ചെന്നൈ: തമിഴ്നാട് രാഷ്ട്രീയത്തിൽ പുതിയ ചർച്ചകൾക്ക് വഴിവെച്ച്, ഡി.എം.കെ നിയമസഭാകക്ഷി യോഗത്തിൽ കോൺഗ്രസിനെതിരെ കടുത്ത വിമർശനങ്ങളോടെ പ്രമേയം പാസാക്കി. മതേതര പുരോഗമന സഖ്യത്തിൽ നിന്ന് പിന്മാറാനുള്ള കോൺഗ്രസിന്റെ തീരുമാനം ശക്തമായി അപലപിക്കുന്നതായി പ്രമേയത്തിൽ വ്യക്തമാക്കി.
കോൺഗ്രസ് പാർട്ടി ഇതുവരെ തന്റെ രാഷ്ട്രീയ സ്വഭാവത്തിൽ മാറ്റം വരുത്തിയിട്ടില്ലെന്നും, സഖ്യ രാഷ്ട്രീയത്തിലെ നിബന്ധനകൾ പാലിക്കാത്ത സമീപനമാണ് വീണ്ടും പുറത്തുവന്നതെന്നും ഡി.എം.കെ കുറ്റപ്പെടുത്തി. സഖ്യത്തിൽ പങ്കാളിയായിരുന്ന കോൺഗ്രസിന് ഒരു രാജ്യസഭാ സീറ്റ് ഉൾപ്പെടെ 28 നിയമസഭാ സീറ്റുകൾ അനുവദിച്ചിരുന്നുവെങ്കിലും, അവയിൽ അഞ്ചിൽ മാത്രമാണ് വിജയം നേടിയതെന്നും യോഗത്തിൽ ചൂണ്ടിക്കാട്ടി.
സഖ്യകക്ഷി പ്രവർത്തകരുടെ ശക്തമായ പ്രയത്നത്തിലൂടെയാണ് ഈ വിജയം സാധ്യമായതെന്നും, തിരഞ്ഞെടുപ്പ് വിജയത്തിന് പിന്നാലെ വെറും മൂന്ന് ദിവസത്തിനകം സഖ്യം വിട്ടത് രാഷ്ട്രീയ ദ്രോഹമാണെന്നും പ്രമേയത്തിൽ പരാമർശിക്കുന്നു. സഖ്യ ചർച്ചകൾ പുരോഗമിക്കുന്ന സമയത്തുപോലും കോൺഗ്രസ് നേതാക്കൾ സഖ്യത്തിനെതിരെ വിമർശനം ഉന്നയിച്ചിരുന്നതായി ഡി.എം.കെ ആരോപിച്ചു.
പുതുച്ചേരിയിൽ ഡി.എം.കെക്ക് അനുവദിച്ച സീറ്റുകളിൽ കോൺഗ്രസ് സ്ഥാനാർത്ഥികളെ നിർത്തിയതും, വിമത സ്ഥാനാർത്ഥികളെ രാഹുൽ ഗാന്ധി അഭിനന്ദിച്ചതും യോഗത്തിൽ വിമർശനവിധേയമായി. തിരഞ്ഞെടുപ്പ് കാലയളവിൽ പോലും നീതിപൂർവ്വമായ സമീപനം കോൺഗ്രസ് സ്വീകരിച്ചില്ലെന്നും പ്രമേയം ചൂണ്ടിക്കാട്ടുന്നു.
തമിഴ്നാട്ടിൽ നിന്ന് വിജയിച്ച അഞ്ച് കോൺഗ്രസ് എം.എൽ.എമാർ പോലും സഖ്യനേതാവായ എം.കെ. സ്റ്റാലിൻനെ നന്ദി അറിയിക്കാൻ തയ്യാറായില്ലെന്നും യോഗം വിമർശിച്ചു. 23 സീറ്റുകളിൽ കോൺഗ്രസിനെതിരെ മത്സരിച്ച് തോൽപ്പിച്ച ടി.വി.കെക്ക് ഇപ്പോൾ കോൺഗ്രസ് പിന്തുണ നൽകുന്നത് പരിഹാസ്യമായ നീക്കമാണെന്നും പ്രമേയം കുറ്റപ്പെടുത്തി.
ഇതിനൊപ്പം, രാഷ്ട്രീയപരമായ പ്രധാന തീരുമാനങ്ങൾ കൈക്കൊള്ളാൻ ഡി.എം.കെ അധ്യക്ഷനായ സ്റ്റാലിന് പൂർണ്ണ അധികാരം നൽകാനും യോഗം തീരുമാനിച്ചു. നിയമസഭാകക്ഷി നേതാവിനെ തിരഞ്ഞെടുക്കുന്നതിനായി ഉടൻ തന്നെ മറ്റൊരു യോഗം വിളിക്കുമെന്നും സൂചനയുണ്ട്.
യോഗത്തിൽ അധ്യക്ഷത വഹിച്ച സ്റ്റാലിൻ, ജോസഫ് വിജയ് സർക്കാർ രൂപീകരിക്കട്ടെയെന്നും, അതിന് തടസ്സമുണ്ടാക്കില്ലെന്നും ദേശീയ മാധ്യമങ്ങളോട് നൽകിയ അഭിമുഖത്തിൽ വ്യക്തമാക്കി. വിജയ് സർക്കാരിനെ ആദ്യ ആറുമാസം വിമർശിക്കില്ലെന്നും അദ്ദേഹം കൂട്ടിച്ചേർത്തു.
തമിഴ്നാട്ടിലെ സഖ്യ രാഷ്ട്രീയത്തിൽ സംഭവിച്ച ഈ മാറ്റങ്ങൾ അടുത്ത ദിവസങ്ങളിൽ ദേശീയ തലത്തിലും പ്രതിഫലിക്കാനിടയുണ്ടെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
