കിങ് ഖാലിദ് വിമാനത്താവളത്തിലെ 45 ശതമാനത്തോളം സർവീസുകളെ ബാധിച്ചു; സൗദിയ, എയർ ഇന്ത്യ വിമാനങ്ങൾ നിലച്ചു
റിയാദ് : യെമനിൽനിന്നുണ്ടായ വ്യോമാക്രമണങ്ങളെ തുടർന്ന് സൗദി അറേബ്യയിലെ വിമാനത്താവളങ്ങളുടെ പ്രവർത്തനം താളംതെറ്റി. തലസ്ഥാനമായ റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിൽ നിന്നും തിരിച്ചുമുള്ള നൂറുകണക്കിന് സർവീസുകൾ വിമാനക്കമ്പനികൾ റദ്ദാക്കി.
റിയാദിലെ പ്രധാന വിമാനത്താവളത്തിനും തെക്കുപടിഞ്ഞാറൻ നഗരമായ അബഹയിലെ വിമാനത്താവളത്തിനും നേരെയുണ്ടായ ആക്രമണങ്ങളിൽ മൂന്ന് പേർ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തിട്ടുണ്ട്. വ്യോമാതിർത്തിയിലെ സുരക്ഷാ ഭീഷണിയെ തുടർന്ന് റൺവേ പ്രവർത്തനങ്ങൾ പലതവണ നിർത്തിവെക്കേണ്ടി വന്നതാണ് യാത്രാദുരിതം ഇരട്ടിയാക്കിയത്.
വ്യാഴാഴ്ച വൈകുന്നേരത്തോടെ റിയാദിൽ നിന്ന് പുറപ്പെടേണ്ടിയിരുന്ന 378 വിമാനങ്ങളിൽ 169 എണ്ണവും (ഏകദേശം 45 ശതമാനം) റദ്ദാക്കുകയോ തടസ്സപ്പെടുകയോ ചെയ്തതായി ഏവിയേഷൻ ഡാറ്റാ ഏജൻസിയായ ‘സിറിയം’ (Cirium) വ്യക്തമാക്കി. ഇങ്ങോട്ടെത്തേണ്ടിയിരുന്ന വിമാനങ്ങളിൽ 33 ശതമാനത്തിലധികവും നിലച്ചു.
സൗദി അറേബ്യയുടെ ദേശീയ വിമാനക്കമ്പനിയായ സൗദിയയെയാണ് പ്രതിസന്ധി ഏറ്റവും കൂടുതൽ ബാധിച്ചത്. റിയാദിൽ നിന്നുള്ള തങ്ങളുടെ 140 സർവീസുകളിൽ 97 എണ്ണവും (ഏകദേശം 69 ശതമാനം) സൗദിയ റദ്ദാക്കി. രാജ്യത്തേക്കുള്ള 87 ഇൻബൗണ്ട് സർവീസുകളും ഒഴിവാക്കി. ബജറ്റ് എയർലൈനുകളായ ഫ്ലൈനാസിന്റെ മൂന്നിലൊന്ന് സർവീസുകളും ഫ്ലൈഅദീലിന്റെ 20 സർവീസുകളും തടസ്സപ്പെട്ടു.
ഇന്ത്യൻ പ്രവാസികളെയും നീക്കം സാരമായി ബാധിച്ചിട്ടുണ്ട്. എയർ ഇന്ത്യ ഒക്ടോബർ 10 വരെയുള്ള റിയാദ് സർവീസുകൾ പൂർണമായി റദ്ദാക്കി. എയർ ഇന്ത്യ എക്സ്പ്രസ് റിയാദിൽ നിന്നുള്ള ഷെഡ്യൂളുകൾ ഒഴിവാക്കിയപ്പോൾ ഇൻഡിഗോയുടെ നിരവധി സർവീസുകൾ മുടങ്ങി. ഫിലിപ്പീൻസ് എയർലൈൻസ് ഒക്ടോബർ 11 വരെ സർവീസുകൾ നിർത്തിവെച്ചിട്ടുണ്ട്. സിംഗപ്പൂർ എയർലൈൻസ് തങ്ങളുടെ റിയാദ് സർവീസുകൾ ആരംഭിക്കുന്നത് മാർച്ച് അവസാനത്തേക്ക് മാറ്റി. കത്തായ് പസിഫിക് ജനുവരി അവസാനം വരെ ബുക്കിങ്ങുകൾ നിർത്തിവെച്ചു.
അതേസമയം, യുഎഇ വിമാനക്കമ്പനികളായ എമിറേറ്റ്‌സും ഇത്തിഹാദും മുൻകൂട്ടി നിശ്ചയിച്ചതുപോലെ റിയാദിലേക്ക് സർവീസ് നടത്തിയതായി വിവരങ്ങൾ വ്യക്തമാക്കുന്നു. എന്നാൽ ഫ്ലൈദുബായ്, ഖത്തർ എയർവേസ്, ടർക്കിഷ് എയർലൈൻസ് എന്നിവ ഭാഗികമായോ പൂർണ്ണമായോ സർവീസുകൾ പിൻവലിച്ചു.
പശ്ചിമേഷ്യൻ സംഘർഷങ്ങൾ കാരണം വിമാനക്കമ്പനികൾ സുരക്ഷിത പാതയായി ഉപയോഗിച്ചിരുന്നത് സൗദി വ്യോമാതിർത്തിയായിരുന്നു. എന്നാൽ സൗദിയിലെ വിമാനത്താവളങ്ങൾക്ക് നേരെ നേരിട്ട് ആക്രമണം ഉണ്ടായതോടെ അന്താരാഷ്ട്ര വിമാന സർവീസുകൾ വലിയ വെല്ലുവിളിയാണ് നേരിടുന്നത്. വിമാനത്താവളത്തിലേക്ക് പുറപ്പെടുന്നതിന് മുൻപ് അതത് കമ്പനികളുമായി ബന്ധപ്പെട്ട് സമയക്രമം ഉറപ്പുവരുത്തണമെന്ന് അധികൃതർ യാത്രക്കാർക്ക് നിർദേശം നൽകി.
