സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമി സമാപന ചടങ്ങിൽ പങ്കെടുത്തു.
ഷാർജ — ഷാർജ പ്രൈവറ്റ് എജ്യുക്കേഷൻ അതോറിറ്റിയും (എസ്പിഇഎ) ഷാർജ എജ്യുക്കേഷൻ അക്കാദമിയും (എസ്ഇഎ) സംയുക്തമായി സംഘടിപ്പിച്ച അഞ്ചാമത് രാജ്യാന്തര അറബിക് ഭാഷാ അധ്യാപക ഫോറത്തിന് സമാപനമായി. ഷാർജ എജ്യുക്കേഷൻ അക്കാദമി ആസ്ഥാനത്ത് നടന്ന സമാപന ചടങ്ങിൽ യുഎഇ സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമി മുഖ്യാതിഥിയായി പങ്കെടുത്തു.
‘ഭാഷാ സുരക്ഷ’ (Linguistic Security) എന്ന പ്രമേയത്തിലായിരുന്നു ഇത്തവണത്തെ ദ്വിദിന സമ്മേളനം. അറബ് സംസ്കാരത്തിന്റെയും സ്വത്വത്തിന്റെയും സംരക്ഷണത്തിന് മാതൃഭാഷാ പരിജ്ഞാനം അനിവാര്യമാണെന്ന കാഴ്ചപ്പാടോടെയാണ് ഫോറം സംഘടിപ്പിച്ചത്. ഗൾഫ് രാജ്യങ്ങളിൽ നിന്നുള്ള വിദ്യാഭ്യാസ വിദഗ്ധരും അധ്യാപകരും ഗവേഷകരും പങ്കെടുത്തു.
ഷാർജയുടെ വിദ്യാഭ്യാസ രംഗത്തെ വളർച്ചയും അന്താരാഷ്ട്ര നേട്ടങ്ങളും എസ്പിഇഎ, എസ്ഇഎ അധ്യക്ഷ ഡോ. മുഹദ്ദിഥ യഹ്യ അൽ ഹാഷിമി തങ്ങളുടെ പ്രസംഗത്തിൽ എടുത്തുപറഞ്ഞു. അന്താരാഷ്ട്ര വിദ്യാർഥി വിലയിരുത്തൽ പരീക്ഷയായ പിസയിൽ (PISA 2025) ഷാർജ മികച്ച പ്രകടനമാണ് കാഴ്ചവെച്ചത്. ഗണിതശാസ്ത്രത്തിൽ ആഗോളതലത്തിൽ 14-ാം സ്ഥാനവും ശാസ്ത്രത്തിൽ 23-ാം സ്ഥാനവും വായനാശേഷിയിൽ (റീഡിങ്) 33-ാം സ്ഥാനവും ഷാർജ സ്വന്തമാക്കി. കുഞ്ഞുനാളിൽ തന്നെ മാതൃഭാഷ സ്വായത്തമാക്കാൻ സർക്കാർ നഴ്സറികളിൽ നടപ്പാക്കിയ പ്രത്യേക ഭാഷാ പരിശീലന പദ്ധതികൾ ഗുണം ചെയ്തുവെന്ന് അവർ ചൂണ്ടിക്കാട്ടി.
സാങ്കേതികവിദ്യ എത്ര വളർന്നാലും അധ്യാപകരുടെ സ്ഥാനത്തിന് പകരമാവില്ലെന്ന് ഗൾഫ് അറബ് ഭാഷാ വിദ്യാഭ്യാസ കേന്ദ്രം (ALECGS) ബോർഡ് ഓഫ് ട്രസ്റ്റി ചെയർമാൻ ഡോ. മാജിദ് ബിൻ മുഖാദ് അൽ ഹാഫി വ്യക്തമാക്കി. അധ്യാപകരുടെ കാര്യശേഷി വർധിപ്പിക്കുന്നതിലൂടെ മാത്രമേ ഭാവി തലമുറയെ കരുത്തുറ്റവരാക്കാൻ സാധിക്കൂ എന്നും അദ്ദേഹം കൂട്ടിച്ചേർത്തു.
വിദ്യാർഥി പ്രതിനിധി സഖർ മുഹമ്മദ് അൽ ഖാസിമി അധ്യാപകർക്കായി സമർപ്പിച്ച ‘താങ്ക് യു, മൈ ടീച്ചർ’ എന്ന സന്ദേശം ചടങ്ങിൽ ശ്രദ്ധേയമായി. ഫോറത്തിന്റെ വിജയത്തിനായി പ്രവർത്തിച്ച പങ്കാളികൾക്ക് ശൈഖ് സുൽത്താൻ സ്മരണികകൾ സമ്മാനിച്ചു.
തുടർന്ന് അക്കാദമിയിൽ ഒരുക്കിയ ‘പ്രൗഡ് ടു ബി എ ടീച്ചർ’ പവലിയൻ ശൈഖ് സുൽത്താൻ സന്ദർശിച്ചു. ഷാർജയിലെ വിദ്യാലയങ്ങളിലും നഴ്സറികളിലുമായി സേവനമനുഷ്ഠിക്കുന്ന 113 സ്വദേശി അധ്യാപകരാണ് പദ്ധതിക്ക് കീഴിലുള്ളത്. ഇതിൽ 62 വനിതാ അധ്യാപകർ ഉന്നതപഠനത്തിന്റെ ഭാഗമായി മാസ്റ്റേഴ്സ് ബിരുദ കോഴ്സുകളിൽ ചേർന്നതായി അധികൃതർ അറിയിച്ചു. അറബിക് മാതൃഭാഷയല്ലാത്ത ഒരു വിദ്യാർഥിനി ശൈഖ ബുദൂർ ബിന്ത് സുൽത്താൻ അൽ ഖാസിമിയുടെ ‘ഹൗസ് ഓഫ് വിസ്ഡം’ എന്ന പുസ്തകത്തെ ആസ്പദമാക്കി തയ്യാറാക്കിയ കാലിഗ്രാഫിയും ചിത്രങ്ങളും ഷാർജ ഭരണാധികാരിക്ക് മുന്നിൽ അവതരിപ്പിച്ചു.
