ദുബായ്: യുഎഇയിലെ ഇമാറാത്തി സ്വദേശി സമൂഹത്തോടുള്ള ആദരവും നന്ദിയും രേഖപ്പെടുത്തി 25 ലക്ഷം ദിർഹത്തിന്റെ വൻകിട കമ്മ്യൂണിറ്റി അപ്രീസിയേഷൻ പദ്ധതി പ്രഖ്യാപിച്ച് എഎം ഹെൽത്ത് ഹബ്ബും ഏരീസ് ഡെന്റൽ ആൻഡ് ഏസ്തറ്റിക് ക്ലിനിക്കും. ആരോഗ്യവും സൗന്ദര്യപരിപാലനവും ഉൾക്കൊള്ളുന്ന ഈ പ്രത്യേക പദ്ധതി വഴി 2,500 ഇമാറാത്തി പൗരന്മാർക്ക് സൗജന്യ വെൽനസ് സേവനങ്ങൾ ലഭ്യമാക്കും.
യുഎഇയെ ആഗോളതലത്തിൽ ഐക്യത്തിന്റെയും മാനവികതയുടെയും മാതൃകയാക്കി ഉയർത്തുന്നതിൽ ഇമാറാത്തി സമൂഹം വഹിച്ച നിർണായക പങ്കിനുള്ള നന്ദിപ്രകടനമായാണ് പദ്ധതി ആവിഷ്കരിച്ചതെന്ന് സംഘാടകർ വ്യക്തമാക്കി.
പദ്ധതിയുടെ ഭാഗമായി 2,500 സ്വദേശികൾക്ക് 1,000 ദിർഹം വീതം മൂല്യമുള്ള വെൽനസ് വൗച്ചറുകൾ വിതരണം ചെയ്യും. ഈ വൗച്ചറുകൾ ഉപയോഗിച്ച് അഡ്വാൻസ്ഡ് ബയോളജിക്കൽ ഡെന്റിസ്ട്രി, സ്മൈൽ മേക്കോവർ, ഫേഷ്യൽ ഏസ്തറ്റിക്സ്, സ്കിൻ ട്രീറ്റ്മെന്റുകൾ, ആന്റി-ഏജിംഗ് പ്രൊസീജറുകൾ, കോസ്മെറ്റിക് എൻഹാൻസ്മെന്റുകൾ, വിവിധ വെൽനസ് തെറാപ്പികൾ തുടങ്ങിയ പ്രീമിയം സേവനങ്ങൾ പൂർണമായും സൗജന്യമായി ലഭ്യമാകും.
മാസിൻസ് ഗ്രൂപ്പ് സ്ഥാപകനും ചെയർമാനുമായ പ്രവീൺ പിള്ളയും ഏരീസ് ഡെന്റൽ ആൻഡ് ഏസ്തറ്റിക് ക്ലിനിക്, എഎം ഹെൽത്ത് ഹബ്ബ് എന്നിവയുടെ സ്ഥാപകയായ ഡോ. നിവേദ്യ റോയും ചേർന്നാണ് ഈ സംരംഭത്തിന് നേതൃത്വം നൽകുന്നത്.
ലോകത്തിന്റെ വിവിധ ഭാഗങ്ങളിൽ നിന്നുള്ള ലക്ഷക്കണക്കിന് പ്രവാസികൾക്ക് യുഎഇയിൽ സുരക്ഷിതവും ബഹുമാനപൂർണവുമായ ജീവിതം നയിക്കാൻ അവസരമൊരുക്കിയ ഇമാറാത്തി സമൂഹത്തോടുള്ള ആദരസൂചകമാണ് ഈ പദ്ധതിയെന്ന് അവർ സംയുക്ത പ്രസ്താവനയിൽ പറഞ്ഞു.
വെല്ലുവിളികൾ നിറഞ്ഞ കാലങ്ങളിലും പ്രവാസി സമൂഹത്തെയും ബിസിനസുകളെയും ഹൃദയപൂർവ്വം സ്വീകരിച്ച ഇമാറാത്തി ജനതയുടെ കരുണയ്ക്കും സഹിഷ്ണുതയ്ക്കുമുള്ള വിനീതമായ നന്ദിപ്രകടനമാണ് ഈ പദ്ധതിയെന്ന് പ്രവീൺ പിള്ളയും ഡോ. നിവേദ്യ റോയും വ്യക്തമാക്കി.
യുഎഇ ഒരു ബിസിനസ് കേന്ദ്രം മാത്രമല്ല, മറിച്ച് പരസ്പര വിശ്വാസത്തിന്റെയും ഉൾക്കൊള്ളലിന്റെയും അടിസ്ഥാനത്തിൽ നിലകൊള്ളുന്ന വലിയൊരു കുടുംബമാണെന്നും ഇമാറാത്തി ജനതയുടെ മാനവിക സമീപനം ലോകമെമ്പാടുമുള്ള ആളുകൾക്ക് പ്രചോദനമാണെന്നും അവർ കൂട്ടിച്ചേർത്തു.
