ഈദ് അൽ ഇത്തിഹാദ് ആഘോഷങ്ങളുടെ ഭാഗമായി പ്രവാസി കലാകാരന്മാർ നാല് ഭാഷകളിലായി ഒരുക്കുന്ന സംഗീത ആൽബത്തിന്റെ ബ്രോഷർ എം.കെ. മുനീർ പ്രകാശനം ചെയ്തു.
ഷാർജ, യു.എ.ഇ — ഈദ് അൽ ഇത്തിഹാദ് ആഘോഷങ്ങളുടെ ഭാഗമായി പ്രവാസി കലാകാരന്മാർ അണിയിച്ചൊരുക്കുന്ന ‘അൽവത്തൻ’ സംഗീത ആൽബത്തിന്റെ ബ്രോഷർ പ്രകാശനം ചെയ്തു. ഷാർജ എക്സ്പോ സെന്ററിൽ നടന്ന ചടങ്ങിൽ എം.കെ. മുനീറാണ് പ്രകാശന കർമം നിർവഹിച്ചത്.
ദേശീയ ഐക്യത്തിന്റെയും പരസ്പര സ്നേഹത്തിന്റെയും സാഹോദര്യത്തിന്റെയും സന്ദേശമാണ് ആൽബം മുന്നോട്ടുവെക്കുന്നത്. മലയാളം, അറബിക്, ഹിന്ദി, ഇംഗ്ലീഷ് എന്നീ നാല് ഭാഷകളിലായാണ് ഗാനങ്ങൾ ഒരുക്കിയിരിക്കുന്നത്. ഹംസ ഗുരുക്കൾ തിരൂരാണ് ആൽബത്തിന്റെ നിർമാണവും സംവിധാനവും നിർവഹിക്കുന്നത്.
ആറോളം സംഗീത ആൽബങ്ങൾക്ക് ഗാനരചന നിർവഹിച്ചിട്ടുള്ള പ്രശസ്ത സൂഫി ഗാനരചയിതാവ് ഇബ്രാഹിം കാരക്കാടാണ് ‘അൽവത്തനി’ലെ വരികൾ എഴുതിയിരിക്കുന്നത്. ഏറ്റവും പുതിയ സാങ്കേതികവിദ്യയുടെ സഹായത്തോടെ നിർമിക്കുന്ന ആൽബം പ്രേക്ഷകർക്ക് വേറിട്ട ദൃശ്യ-ശ്രാവ്യ അനുഭവമായിരിക്കും സമ്മാനിക്കുക.
ചടങ്ങിൽ ബഷീർ തിക്കോടി, ഇബ്രാഹിം കാരക്കാട്, മുഹമ്മദ് അലി സുൽത്താനി, നിസാർ നരിക്കുനി എന്നിവർ സംബന്ധിച്ചു.










