കഠിനമായ വേനൽച്ചൂടിൽ നിന്ന് തൊഴിലാളികൾക്ക് സംരക്ഷണം നൽകുന്നതിനായി ഉച്ചയ്ക്ക് 12.30 മുതൽ 3 മണി വരെയാണ് പുറംജോലികൾക്ക് വിലക്കേർപ്പെടുത്തിയിരിക്കുന്നത്.
ദുബായ്: യുഎഇയിൽ തൊഴിലാളികളുടെ സുരക്ഷ മുൻനിർത്തിയുള്ള നിർബന്ധിത ഉച്ചവിശ്രമ നിയമം ഇന്ന് മുതൽ പ്രാബല്യത്തിൽ വന്നു. കഠിനമായ വേനൽച്ചൂടിൽ നിന്നുള്ള ആരോഗ്യ സുരക്ഷ ഉറപ്പാക്കുന്നതിനായി ഉച്ചയ്ക്ക് 12:30 മുതൽ ഉച്ചകഴിഞ്ഞ് 3:00 മണി വരെയാണ് പുറംജോലികൾക്ക് മന്ത്രാലയം കർശന വിലക്കേർപ്പെടുത്തിയിരിക്കുന്നത്. നിയമം ലംഘിച്ച് തൊഴിലാളികളെക്കൊണ്ട് ജോലി ചെയ്യിപ്പിക്കുന്ന സ്ഥാപനങ്ങൾക്ക് 50,000 ദിർഹം വരെ പിഴ ചുമത്തുമെന്ന് അധികൃതർ മുന്നറിയിപ്പ് നൽകി.
വേനൽക്കാലത്ത് സൂര്യാഘാതം, നിർജ്ജലീകരണം എന്നിവയിൽ നിന്ന് തൊഴിലാളികളെ സംരക്ഷിക്കുന്നതിന്റെ ഭാഗമായാണ് യുഎഇ മാനവവിഭവശേഷി സ്വദേശിവൽക്കരണ മന്ത്രാലയം (MoHRE) എല്ലാ വർഷവും ഉച്ചവിശ്രമ നിയമം നടപ്പിലാക്കുന്നത്. ഈ വിശ്രമ വേളകളിൽ തൊഴിലാളികൾക്ക് വിശ്രമിക്കുന്നതിനായി തണലുള്ള അനുയോജ്യമായ സൗകര്യങ്ങൾ ഒരുക്കാൻ കമ്പനികൾ ബാധ്യസ്ഥരാണ്.
നിയമം ലംഘിക്കുന്ന തൊഴിലുടമകൾക്കെതിരെ കർശന നടപടിയുണ്ടാകും. നിയമം ലംഘിച്ച് ഒരോ തൊഴിലാളിയെയും വെയിലത്ത് ജോലി ചെയ്യിക്കുന്നതിന് 5,000 ദിർഹം വീതമാണ് പിഴ ഈടാക്കുക. ഒന്നിലധികം നിയമലംഘനങ്ങൾ കണ്ടെത്തുന്ന കമ്പനികളിൽ നിന്ന് പരമാവധി 50,000 ദിർഹം വരെ പിഴ ഈടാക്കുമെന്നും അധികൃതർ വ്യക്തമാക്കിയിട്ടുണ്ട്. ഇതോടനുബന്ധിച്ച് രാജ്യവ്യാപകമായി കർശന പരിശോധനകൾ നടക്കും.
തൊഴിലാളികളുടെ ക്ഷേമം ഉറപ്പാക്കുന്നതിൽ യുഎഇ സർക്കാർ പുലർത്തുന്ന രാജ്യാന്തര മാനദണ്ഡങ്ങളുടെ ഭാഗമായാണ് ഈ നടപടി. എന്നാൽ, പൊതുജന സുരക്ഷയെ ബാധിക്കുന്ന അടിയന്തര സ്വഭാവമുള്ള ചില പ്രത്യേക ജോലികളെ (ഉദാഹരണത്തിന് ജലം, വൈദ്യുതി, ഗതാഗതം എന്നിവയുമായി ബന്ധപ്പെട്ട അടിയന്തര അറ്റകുറ്റപ്പണികൾ) ഈ നിയമത്തിൽ നിന്ന് ഒഴിവാക്കിയിട്ടുണ്ട്. എങ്കിലും, ഇത്തരം സാഹചര്യങ്ങളിൽ ജോലി ചെയ്യുന്ന തൊഴിലാളികൾക്ക് കുടിവെള്ളവും മറ്റ് തണുപ്പിക്കൽ സംവിധാനങ്ങളും നൽകേണ്ടത് തൊഴിലുടമയുടെ ഉത്തരവാദിത്തമാണ്.
