റോഡ് സുരക്ഷയും കാര്യക്ഷമതയും ഉറപ്പാക്കാൻ ഐഒടി ഉപകരണങ്ങളും ക്യാമറകളും; 2027 പകുതിയോടെ പൂർണ നിർബന്ധമാക്കും
ദുബായ്, യുഎഇ — എമിറേറ്റിലെ ഡെലിവറി മോട്ടോർസൈക്കിളുകൾക്കായി ആദ്യത്തെ സംയോജിത സ്മാർട്ട് നിരീക്ഷണ സംവിധാനം ഏർപ്പെടുത്താൻ ദുബായ് റോഡ്സ് ആൻഡ് ട്രാൻസ്പോർട്ട് അതോറിറ്റി (ആർടിഎ) ഒരുങ്ങുന്നു. ഡെലിവറി മേഖലയിലെ പ്രവർത്തനക്ഷമത വർധിപ്പിക്കുന്നതിനൊപ്പം റോഡ് സുരക്ഷയും നിയമപാലനവും ഉറപ്പാക്കുകയാണ് പദ്ധതിയുടെ ലക്ഷ്യം.
ഡെലിവറി ബൈക്കുകളിൽ ഘടിപ്പിക്കുന്ന അത്യാധുനിക ക്യാമറകൾ, ഐഒടി (ഇന്റർനെറ്റ് ഓഫ് തിങ്സ്) അധിഷ്ഠിത ഉപകരണങ്ങൾ, പ്രത്യേക ഡിജിറ്റൽ പ്ലാറ്റ്‌ഫോം എന്നിവ ഉൾപ്പെടുന്നതാണ് പുതിയ സംവിധാനം. വാഹനങ്ങളുടെ വേഗത, അപ്രതീക്ഷിതമായ ആക്സിലറേഷൻ, പെട്ടെന്നുള്ള ബ്രേക്കിങ്, യാത്രാ റൂട്ടുകൾ, കൃത്യമായ ലൊക്കേഷൻ എന്നിവയുൾപ്പെടെയുള്ള ഡ്രൈവിങ് രീതികൾ ഈ സാങ്കേതികവിദ്യ വഴി നിരന്തരം നിരീക്ഷിക്കുകയും വിശകലനം ചെയ്യുകയും ചെയ്യും.
പരമ്പരാഗത പരിശോധനാരീതികളിൽനിന്ന് മാറി ഡാറ്റാ അധിഷ്ഠിതവും മുൻകരുതലോടെയുമുള്ള മേൽനോട്ടത്തിലേക്കുള്ള മാറ്റമാണിതെന്ന് ആർടിഎ ലൈസൻസിങ് ആക്ടിവിറ്റീസ് മോണിറ്ററിങ് ഡയറക്ടർ സഈദ് അൽ റംസി വ്യക്തമാക്കി. ദുബായ് പോലീസ് ജനറൽ കമാൻഡുമായും മറ്റ് ബന്ധപ്പെട്ട വകുപ്പുകളുമായും സഹകരിച്ചാണ് ഈ പദ്ധതി തയാറാക്കിയിരിക്കുന്നത്. തങ്ങളുടെ റൈഡർമാരുടെ പ്രവർത്തനങ്ങൾ തത്സമയം വിലയിരുത്താനും അശ്രദ്ധമായ ഡ്രൈവിങ് രീതികൾ തിരുത്താനും കമ്പനികൾക്ക് ഇത് അവസരമൊരുക്കും.
ലഭ്യമാകുന്ന തത്സമയ വിവരങ്ങൾ മുൻനിർത്തി ഡെലിവറി കമ്പനികൾക്ക് റൈഡർമാർക്കായി പ്രത്യേക സുരക്ഷാ പരിശീലന പരിപാടികൾ ആസൂത്രണം ചെയ്യാൻ സാധിക്കും. റോഡ് ഉപയോക്താക്കളുടെ സുരക്ഷ ഉറപ്പാക്കുന്നതിൽ റെഗുലേറ്ററി അതോറിറ്റികൾക്കൊപ്പം ഓപ്പറേറ്റിങ് കമ്പനികൾക്കും റൈഡർമാർക്കും തുല്യ ഉത്തരവാദിത്തമുണ്ടെന്ന് അദ്ദേഹം ചൂണ്ടിക്കാട്ടി.
പദ്ധതി ആരംഭിക്കുന്നത് മുതൽ 2027 ആദ്യ പകുതി അവസാനിക്കുന്നത് വരെ വാഹനങ്ങളിൽ ഇത്തരം ഉപകരണങ്ങൾ ഘടിപ്പിക്കുന്നതും പ്ലാറ്റ്‌ഫോമുമായി ബന്ധിപ്പിക്കുന്നതും ഓപ്ഷണൽ ആയിരിക്കും. കമ്പനികൾക്ക് സാങ്കേതിക സജ്ജീകരണങ്ങൾ പൂർത്തിയാക്കാനുള്ള സാവകാശമാണിത്. ഈ പരിവർത്തന കാലയളവിന് ശേഷം സംവിധാനം പൂർണമായും നിർബന്ധമാക്കും. ഇതിനായി ഡെലിവറി സ്ഥാപനങ്ങൾക്ക് ആവശ്യമായ സാങ്കേതിക പിന്തുണ ആർടിഎ നൽകും.
ദുബായിലെ നിരത്തുകളിൽ ഡെലിവറി ബൈക്കുകളുടെ എണ്ണം വർധിച്ചുവരുന്ന സാഹചര്യത്തിലാണ് മേഖലയിലെ നിയന്ത്രണങ്ങൾ ശക്തമാക്കാൻ ആർടിഎ നടപടി സ്വീകരിക്കുന്നത്. കൃത്യമായ നിരീക്ഷണ സംവിധാനത്തിലൂടെ നിയമലംഘനങ്ങൾ കുറയ്ക്കാനും സുസ്ഥിരമായ ഗതാഗത സംസ്കാരം ഉറപ്പുവരുത്താനും ഇതിലൂടെ സാധിക്കുമെന്നാണ് വിലയിരുത്തൽ.
