ഷാർജ: ജുവൈസ ഇന്ത്യൻ സ്കൂളിൽ പ്രവേശനോത്സവം ആവേശകരമായി സംഘടിപ്പിച്ചു. കെജി ക്ലാസ്സിൽ നിന്ന് ഒന്നാം ക്ലാസിലേക്കുള്ള പ്രവേശനം നേടിയ കുട്ടികളെ ഏപ്രിൽ 21 ചൊവ്വാഴ്ച മധുരം നൽകിയും ആശംസകൾ നേർന്നും സ്കൂൾ അധികൃതർ ഹൃദയപൂർവ്വം സ്വീകരിച്ചു.
വർണ്ണാഭമായ ബലൂണുകളും, കൗതുകം നിറഞ്ഞ മാസ്കുകൾ ധരിച്ച കുട്ടികളും പരിപാടിക്ക് കൂടുതൽ നിറവും സന്തോഷവും പകർന്നു. കുരുന്നുകളുടെ ചിരികളും ആവേശവും നിറഞ്ഞ അന്തരീക്ഷം പ്രവേശനോത്സവത്തെ മനോഹരമാക്കി.
പ്രിൻസിപ്പൽ വിജിമോൻ അയ്യപ്പൻ, വൈസ് പ്രിൻസിപ്പൽ രാജീവ് മാധവൻ, പ്രഥമാധ്യാപിക ദീപ്തി ടോംസി, സൂപ്പർവൈസർ ആശാ രവീന്ദ്രൻ നായർ എന്നിവരുടെ നേതൃത്വത്തിൽ കുട്ടികളെ വരവേറ്റു. സൂപ്പർവൈസർമാർ, വകുപ്പ് മേധാവികൾ, അധ്യാപകർ, രക്ഷിതാക്കൾ എന്നിവരും ചടങ്ങിൽ പങ്കെടുത്തു.
സുരക്ഷിതമായ സ്കൂൾ അന്തരീക്ഷവും, കൃത്യമായ നിയമാവലിയും, കുട്ടികൾക്കായുള്ള ഗതാഗത സൗകര്യങ്ങളും ഉൾപ്പെടെ മികച്ച സംവിധാനങ്ങൾ ഒരുക്കിയിട്ടുണ്ടെന്ന് പുതുതായി ചുമതലയേറ്റ പ്രിൻസിപ്പൽ വിജിമോൻ അയ്യപ്പൻ വ്യക്തമാക്കി.
ഒന്നാം ക്ലാസ് മുതൽ ഒൻപതാം ക്ലാസ് വരെ പുതുതായി പ്രവേശനം തേടുന്ന വിദ്യാർത്ഥികൾക്കായി ഇപ്പോഴും അവസരങ്ങൾ ലഭ്യമാണെന്നും അദ്ദേഹം അറിയിച്ചു.
