ദുബായ്: യുഎഇയിൽ സമ്പൂർണ്ണ സംയോജിത ദേശീയ ആരോഗ്യ ഇൻഷുറൻസ് പദ്ധതി നടപ്പാക്കാനുള്ള പ്രഖ്യാപനം രാജ്യത്തിന്റെ ആരോഗ്യസംരക്ഷണ മേഖലയിലെ ചരിത്രപരമായ നീക്കമാണെന്ന് ആസ്റ്റർ ഡിഎം ഹെൽത്ത് കെയർ സ്ഥാപക ചെയർമാൻ ഡോ. ആസാദ് മൂപ്പൻ പറഞ്ഞു. യുഎഇയെ മുഴുവൻ ഉൾക്കൊള്ളുന്ന യൂണിവേഴ്സൽ ഹെൽത്ത് കെയർ സിസ്റ്റം രാജ്യത്തെ ആരോഗ്യപരിപാലന രംഗത്ത് വലിയ മാറ്റങ്ങൾക്ക് വഴിയൊരുക്കുമെന്നും അദ്ദേഹം വ്യക്തമാക്കി.
ലോകോത്തര ആരോഗ്യ സേവനങ്ങളുടെ കേന്ദ്രമായി യുഎഇയുടെ സ്ഥാനം കൂടുതൽ ശക്തിപ്പെടുത്തുന്ന തീരുമാനമാണിതെന്നും ഡോ. ആസാദ് മൂപ്പൻ അഭിപ്രായപ്പെട്ടു. ദീർഘവീക്ഷണമുള്ള യുഎഇ നേതൃത്വത്തിന്റെ ഈ തന്ത്രപരമായ ഉദ്യമത്തെ ആസ്റ്റർ ഡിഎം ഹെൽത്ത് കെയർ പൂർണ്ണഹൃദയത്തോടെ സ്വാഗതം ചെയ്യുന്നതായും അദ്ദേഹം പറഞ്ഞു.
രാജ്യത്തെ ഓരോ പൗരനും താമസക്കാരനും ഉയർന്ന നിലവാരത്തിലുള്ള ആരോഗ്യപരിരക്ഷ ഉറപ്പാക്കാനുള്ള യുഎഇയുടെ പ്രതിബദ്ധതയ്ക്ക് കൂടുതൽ കരുത്തേകുന്ന നടപടിയായാണ് ഈ പദ്ധതിയെ കാണുന്നതെന്ന് അദ്ദേഹം ചൂണ്ടിക്കാട്ടി. ആരോഗ്യ സേവനങ്ങളുടെ ലഭ്യതയും തുടർച്ചയും വർധിപ്പിക്കുന്നതോടൊപ്പം രാജ്യത്തിനുള്ളിൽ തന്നെ ലോകോത്തര ചികിത്സ തേടാൻ കൂടുതൽ ആളുകളെ പ്രോത്സാഹിപ്പിക്കാനും ഈ പദ്ധതി സഹായകരമാകുമെന്ന് അദ്ദേഹം വ്യക്തമാക്കി.
സമൂഹങ്ങളുടെ ആരോഗ്യവും ക്ഷേമവും രാജ്യത്തിന്റെ സുസ്ഥിര വികസന യാത്രയുടെ കേന്ദ്രബിന്ദുവാക്കി മാറ്റുന്ന നിർണായക നീക്കമാണിതെന്നും ഡോ. ആസാദ് മൂപ്പൻ പറഞ്ഞു. കൂടുതൽ സംയോജിതവും കാര്യക്ഷമവും രോഗികേന്ദ്രീകൃതവുമായ ആരോഗ്യ സംരക്ഷണ സംവിധാനം രൂപപ്പെടുത്തുന്നതിൽ തുടർച്ചയായി ശ്രദ്ധ കേന്ദ്രീകരിക്കുന്ന യുഎഇ നേതൃത്വത്തെ അദ്ദേഹം അഭിനന്ദിക്കുകയും ചെയ്തു.
