ത്രിഡി പ്രിന്റഡ് സർജിക്കൽ ഗൈഡുകൾ ഉപയോഗിച്ച് കൗമാരക്കാരുടെ നട്ടെല്ലിലെ വൈകല്യങ്ങൾ വിജയകരമായി പരിഹരിച്ചു.
ദുബായ്, ഓഗസ്റ്റ് 6, 2026:ദുബായ് മെഡ്കെയർ ഓർത്തോപീഡിക്സ് ആൻഡ് സ്പൈൻ ആശുപത്രിയിൽ അത്യാധുനിക ത്രിഡി പ്രിന്റഡ് സർജിക്കൽ ഗൈഡുകൾ ഉപയോഗിച്ച് സങ്കീർണ്ണമായ നട്ടെല്ല് ശസ്ത്രക്രിയകൾ വിജയകരമായി പൂർത്തിയാക്കി. പുതിയ സാങ്കേതികവിദ്യയിലൂടെ ശസ്ത്രക്രിയാ സമയം പകുതിയിലധികമായി കുറയ്ക്കാനും ഉപകരണങ്ങൾ കൃത്യമായി ഘടിപ്പിക്കുന്നതിലെ പിഴവുകൾ രണ്ട് ശതമാനത്തിൽ താഴെയായി പരിവൃതമാക്കാനും സാധിച്ചു.
ഗുരുതരമായ സ്കോളിയോസിസ് (നട്ടെല്ലിന്റെ വളവ്) ബാധിച്ച 14, 15, 17 വയസ്സുള്ള മൂന്ന് കൗമാരക്കാരിലാണ് ഈ അത്യാധുനിക ചികിത്സാരീതി വിജയകരമായി പ്രയോഗിച്ചത്. സാധാരണയായി 8 മുതൽ 10 മണിക്കൂർ വരെ നീളുന്ന ഇത്തരം സങ്കീർണ്ണ ശസ്ത്രക്രിയകൾ കേവലം നാല് മണിക്കൂറിനുള്ളിൽ പൂർത്തിയാക്കാൻ ഡോക്ടർമാർക്ക് കഴിഞ്ഞു.
ശസ്ത്രക്രിയയ്ക്ക് മുൻപ് തന്നെ രോഗിയുടെ നട്ടെല്ലിന്റെ ഘടന ഡിജിറ്റൽ സാങ്കേതികവിദ്യയിലൂടെ അപഗ്രഥിച്ച്, ഓരോ വ്യക്തിക്കും അനുയോജ്യമായ ത്രിഡി ഗൈഡുകൾ നിർമ്മിക്കുകയാണ് ഈ രീതിയിൽ ചെയ്യുന്നത്. ഇത് ശസ്ത്രക്രിയാ സമയത്ത് അസ്ഥികളിൽ കൃത്യമായ സ്ഥാനത്ത് ഉപകരണങ്ങൾ ഘടിപ്പിക്കാൻ സഹായിക്കുന്നു.
“ശസ്ത്രക്രിയയ്ക്ക് മുന്നോടിയായി രോഗിയുടെ നട്ടെല്ലിന്റെ മാതൃകയിൽ ഒരു വെർച്വൽ ശസ്ത്രക്രിയ നടത്തി കൃത്യത ഉറപ്പുവരുത്താൻ ഈ സാങ്കേതികവിദ്യ സഹായിക്കുന്നു,” എന്ന് മെഡ്കെയറിലെ കൺസൾട്ടന്റ് ഓർത്തോപീഡിക് ആൻഡ് സ്പൈൻ സർജനും എഒ സ്പൈൻ മിഡിൽ ഈസ്റ്റ് മേധാവിയുമായ ഡോ. സമീഹ് അബുൽഫുതൂഹ് പറഞ്ഞു. നട്ടെല്ലിന് കഠിനമായ വളവുള്ള 17 വയസ്സുകാരന്റെ ശസ്ത്രക്രിയ നാല് മണിക്കൂറിനുള്ളിൽ പാർശ്വഫലങ്ങളൊന്നുമില്ലാതെ പൂർത്തിയാക്കാൻ സാധിച്ചതായും അദ്ദേഹം വ്യക്തമാക്കി.
ശസ്ത്രക്രിയയിലുണ്ടാകുന്ന രക്തനഷ്ടം 400 മില്ലിലിറ്ററിൽ താഴെയായി കുറയ്ക്കാൻ ഇതിലൂടെ സാധിച്ചു. ഇത് രോഗികൾക്ക് രക്തം നൽകേണ്ട സാഹചര്യം ഒഴിവാക്കുകയും വേഗത്തിൽ സുഖം പ്രാപിക്കാൻ സഹായിക്കുകയും ചെയ്യുന്നു.
രോഗികൾക്ക് കൂടുതൽ സുരക്ഷിതവും ഫലപ്രദവുമായ ചികിത്സ ലഭ്യമാക്കാൻ ഇത്തരം സാങ്കേതികവിദ്യകൾ സഹായിക്കുമെന്ന് മെഡ്കെയർ മെഡിക്കൽ ഡയറക്ടറും ഓർത്തോപീഡിക്സ് വിഭാഗം മേധാവിയുമായ ഡോ. അസാം ഫയ്യാദ് വ്യക്തമാക്കി. യുഎഇയുടെ ആരോഗ്യമേഖലയിലെ വളർച്ചയ്ക്കും മുൻനിര വൈദ്യശാസ്ത്ര മുന്നേറ്റങ്ങൾക്കും അടിവരയിടുന്നതാണ് ഈ നേട്ടം.
