സുരക്ഷാ കേന്ദ്രങ്ങളുടെ ചിത്രങ്ങൾ പകർത്തുകയും പങ്കുവയ്ക്കുകയും ചെയ്യുന്നത് കുറ്റകരം: മുന്നറിയിപ്പ്

അബുദാബി: സുരക്ഷാ സംവിധാനങ്ങളുടെയും തന്ത്രപ്രധാനമായ കേന്ദ്രങ്ങളുടെയും ചിത്രങ്ങൾ പകർത്തുകയോ സമൂഹമാധ്യമങ്ങളിൽ പങ്കുവയ്ക്കുകയോ ചെയ്യുന്നത് ഗുരുതരമായ നിയമനടപടികൾക്ക് കാരണമാകുമെന്ന് യു.എ.ഇ അധികൃതർ വീണ്ടും മുന്നറിയിപ്പ് നൽകി.

ഇത്തരം പ്രവൃത്തികൾ രാജ്യത്തിന്റെ സുരക്ഷയും സ്ഥിരതയും ബാധിക്കാനുള്ള സാധ്യതയുണ്ടെന്നും, അതിനാൽ പൊതുജനങ്ങൾ ഉത്തരവാദിത്തത്തോടെയാണ് പെരുമാറേണ്ടതെന്നും അധികൃതർ വ്യക്തമാക്കി.

സുരക്ഷാ സ്ഥാപനങ്ങൾ, സൈനിക കേന്ദ്രങ്ങൾ, തന്ത്രപ്രധാനമായ സർക്കാർ സംവിധാനങ്ങൾ എന്നിവയുടെ ഫോട്ടോകളും വീഡിയോകളും ചിത്രീകരിച്ച് സാമൂഹിക മാധ്യമങ്ങളിൽ പ്രചരിപ്പിക്കുന്നത് നിയമവിരുദ്ധമാണെന്നും അധികൃതർ പറഞ്ഞു.

അതേസമയം, സ്ഥിരീകരിക്കാത്ത വാർത്തകളും വ്യാജ വീഡിയോകളും സോഷ്യൽ മീഡിയ വഴി പ്രചരിപ്പിക്കുന്നതും നിയമലംഘനമാണ്. ഇത്തരം പ്രവർത്തനങ്ങളിൽ നിന്ന് വിട്ടുനിൽക്കാനും ഔദ്യോഗിക സ്രോതസ്സുകളിൽ നിന്ന് ലഭിക്കുന്ന വിവരങ്ങൾ മാത്രം വിശ്വസിക്കാനും ജനങ്ങളോട് അധികൃതർ അഭ്യർഥിച്ചു.

രാജ്യത്തിന്റെ നിയമങ്ങൾ കൃത്യമായി പാലിക്കുന്നത് വഴി പൗരന്മാർക്കും പ്രവാസികൾക്കും സുരക്ഷിതമായ ജീവിതം ഉറപ്പാക്കാൻ കഴിയുമെന്ന് അധികൃതർ വ്യക്തമാക്കി. രാജ്യത്തിന്റെ സുരക്ഷയും ജനങ്ങളുടെ സംരക്ഷണവും ഉറപ്പാക്കുകയാണ് സർക്കാരിന്റെ പ്രധാന ലക്ഷ്യമെന്നും അവർ കൂട്ടിച്ചേർത്തു.

English Summary : UAE authorities warned that photographing or sharing images of security facilities and strategic locations on social media is illegal and could lead to strict legal action. Officials urged residents to avoid spreading unverified news and to rely only on official sources to protect national security and stability.