികൾ വിശദീകരിച്ചു.
‘ട്രാവൽ 2040: ഇന്നൊവേഷനിലൂടെയും സാങ്കേതികവിദ്യയിലൂടെയും പുതിയ ചക്രവാളങ്ങൾ’ എന്ന പ്രമേയത്തിലാണ് ഇത്തവണത്തെ എടിഎം നടക്കുന്നത്. നാല് ദിവസം നീളുന്ന സംഗമത്തിൽ വ്യോമയാനം, ഹോസ്പിറ്റാലിറ്റി, ട്രാവൽ ടെക്നോളജി രംഗങ്ങളിലെ ആഗോള വിദഗ്ധരും മന്ത്രിമാരും പങ്കെടുക്കുന്ന സെമിനാറുകളും പാനൽ ചർച്ചകളും നടക്കുന്നുണ്ട്.
