ദുബൈ: സർക്കാർ സേവനങ്ങൾ ഡിജിറ്റൽവത്കരിക്കുന്നതിന്റെ ഭാഗമായി പ്രവർത്തിക്കുന്ന ‘ദുബൈ നൗ’ ആപ്പിൽ 70 പുതിയ ഡിജിറ്റൽ സേവനങ്ങൾ കൂടി ഉൾപ്പെടുത്തി. ഇതോടെ മൊത്തം ലഭ്യമായ സേവനങ്ങളുടെ എണ്ണം 370 ആയി ഉയർന്നതായി ഡിജിറ്റൽ ദുബൈ അധികൃതർ അറിയിച്ചു.
50-ലധികം സർക്കാർ, സ്വകാര്യ മേഖലാ സ്ഥാപനങ്ങളുമായുള്ള സഹകരണത്തിലൂടെയാണ് ഇത്രയും സേവനങ്ങൾ ഒറ്റ പ്ലാറ്റ്‌ഫോമിൽ ലഭ്യമാകുന്നത്. 2025ൽ ദുബൈ നൗ ആപ്പിലൂടെ 57 ലക്ഷം പേയ്മെന്റ് ഇടപാടുകൾ നടന്നതായി അധികൃതർ വ്യക്തമാക്കി.
ഡിജിറ്റൽ ആപ്ലിക്കേഷൻസ് ആൻഡ് പ്ലാറ്റ്‌ഫോം സെക്ടർ എക്സിക്യൂട്ടീവ് ഡയറക്ടർ ഡോ. മൗസ സുവൈദാൻ പറഞ്ഞു: സർക്കാർ നടപടിക്രമങ്ങൾ ലഘൂകരിക്കുകയും സമയവും പ്രയത്‌നവും ലാഭിക്കാനുമാണ് പ്ലാറ്റ്‌ഫോം രൂപകൽപ്പന ചെയ്തിരിക്കുന്നത്. താമസക്കാർക്കും പൗരന്മാർക്കും ആവശ്യമായ മുഴുവൻ ഇടപാടുകളും ഒരൊറ്റ ആപ്പിലൂടെ പൂർത്തിയാക്കാം.
ദുബൈ എ.ഐ ഡിജിറ്റൽ അസിസ്റ്റന്‍റ് മുഖേന കൃത്രിമബുദ്ധി സാങ്കേതികവിദ്യയും ആപ്പിൽ സംയോജിപ്പിച്ചിട്ടുണ്ട്. ഉപഭോക്താവിന്റെ ആവശ്യങ്ങൾ വിശകലനം ചെയ്ത് വേഗത്തിൽ സേവനങ്ങൾ ലഭ്യമാക്കാൻ എ.ഐ സംവിധാനം സഹായിക്കും.
2025ൽ 4,000 പുതിയ ഉപഭോക്താക്കളെ കൂടി ആപ്പ് ആകർഷിച്ചതോടെ മൊത്തം ഉപഭോക്താക്കളുടെ എണ്ണം 22 ലക്ഷമായി. ‘മൈ സർവിസസ്’ എന്ന പുതിയ വിഭാഗം വ്യക്തിഗത സേവന അനുഭവം നൽകും.
‘ഡോക്യുമെന്‍റ്’ വിഭാഗത്തിലൂടെ എമിറേറ്റ്സ് ഐഡി, ഡ്രൈവിംഗ് ലൈസൻസ്, റെസിഡൻസ് പെർമിറ്റ് തുടങ്ങിയ ഔദ്യോഗിക രേഖകൾ പരിശോധിക്കാനും കൈകാര്യം ചെയ്യാനും സൗകര്യമുണ്ട്.
English Summary:
DubaiNow app has added 70 new digital services, bringing the total to 370 services. Digital Dubai reported 5.7 million payment transactions in 2025 through the app, which now serves 2.2 million users and integrates AI-powered features for faster services.
