ദുബായ്: എമിറേറ്റിലെ ഏറ്റവും പ്രധാനപ്പെട്ട ജലമുഖ വിനോദസഞ്ചാര കേന്ദ്രങ്ങളിലൊന്നായ ദുബായ് ഹാർബറിലേക്കുള്ള യാത്ര കൂടുതൽ സുഗമമാക്കുന്ന വമ്പൻ പാലം നിർമ്മാണത്തിന്റെ 65 ശതമാനം ജോലികളും പൂർത്തിയായതായി റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (RTA) അറിയിച്ചു. ഷെയ്ഖ് സായിദ് റോഡിൽ നിന്ന് ദുബായ് ഹാർബറിലേക്ക് നേരിട്ടുള്ള പ്രവേശനം നൽകുന്ന ഈ പാലം യാഥാർത്ഥ്യമാകുന്നതോടെ, നിലവിൽ 12 മിനിറ്റ് എടുക്കുന്ന യാത്രാസമയം വെറും 3 മിനിറ്റായി ചുരുങ്ങും. ഷമൽ ഹോൾഡിംഗുമായി (Shamal Holding) സഹകരിച്ചാണ് ആർടിഎ ഈ വികസന പദ്ധതി നടപ്പിലാക്കുന്നത്.
ഏകദേശം 1,500 മീറ്റർ നീളമുള്ള ഈ പാലത്തിൽ ഓരോ ദിശയിലേക്കും രണ്ട് വരി പാതകൾ വീതമാണ് ഉള്ളത്. മണിക്കൂറിൽ 6,000 വാഹനങ്ങളെ ഉൾക്കൊള്ളാൻ ശേഷിയുള്ള ഈ പാലം ഷെയ്ഖ് സായിദ് റോഡിലെ അഞ്ചാം ഇന്റർചേഞ്ചിൽ നിന്നാണ് ആരംഭിക്കുന്നത്. അമേരിക്കൻ യൂണിവേഴ്സിറ്റിക്ക് സമീപം തുടങ്ങി അൽ നസീം സ്ട്രീറ്റ്, അൽ ഫലക് സ്ട്രീറ്റ് എന്നിവ കടന്ന് കിംഗ് സൽമാൻ ബിൻ അബ്ദുൽ അസീസ് അൽ സൗദ് സ്ട്രീറ്റിലൂടെ ദുബായ് ഹാർബറിലേക്ക് ഇത് ബന്ധിപ്പിക്കുന്നു. പാലം നിർമ്മാണത്തോടൊപ്പം തന്നെ ഈ റൂട്ടിലെ നാല് പ്രധാന ജംഗ്ഷനുകളിൽ ഗതാഗത ക്രമീകരണ ജോലികളും പുരോഗമിക്കുകയാണ്.
ദുബായിലെ അതിവേഗ നഗര വികസനത്തിനും സാമ്പത്തിക വളർച്ചയ്ക്കും പിന്തുണ നൽകുന്ന സംയോജിത അടിസ്ഥാന സൗകര്യങ്ങൾ വികസിപ്പിക്കുക എന്ന ഭരണകൂടത്തിന്റെ കാഴ്ചപ്പാടാണ് ഈ പദ്ധതിയെന്ന് ആർടിഎ ഡയറക്ടർ ജനറൽ മത്തർ അൽ തായർ പറഞ്ഞു. നിലവിൽ പദ്ധതി പ്രദേശത്തെ സേവന ലൈനുകളുടെ മാറ്റം ഉൾപ്പെടെയുള്ള അനുബന്ധ ജോലികൾ 90 ശതമാനവും പൂർത്തിയായിട്ടുണ്ട്. ഗതാഗത തടസ്സമില്ലാതെ നിർമ്മാണം തുടരാൻ ആവശ്യമായ ഡൈവേർഷനുകൾ ഒരുക്കിയിട്ടുണ്ടെന്നും ഈ വർഷം മൂന്നാം പാദത്തോടെ പാലം പൂർണ്ണമായും ഗതാഗതത്തിന് തുറന്നു കൊടുക്കാൻ സാധിക്കുമെന്നും അദ്ദേഹം കൂട്ടിച്ചേർത്തു.
മിഡിൽ ഈസ്റ്റിലെ തന്നെ ഏറ്റവും വലിയ യാച്ച് മറീനകൾ സ്ഥിതി ചെയ്യുന്ന ദുബായ് ഹാർബറിന്റെ പ്രാധാന്യം വർദ്ധിപ്പിക്കുന്നതാണ് ഈ പാലമെന്ന് ഷമൽ ഹോൾഡിംഗ് സിഇഒ അബ്ദുള്ള ബിൻഹബ്തൂർ അഭിപ്രായപ്പെട്ടു. ബ്ലൂവാട്ടേഴ്‌സ് ഐലൻഡിനും പാം ജുമൈറയ്ക്കും ഇടയിലുള്ള ഈ പ്രദേശം താമസക്കാർക്കും സന്ദർശകർക്കും ഒരുപോലെ പ്രിയപ്പെട്ട ഇടമാണ്. നിലവിൽ 24 ടവറുകളിലായി 7,500 ഓളം അപ്പാർട്ട്‌മെന്റുകൾ ഇവിടെ നിർമ്മാണത്തിലാണ്. പുതിയ പാലം വരുന്നതോടെ ഹാർബറിലെ താമസക്കാർക്കും വിനോദസഞ്ചാരികൾക്കും ഷെയ്ഖ് സായിദ് റോഡിലേക്ക് നേരിട്ട് പ്രവേശിക്കാനാകുന്നത് ജീവിതനിലവാരം മെച്ചപ്പെടുത്താൻ സഹായിക്കും.
