കുടുംബ സുരക്ഷിതത്വം സമൂഹത്തിന് കാവൽ: അൽ അമീൻ ഫോറത്തിൽ നിർണായക നയരേഖ പ്രഖ്യാപിച്ച് ദുബായ്

ഏകീകൃത ഫാമിലി സെന്ററുകളും വിദ്യാർത്ഥികൾക്കായി പുതിയ പെരുമാറ്റച്ചട്ടവും വരുന്നു; പ്രശ്നപരിഹാരങ്ങളിൽ 95 ശതമാനം വിജയം കൈവരിച്ചതായി സിഡിഎ.

ദുബായ്, ഒക്ടോബർ 23, 2026 : സാമൂഹിക സുരക്ഷയുടെയും ദേശീയ സ്വത്വ സംരക്ഷണത്തിന്റെയും പ്രഥമ പ്രതിരോധം കുടുംബങ്ങളാണെന്ന് അടിവരയിട്ട് ദുബായിൽ അൽ അമീൻ ഫോറം സമാപിച്ചു. സൈബർ വെല്ലുവിളികൾ, ലഹരി ഉപയോഗം, സാമൂഹിക മാറ്റങ്ങൾ എന്നിവയിൽ നിന്ന് യുവതലമുറയെ സംരക്ഷിക്കാൻ വിപുലമായ കുടുംബ കേന്ദ്രീകൃത പദ്ധതികളാണ് ഭരണകൂടം മുന്നോട്ടുവെക്കുന്നത്.

ദുബായ് രണ്ടാം ഉപഭരണാധികാരി ശൈഖ് അഹമ്മദ് ബിൻ മുഹമ്മദ് ബിൻ റാഷിദ് അൽ മക്തൂമിന്റെ രക്ഷാകർതൃത്വത്തിൽ അറ്റ്‌ലാന്റിസ് ദ റോയലിലാണ് വാർഷിക സമ്മേളനം നടന്നത്. ദുബായ് പോർട്ട്സ് ആൻഡ് ബോർഡേഴ്സ് സെക്യൂരിറ്റി കൗൺസിൽ ചെയർമാൻ ശൈഖ് മൻസൂർ ബിൻ മുഹമ്മദ് ബിൻ റാഷിദ് അൽ മക്തൂം മുഖ്യാതിഥിയായി പങ്കെടുത്തു. ദുബായ് പോലീസ് മേധാവി ലഫ്റ്റനന്റ് ജനറൽ അബ്ദുല്ല ഖലീഫ അൽ മർറി ഉൾപ്പെടെയുള്ള ഉന്നത സുരക്ഷാ-ഭരണ ഉദ്യോഗസ്ഥരും സന്നിഹിതരായിരുന്നു.

കുടുംബ ഭദ്രതയാണ് രാജ്യത്തിന്റെ യഥാർത്ഥ സുരക്ഷാ കോട്ടയെന്ന് ദുബായ് സ്റ്റേറ്റ് സെക്യൂരിറ്റി ഡിപ്പാർട്ട്‌മെന്റ് പ്രസിഡന്റ് ലഫ്റ്റനന്റ് ജനറൽ തലാൽ ഹുമൈദ് ബെൽഹൂൽ അൽ ഫലാസി ചൂണ്ടിക്കാട്ടി. ആധുനിക ഡിജിറ്റൽ ലോകത്തെ അപകടങ്ങളിൽ നിന്ന് കുട്ടികളെ സംരക്ഷിക്കാൻ മാതാപിതാക്കളുടെ ജാഗ്രത അത്യന്താപേക്ഷിതമാണെന്ന് അദ്ദേഹം വ്യക്തമാക്കി.

നിർമിതബുദ്ധി (എഐ) സംവിധാനങ്ങൾ രാജ്യത്തിന്റെ സംസ്കാരവും ചരിത്രവുമായി ഇഴുകിച്ചേർന്നു പ്രവർത്തിക്കേണ്ടതിന്റെ ആവശ്യകത നിർമിതബുദ്ധി-ഡിജിറ്റൽ സാമ്പത്തികകാര്യ സഹമന്ത്രി ഒമർ സുൽത്താൻ അൽ ഒലാമ വിശദീകരിച്ചു. തലമുറകൾക്ക് കൈമാറേണ്ട മൂല്യങ്ങൾ വികലമാക്കപ്പെടാതെ സൂക്ഷിക്കാൻ സാങ്കേതികവിദ്യയെ കൃത്യമായ ലക്ഷ്യബോധത്തോടെ ഉപയോഗിക്കണമെന്ന് അദ്ദേഹം ഓർമ്മിപ്പിച്ചു.

സ്കൂളുകളിൽ പഠനത്തോടൊപ്പം സ്വഭാവ രൂപീകരണത്തിനും പ്രാധാന്യം നൽകുന്ന പ്രത്യേക വിദ്യാർത്ഥി പെരുമാറ്റച്ചട്ടം ഉടൻ പ്രാബല്യത്തിൽ വരുമെന്ന് നോളജ് ആൻഡ് ഹ്യൂമൻ ഡെവലപ്‌മെന്റ് അതോറിറ്റി (കെഎച്ച്ഡിഎ) ഡയറക്ടർ ജനറൽ ആയിഷ മിറാൻ വ്യക്തമാക്കി. അധ്യാപകരും രക്ഷിതാക്കളും വിദ്യാർത്ഥികളും ഒത്തുചേരുന്ന പ്രത്യേക കൗൺസിലുകൾ ഇതിനായി രൂപീകരിക്കും.

കുടുംബ തർക്കങ്ങൾ പരിഹരിക്കുന്നതിലും സാമൂഹിക സ്ഥിരത ഉറപ്പാക്കുന്നതിലും മികച്ച മുന്നേറ്റമാണ് കൈവരിച്ചിട്ടുള്ളതെന്ന് ദുബായ് കമ്മ്യൂണിറ്റി ഡെവലപ്‌മെന്റ് അതോറിറ്റി (സിഡിഎ) ഡയറക്ടർ ജനറൽ ഹെസ്സ ബുഹുമൈദ് അറിയിച്ചു. ഈ വർഷം 484 കുടുംബങ്ങൾക്കായി നടത്തിയ 2,400 കൗൺസിലിംഗ് സെഷനുകളിലൂടെ 95 ശതമാനം പ്രശ്നങ്ങളും വിജയകരമായി ഒത്തുതീർപ്പാക്കാൻ സാധിച്ചു.

എല്ലാവിധ പിന്തുണകളും ഒരു കുടക്കീഴിൽ ലഭ്യമാക്കുന്ന ഏകീകൃത ഫാമിലി സെന്ററുകൾ എമിറേറ്റിൽ ഉടൻ പ്രവർത്തനമാരംഭിക്കും. നിലവിൽ 148 കുടുംബ ക്ഷേമ പദ്ധതികളാണ് സിഡിഎയുടെ നേതൃത്വത്തിൽ പുരോഗമിക്കുന്നത്.

ദേശീയ ദുരന്തനിവാരണ അതോറിറ്റി, ലഹരിവിരുദ്ധ അതോറിറ്റി, ദുബായ് പോലീസിന്റെ വനിതാ-ശിശു സംരക്ഷണ വിഭാഗം എന്നിവയിലെ വിദഗ്ധരും ചർച്ചകളിൽ പങ്കെടുത്തു. ഭരണസംവിധാനങ്ങളുടെ നിയമപരമായ ഇടപെടലുകൾക്കൊപ്പം കുടുംബങ്ങളുടെ സജീവമായ പിന്തുണ കൂടി ഉറപ്പാക്കി സമഗ്ര സുരക്ഷാ വലയം തീർക്കാനാണ് എമിറേറ്റിന്റെ തീരുമാനം.