ഊർജം, നിക്ഷേപം, ഭരണനിർവഹണം എന്നീ മേഖലകളിൽ നിർമിതബുദ്ധി വ്യാപകമാക്കാൻ നിർണായക നീക്കം; ലോകത്തെ ആദ്യ സമ്പൂർണ എഐ ഭരണകൂടമാകാൻ ലക്ഷ്യം.
അബുദാബി, യു.എ.ഇ — നിർമിതബുദ്ധി (എഐ) സാങ്കേതികവിദ്യയുടെ സഹകരണവും വികസനവും ലക്ഷ്യമിട്ട് അബുദാബി കിരീടാവകാശിയും അബുദാബി എക്‌സിക്യൂട്ടീവ് കൗൺസിൽ ചെയർമാനുമായ ശൈഖ് ഖാലിദ് ബിൻ മുഹമ്മദ് ബിൻ സായിദ് അൽ നഹ്യാൻ ഓപ്പൺഎഐ സി.ഇ.ഒ സാം ആൾട്ട്മാനുമായി കൂടിക്കാഴ്ച നടത്തി. കൂടിക്കാഴ്ചയ്ക്ക് പിന്നാലെ ഭരണനിർവഹണം, ഊർജം, നിക്ഷേപം എന്നീ തന്ത്രപ്രധാന മേഖലകളിൽ അബുദാബിയിലെ വിവിധ സ്ഥാപനങ്ങളും ഓപ്പൺഎഐയും തമ്മിലുള്ള നാല് നിർണായക കരാറുകൾക്ക് ശൈഖ് ഖാലിദ് സാക്ഷ്യം വഹിച്ചു.
അബുദാബിയുടെ ആഗോള എഐ ഹബ്ബെന്ന പദവി ശക്തമാക്കുന്നതിനൊപ്പം സർക്കാർ സേവനങ്ങളിലും മറ്റ് പ്രധാന സാമ്പത്തിക മേഖലകളിലും അത്യാധുനിക എഐ സാങ്കേതികവിദ്യകൾ നടപ്പിലാക്കുന്നതിനെക്കുറിച്ചും നേതാക്കൾ ചർച്ച ചെയ്തു. ഡിജിറ്റൽ അടിസ്ഥാന സൗകര്യ വികസനവും സ്വദേശി പ്രതിഭകളുടെ ശാക്തീകരണവും വഴി ലോകത്തെ ആദ്യ സമ്പൂർണ എഐ അധിഷ്ഠിത (AI-native) സർക്കാരായി മാറുക എന്നതാണ് അബുദാബിയുടെ പ്രഖ്യാപിത ലക്ഷ്യം.
ഊർജ മേഖലയിൽ അഡ്‌നോക് (ADNOC), ജി42-ന്റെ അനുബന്ധ സ്ഥാപനമായ ഇൻസെപ്ഷൻ42, ഓപ്പൺഎഐ എന്നിവർ തമ്മിലാണ് പ്രധാന കരാർ ഒപ്പിട്ടത്. ഇതോടെ ഓപ്പൺഎഐയുടെ മുൻനിര സാങ്കേതികവിദ്യ സ്വന്തം പ്രവർത്തനങ്ങളിൽ നേരിട്ട് നടപ്പിലാക്കുന്ന ലോകത്തെ ആദ്യ ഊർജ കമ്പനിയായി അഡ്‌നോക് മാറി. യു.എ.ഇയിലെ പ്രാദേശിക ഇൻഫ്രാസ്ട്രക്ചർ വഴിയുള്ള ജിപിടി മോഡലുകൾ അഡ്‌നോക്കിന്റെ പ്രവർത്തനക്ഷമത വർധിപ്പിക്കുന്നതിനും കൃത്യമായ വാണിജ്യ-നിക്ഷേപ തീരുമാനങ്ങൾ കൈക്കൊള്ളുന്നതിനും സഹായിക്കും.
പൊതുഭരണ മേഖലയിൽ ‘മെഷീൻ റീഡബിൾ ഗവൺമെന്റ്’ (MRG) സംരംഭത്തിന് അബുദാബി തുടക്കം കുറിച്ചു. സർക്കാർ നിയമങ്ങളും ചട്ടങ്ങളും മെഷീൻ റീഡബിൾ കോഡുകളാക്കി മാറ്റി, പെർമിറ്റുകളും സർട്ടിഫിക്കറ്റുകളും അനുവദിക്കുന്നത് ഉൾപ്പെടെയുള്ള പരിശോധനകൾ എഐ സംവിധാനങ്ങളിലൂടെ എളുപ്പമാക്കുന്നതാണ് ഈ പദ്ധതി. ആത്യന്തികമായ തീരുമാനമെടുക്കാനുള്ള അധികാരം ഉദ്യോഗസ്ഥരിൽ നിലനിർത്തിക്കൊണ്ടുതന്നെ കൃത്യമായ ചട്ടങ്ങൾ പാലിച്ചാണ് എഐ നിർദേശങ്ങൾ നൽകുക. ഡിപ്പാർട്ട്‌മെന്റ് ഓഫ് ഗവൺമെന്റ് ഇനേബിൾമെന്റിന്റെ നേതൃത്വത്തിൽ അബുദാബി അഗ്രികൾച്ചർ ആൻഡ് ഫുഡ് സേഫ്റ്റി അതോറിറ്റിയിലാണ് (ADAFSA) ഭക്ഷ്യ ഇറക്കുമതിയുമായി ബന്ധപ്പെട്ട് ഈ പൈലറ്റ് പദ്ധതി ആദ്യമായി നടപ്പിലാക്കുന്നത്. ഇതിനായുള്ള ഡാറ്റാ പ്രോസസിങ് യു.എ.ഇയിലെ ഡാറ്റാ സെന്ററുകളിലുള്ള ജിപിയു (GPU) ശൃംഖല വഴിയാണ് പ്രവർത്തിക്കുന്നത്.
നിക്ഷേപ മേഖലയിൽ മുബദല, ഇൻസെപ്ഷൻ42, ഓപ്പൺഎഐ എന്നിവർ ചേർന്ന് മാർക്കറ്റ് അനാലിസിസ്, വിപണി സാധ്യതകൾ കണ്ടെത്തൽ, റിസ്ക് അസസ്സ്മെന്റ് എന്നിവയ്ക്കായി പ്രത്യേക കരാർ രൂപീകരിച്ചു. ഇതിനുപുറമെ, രാജ്യത്തെ പൊതു-സ്വകാര്യ സ്ഥാപനങ്ങളിലും വിദ്യാഭ്യാസ മേഖലയിലും അത്യാധുനിക എഐ വിന്യസിക്കുന്നതിനായി ഇൻസെപ്ഷൻ42-ഉം ഓപ്പൺഎഐയും തമ്മിൽ അഞ്ച് വർഷത്തെ സമഗ്ര പങ്കാളിത്ത കരാറിലും ഒപ്പുവെച്ചു.
പൊതു-സ്വകാര്യ മേഖലകളിൽ എഐ സാങ്കേതികവിദ്യ സംയോജിപ്പിക്കുന്നതിൽ യു.എ.ഇയും അബുദാബിയും ആഗോള മാതൃക സൃഷ്ടിക്കുകയാണെന്നും സുരക്ഷിതവും ഉത്തരവാദിത്തമുള്ളതുമായ നവീകരണത്തിൽ പങ്കാളികളാകാൻ അഭിമാനമുണ്ടെന്നും കരാറുകൾക്ക് ശേഷം ഓപ്പൺഎഐ സി.ഇ.ഒ സാം ആൾട്ട്മാൻ വ്യക്തമാക്കി.
