പൊതുസ്ഥലങ്ങളിൽ കൗമാരക്കാർ നടത്തുന്ന അഭ്യാസങ്ങളും സുരക്ഷാ മാനദണ്ഡങ്ങളുടെ ലംഘനവും ലക്ഷ്യമിട്ടാണ് പരിശോധന ശക്തമാക്കിയത്
ദുബായ്, യുഎഇ — പൊതുസ്ഥലങ്ങളിൽ അപകടകരമായ രീതിയിൽ ഇ-ബൈക്കുകളും ഇ-സ്കൂട്ടറുകളും ഉപയോഗിക്കുന്നവർക്കെതിരെ നടപടി കടുപ്പിച്ച് ദുബായ് പൊലീസ്. ഒരാഴ്ച നീണ്ടുനിന്ന പരിശോധനകളിൽ 1,903 ഇ-ബൈക്കുകളും ഇ-സ്കൂട്ടറുകളും പൊലീസ് പിടിച്ചെടുത്തു.


കൗമാരക്കാർ പൊതുസ്ഥലങ്ങളിൽ നടത്തുന്ന അപകടകരമായ അഭ്യാസങ്ങൾ, അശ്രദ്ധമായ ഡ്രൈവിങ്, സുരക്ഷാ മാനദണ്ഡങ്ങൾ ലംഘിച്ചുള്ള യാത്രകൾ എന്നിവ തടയുന്നതിനാണ് പരിശോധനാ ക്യാമ്പയിനുകൾ ശക്തമാക്കിയത്.
ഇത്തരം അശ്രദ്ധമായ യാത്രകൾ വാഹനം ഓടിക്കുന്നവരുടെയും കാൽനടയാത്രക്കാരുടെയും മറ്റ് റോഡ് ഉപയോക്താക്കളുടെയും സുരക്ഷയ്ക്ക് വലിയ ഭീഷണിയാണെന്ന് ദുബായ് പൊലീസ് മുന്നറിയിപ്പ് നൽകി.
നിയമങ്ങളും സുരക്ഷാ നിർദേശങ്ങളും കർശനമായി പാലിക്കണമെന്നും ഇ-ബൈക്കുകളും ഇ-സ്കൂട്ടറുകളും ഉത്തരവാദിത്തത്തോടെ മാത്രം ഉപയോഗിക്കണമെന്നും ദുബായ് പൊലീസ് പൊതുജനങ്ങളോട് അഭ്യർഥിച്ചു.











