ദുബൈ: എമിറേറ്റ്സ് ഡ്രഗ് എസ്റ്റാബ്ലിഷ്മെന്റ് വിട്ടുമാറാത്തതും ഗുരുതരവുമായ വിവിധ രോഗങ്ങൾക്കുള്ള 168 മരുന്നുകളുടെ റീട്ടെയിൽ വില ഗണ്യമായി കുറയ്ക്കാൻ തീരുമാനിച്ചു. ഹൃദ്രോഗം, പ്രമേഹം, രക്തസമ്മർദം, കാൻസർ, പക്ഷാഘാതം, കൊളസ്ട്രോൾ, ദഹനസംബന്ധമായ അസുഖങ്ങൾ, മാനസിക-നാഡീരോഗങ്ങൾ, നേത്രരോഗങ്ങൾ, ആസ്ത്മ തുടങ്ങിയ രോഗങ്ങൾക്കുള്ള മരുന്നുകളാണ് വിലക്കുറവിന്റെ പരിധിയിൽ ഉൾപ്പെടുത്തിയിരിക്കുന്നത്. ചില മരുന്നുകൾക്ക് 60 ശതമാനം വരെ വിലക്കുറവ് ലഭിച്ചതായി അധികൃതർ അറിയിച്ചു.
പുതുക്കിയ നിരക്കുകൾ മെയ് 30 മുതൽ പ്രാബല്യത്തിൽ വരും. ഇതോടെ ദീർഘകാല ചികിത്സ ആവശ്യമായ രോഗികൾക്ക് സാമ്പത്തിക ആശ്വാസമാകുമെന്ന പ്രതീക്ഷയിലാണ് ആരോഗ്യരംഗം.
കാൻസർ ചികിത്സയ്ക്ക് ഉപയോഗിക്കുന്ന ഉയർന്ന വിലയുള്ള ബയോളജിക് മരുന്നുകൾക്കാണ് ഏറ്റവും വലിയ വിലക്കുറവ് പ്രഖ്യാപിച്ചിരിക്കുന്നത്. അലുൻബ്രിഗ് 180 മില്ലിഗ്രാമിന്റെ വില 26,433 ദിർഹമിൽ നിന്ന് 21,108 ദിർഹമായി കുറഞ്ഞു. 90 മില്ലിഗ്രാം മരുന്നിന്റെ വില 19,824ൽ നിന്ന് 12,520 ആയി കുറച്ചപ്പോൾ, 30 മില്ലിഗ്രാം ഡോസിന്റെ വില 6,608ൽ നിന്ന് 4,173 ദിർഹമായി താഴ്ന്നു. സെലോഡ 150 മില്ലിഗ്രാമിന്റെ വില 347ൽ നിന്ന് 241 ദിർഹമായും കുറച്ചു.
കൊളസ്ട്രോൾ ചികിത്സയ്ക്കുള്ള സോക്കോർ മരുന്നിന് 59.5 ശതമാനം വരെ വിലക്കുറവ് പ്രഖ്യാപിച്ചു. സോക്കോറിന്റെ 10, 20, 40 മില്ലിഗ്രാം ഡോസുകളുടെ വില 67.50 ദിർഹമായി ഏകീകരിച്ചു. മുമ്പ് ഇവയുടെ വില യഥാക്രമം 83.50, 91.50, 166.50 ദിർഹം ആയിരുന്നു. ഗ്ലോക്കോമ രോഗികൾ ഉപയോഗിക്കുന്ന എക്സലാറ്റൻ ഐ ഡ്രോപ്സിന്റെ വില 89ൽ നിന്ന് 43 ദിർഹമായി കുറഞ്ഞു. കോംബിഗാൻ ഐ ഡ്രോപ്സിന്റെ വിലയും 94ൽ നിന്ന് 78.50 ദിർഹമായി കുറച്ചു.
പ്രമേഹരോഗികൾക്കുള്ള അമരിലി 1 മില്ലിഗ്രാമിന്റെ വില 25ൽ നിന്ന് 19 ദിർഹമായി കുറഞ്ഞപ്പോൾ, 2 മില്ലിഗ്രാം ഡോസിന്റെ വില 39.50ൽ നിന്ന് 32 ദിർഹമായി താഴ്ന്നു. ഹൃദയസ്തംഭന ചികിത്സയ്ക്കുള്ള വെർക്യൂവോ 2.5 മില്ലിഗ്രാമിന്റെ വില 257ൽ നിന്ന് 244 ദിർഹമായി കുറച്ചു.
രക്തസമ്മർദത്തിനുള്ള റെനിടെക് 10 മില്ലിഗ്രാമിന്റെ വില 64ൽ നിന്ന് 48 ദിർഹമായി കുറഞ്ഞു. അപ്രോവൽ 150 മില്ലിഗ്രാമിന്റെ വില 99.50ൽ നിന്ന് 63.50 ദിർഹമായും പക്ഷാഘാത ചികിത്സയ്ക്കുള്ള പ്രഡാക്സ 150 മില്ലിഗ്രാമിന്റെ വില 438.50ൽ നിന്ന് 394.50 ദിർഹമായും കുറച്ചു.
മാനസിക-നാഡീരോഗ ചികിത്സയ്ക്കുള്ള ഇൻവേഗ 9 മില്ലിഗ്രാമിന്റെ വില 843ൽ നിന്ന് 416 ദിർഹമായി പകുതിയിലധികം കുറഞ്ഞു. ഇൻവേഗയുടെ 3 മില്ലിഗ്രാം, 6 മില്ലിഗ്രാം ഡോസുകളുടെയും വില 381.50 ദിർഹമായി നിശ്ചയിച്ചു.
ആസ്ത്മ രോഗികൾക്കായി ഉപയോഗിക്കുന്ന നുകാല 100 മില്ലിഗ്രാം ബയോളജിക് ഇഞ്ചക്ഷന്റെ വില 6,212.50ൽ നിന്ന് 5,142 ദിർഹമായി കുറച്ചതും ശ്രദ്ധേയമാണ്.
വിലക്കുറവ് തീരുമാനം ദീർഘകാല രോഗചികിത്സയ്ക്കായി വലിയ തുക ചെലവഴിക്കുന്ന രോഗികൾക്കും കുടുംബങ്ങൾക്കും ഗുണകരമാകുമെന്ന് ആരോഗ്യരംഗം വിലയിരുത്തുന്നു.
