റാസൽഖൈമ: വിനോദസഞ്ചാര മേഖലയിലെ പുതിയ അധ്യായത്തിന് തുടക്കമിട്ട് ബഹിരാകാശ ടൂറിസം രംഗത്തേക്ക് പ്രവേശിക്കാൻ ഒരുങ്ങി റാസൽഖൈമ. ആക്ഷൻ ഫ്ലൈറ്റ് ഏവിയേഷനും ബ്ലിങ്ക് സ്പേസും സഹകരിച്ച് നടപ്പാക്കുന്ന പദ്ധതിയിലൂടെ ആസ്ട്രോണോട്ട് പരിശീലനം, കൊമേഴ്സ്യൽ സ്പേസ് ഫ്ലൈറ്റ് അനുഭവം, സീറോ ഗ്രാവിറ്റി സിമുലേഷൻ തുടങ്ങി അത്യാധുനിക ബഹിരാകാശ അനുഭവങ്ങൾ സന്ദർശകർക്കായി ഒരുക്കും.
വിനോദസഞ്ചാരവും ആധുനിക വ്യോമയാന-ബഹിരാകാശ സാങ്കേതികവിദ്യയും സംയോജിപ്പിച്ച് റാസൽഖൈമയെ ആഗോള തലത്തിലെ പ്രത്യേക ടൂറിസം കേന്ദ്രമാക്കി മാറ്റുകയാണ് പദ്ധതിയുടെ ലക്ഷ്യം. അഡ്വഞ്ചർ ടൂറിസം മേഖലയിൽ പുതിയ സാധ്യതകൾ തുറക്കുന്നതാണ് ഈ സംരംഭമെന്നാണ് വിലയിരുത്തൽ.
യുഎഇ സുപ്രീം കൗൺസിൽ അംഗവും റാസൽഖൈമ ഭരണാധികാരിയുമായ ശൈഖ് സൗദ് ബിൻ സഖർ അൽ ഖാസിമിയുടെ സാന്നിധ്യത്തിൽ നടന്ന പ്രത്യേക ചടങ്ങിലാണ് പദ്ധതിയുടെ പ്രഖ്യാപനം നടത്തിയത്. അന്താരാഷ്ട്ര ബഹിരാകാശ വിദഗ്ധർ, നിക്ഷേപകർ, വ്യോമയാന രംഗത്തെ പ്രമുഖർ എന്നിവർ ചടങ്ങിൽ പങ്കെടുത്തു.
ആസ്ട്രോണോട്ട് പരിശീലനവും സ്പേസ് സിമുലേഷനും
കൊമേഴ്സ്യൽ ബഹിരാകാശ യാത്രകളിൽ പങ്കെടുക്കാൻ ആഗ്രഹിക്കുന്നവർക്കും ബഹിരാകാശ ശാസ്ത്രത്തിൽ താൽപര്യമുള്ളവർക്കുമായി പ്രത്യേക പരിശീലന പരിപാടികൾ, ശിൽപശാലകൾ, സ്പേസ് മിഷൻ സിമുലേഷനുകൾ എന്നിവ സംഘടിപ്പിക്കും. കൂടാതെ വിദ്യാർഥികൾക്കും ഗവേഷകർക്കുമായി വിദ്യാഭ്യാസ-ഗവേഷണ സ്പേസ് പ്രോഗ്രാമുകളും അവതരിപ്പിക്കും.
സീറോ ഗ്രാവിറ്റി അനുഭവങ്ങൾ, ബഹിരാകാശ ദൗത്യങ്ങളുടെ മാതൃകാ പരിശീലനങ്ങൾ, സ്വകാര്യ സ്പേസ് ഫ്ലൈറ്റ് പദ്ധതികൾ എന്നിവയും പദ്ധതിയുടെ ഭാഗമാകും. സാഹസികവും ഹൈടെക് അനുഭവങ്ങളും തേടുന്ന വിനോദസഞ്ചാരികളെ ആകർഷിക്കാൻ ഇത് സഹായിക്കുമെന്നാണ് അധികൃതരുടെ പ്രതീക്ഷ.
ആഗോള അഡ്വഞ്ചർ ടൂറിസം ഹബ്ബിലേക്ക് റാസൽഖൈമ
മലനിരകൾ, മരുഭൂമി, കടൽത്തീര ടൂറിസം എന്നിവയുടെ വികസനത്തിന് പിന്നാലെ റാസൽഖൈമയെ ആഗോള അഡ്വഞ്ചർ ടൂറിസം ഹബ്ബാക്കി മാറ്റാനുള്ള നീക്കത്തിന്റെ ഭാഗമായാണ് ബഹിരാകാശ ടൂറിസം പദ്ധതി പ്രഖ്യാപിച്ചിരിക്കുന്നത്.
സമ്പദ്വ്യവസ്ഥയുടെ വൈവിധ്യവത്കരണം, വിനോദസഞ്ചാര നിക്ഷേപങ്ങളുടെ വർധന, ഉയർന്ന സാങ്കേതിക മേഖലകളിലെ തൊഴിൽ അവസരങ്ങൾ എന്നിവ സൃഷ്ടിക്കുന്നതിലും പദ്ധതി നിർണായക പങ്കുവഹിക്കുമെന്ന് അധികൃതർ ചൂണ്ടിക്കാട്ടുന്നു.
പ്രമുഖ സ്ഥാപനങ്ങളുടെ പങ്കാളിത്തം
ബഹിരാകാശ യാത്രാ പരിശീലനം, സീറോ ഗ്രാവിറ്റി അനുഭവങ്ങൾ, സ്പേസ് മിഷൻ സിമുലേഷൻ, വിദ്യാഭ്യാസ-ഗവേഷണ പരിപാടികൾ എന്നിവയിൽ ശ്രദ്ധ കേന്ദ്രീകരിക്കുന്ന അമേരിക്കൻ ബഹിരാകാശ സാങ്കേതിക സ്ഥാപനമായ ബ്ലിങ്ക് സ്പേസാണ് പദ്ധതിയുടെ സാങ്കേതിക പങ്കാളി.
അഡ്വഞ്ചർ ഫ്ലൈറ്റുകൾ, ഹൈ പെർഫോമൻസ് എയർക്രാഫ്റ്റ് പരിശീലനം, എയർഷോകൾ, പ്രത്യേക വ്യോമയാന പരിപാടികൾ തുടങ്ങിയ മേഖലകളിൽ പ്രവർത്തിക്കുന്ന യുഎഇ ആസ്ഥാനമായ ആക്ഷൻ ഫ്ലൈറ്റ് ഏവിയേഷനാണ് പദ്ധതിയുടെ മറ്റൊരു പ്രധാന പങ്കാളി.
ചടങ്ങിൽ റാസൽഖൈമ ഭരണകൂട പ്രതിനിധികളും പങ്കാളി സ്ഥാപനങ്ങളിലെ ഉദ്യോഗസ്ഥരും ധാരണാപത്രത്തിൽ ഒപ്പുവെച്ചു. മുൻ നാസ അഡ്മിനിസ്ട്രേറ്റർ ചാൾസ് എഫ്. ബോൾഡന്റെ മകൻ ചി ബോൾഡനും നാസ ബഹിരാകാശ യാത്രിക ജീനറ്റ് ജെ. എപ്പ്സും ഉൾപ്പെടെയുള്ള പ്രമുഖരും ചടങ്ങിൽ പങ്കെടുത്തു.
