ആഞ്ചിയോപ്ലാസ്റ്റി ചികിത്സയിൽ വിപ്ലവകരമായ മാറ്റം; വിവോലൈറ്റിന്റെ കോർണാരിസ് P80 ഇമേജിംഗ് പ്ലാറ്റ്ഫോം ഉപയോഗിച്ച് സങ്കീർണ്ണമായ ഹൃദയ ശസ്ത്രക്രിയ വിജയകരമായി പൂർത്തിയാക്കി.
ദുബായ് : ഹൃദയധമനികളിലെ തടസ്സങ്ങൾ കൂടുതൽ കൃത്യതയോടെ കണ്ടെത്തി ചികിത്സിക്കുന്നതിനുള്ള അത്യാധുനിക ‘ഓപ്റ്റിക്കൽ കോഹെറൻസ് ടോമോഗ്രഫി’ (OCT) സാങ്കേതികവിദ്യ ജി.സി.സിയിലാദ്യമായി ദുബായ് മാൻഖൂളിലെ ആസ്റ്റർ ഹോസ്പിറ്റലിൽ പ്രയോജനപ്പെടുത്തി. ആഞ്ചിയോപ്ലാസ്റ്റി പോലെയുള്ള സങ്കീർണ്ണമായ ഹൃദയ ചികിത്സകളിൽ ധമനികളുടെ ഉൾഭാഗം തത്സമയം വ്യക്തമായി കാണാൻ ഈ പ്ലാറ്റ്ഫോം ഡോക്ടർമാരെ സഹായിക്കും.
വിവോലൈറ്റ് (Vivolight) വികസിപ്പിച്ചെടുത്ത ‘കോർണാരിസ് P80/P80-E’ ഇമേജിംഗ് പ്ലാറ്റ്ഫോമാണ് ആസ്റ്റർ ഹോസ്പിറ്റൽ സ്വന്തമാക്കിയത്. പരമ്പരാഗത ആഞ്ചിയോഗ്രാഫി രീതികളിൽ എക്സ്-റേ ദൃശ്യങ്ങൾ ഉപയോഗിച്ച് രക്തധമനികളുടെ ബാഹ്യരൂപം മാത്രമാണ് കാണാൻ സാധിച്ചിരുന്നത്. എന്നാൽ ഇൻഫ്രാറെഡ് രശ്മികൾ പ്രയോജനപ്പെടുത്തുന്ന ഒ.സി.ടി സംവിധാനത്തിലൂടെ ധമനികളുടെ ഉൾവശത്തെ ഘടന, കൊഴുപ്പും കാൽസ്യവും അടിഞ്ഞുകൂടിയതിന്റെ അളവ് എന്നിവ മൈക്രോൺ തലത്തിൽ കൃത്യമായി നിരീക്ഷിക്കാൻ സാധിക്കും.
നിമിഷങ്ങൾക്കുള്ളിൽ ധമനികളുടെ പൂർണ്ണ രൂപം വ്യക്തമാക്കുന്ന ദൃശ്യങ്ങൾ നൽകാൻ ഈ സംവിധാനത്തിന് കഴിയും. പരമ്പരാഗത രീതികളെ അപേക്ഷിച്ച് രോഗിയുടെ ശരീരത്തിലേക്ക് കടത്തിവിടേണ്ട ഡൈയുടെ അളവ് കുറയ്ക്കാൻ ഇത് സഹായിക്കുന്നു.
സങ്കീർണ്ണമായ ഹൃദയാഘാത ലക്ഷണങ്ങളോടെ എത്തിയ 52 വയസ്സുകാരനായ ദുബായ് നിവാസിക്കാണ് ഈ സംവിധാനത്തിലൂടെ ആദ്യമായി വിജയകരമായി ചികിത്സ നൽകിയത്. പ്രമേഹം, ഉയർന്ന രക്തസമ്മർദ്ദം, കൊളസ്ട്രോൾ എന്നീ രോഗാവസ്ഥകളുണ്ടായിരുന്ന ഇദ്ദേഹത്തിന് ‘എൻ.എസ്.ടി.ഇ.എം.ഐ’ (NSTEMI) ഇനത്തിൽപ്പെട്ട ഹൃദയാഘാതമാണ് സംഭവിച്ചത്.
പരിശോധനയിൽ പ്രധാന ഹൃദയധമനിയിൽ ഗുരുതരമായ തടസ്സം കണ്ടെത്തി. തുടർന്ന് പുതിയ ഒ.സി.ടി പ്ലാറ്റ്ഫോമിന്റെ സഹായത്തോടെ ധമനിയുടെ ഘടന കൃത്യമായി വിലയിരുത്തുകയും ഡ്രഗ്-എലൂട്ടിംഗ് സ്റ്റെന്റും ഡ്രഗ്-കോറ്റഡ് ബലൂണും ഉപയോഗിച്ച് രക്തയോട്ടം പൂർണ്ണമായി പുനഃസ്ഥാപിക്കുകയും ചെയ്തു. ജൂൺ 2-ന് നടന്ന ചികിത്സയ്ക്ക് ശേഷം പിറ്റേന്നുതന്നെ രോഗി ആശുപത്രി വിടുകയും നിലവിൽ ആരോഗ്യവാനായി തുടരുകയും ചെയ്യുന്നു.
ഗൾഫ് മേഖലയിൽ ഹൃദ്രോഗികളുടെ എണ്ണം വർധിച്ചുവരുന്ന സാഹചര്യത്തിൽ കൂടുതൽ കൃത്യതയാർന്ന ചികിത്സ ഉറപ്പാക്കാൻ ഇത്തരം സാങ്കേതികവിദ്യകൾ സഹായിക്കുമെന്ന് ആസ്റ്റർ ഹോസ്പിറ്റൽസ് & ക്ലിനിക്ക്സ് യു.എ.ഇ കാർഡിയാക് സർവീസസ് മേധാവി ഡോ. നവീദ് അഹമ്മദ് വ്യക്തമാക്കി.
പരമ്പരാഗത എക്സ്-റേ ചിത്രങ്ങളെ മാത്രം ആശ്രയിക്കാതെ ധമനിയുടെ ഘടന ആഴത്തിൽ മനസ്സിലാക്കാൻ പുതിയ സംവിധാനം ഡോക്ടർമാരെ സഹായിക്കുന്നുവെന്ന് അദ്ദേഹം പറഞ്ഞു. സ്റ്റെന്റുകൾ ശരിയായ സ്ഥാനത്ത് ഉറപ്പിക്കാനും സങ്കീർണ്ണതകൾ ഒഴിവാക്കാനും ഇത് വഴി സാധിക്കും.
ലഭ്യമായ ആധുനിക മെഡിക്കൽ സാങ്കേതികവിദ്യകൾ രോഗികൾക്ക് ലഭ്യമാക്കുക എന്നതാണ് തങ്ങളുടെ ലക്ഷ്യമെന്ന് ആസ്റ്റർ ഹോസ്പിറ്റൽസ് യു.എ.ഇ, ഒമാൻ, ബഹ്റൈൻ സി.ഇ.ഒ ഡോ. ഷെർബാസ് ബിചു പറഞ്ഞു. ന്യൂസ്വീക്കിന്റെ 2026-ലെ ലോകത്തെ മികച്ച ആശുപത്രികളുടെ പട്ടികയിൽ യു.എ.ഇയിൽ നാലാം സ്ഥാനത്താണ് ആസ്റ്റർ ഹോസ്പിറ്റൽ മാൻഖൂൾ ഇടംപിടിച്ചത്.
