സേവന മികവിന്റെ മാതൃകയായി ദുബായ് വിമാനത്താവളം; ശൈഖ് മുഹമ്മദ്

ദുബായ്: ലോകത്തെ ഏറ്റവും തിരക്കേറിയ യാത്രാ ഹബ്ബുകളിൽ ഒന്നായ ദുബായ് അന്താരാഷ്ട്ര വിമാനത്താവളം വെറുമൊരു യാത്രാ കവാടമല്ല, മറിച്ച് സേവന ഗുണമേന്മയിലെ മികവിന്റെ ഒരു ‘വിദ്യാലയമാണെന്ന്’ യു.എ.ഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിൻ റാഷിദ് അൽ മക്തൂം. ദുബായ് ഭരണാധികാരിയുടെ ഈ വാക്കുകൾ തങ്ങൾക്കും വിമാനത്താവളത്തിലെ ഓരോ ജീവനക്കാരനും വലിയ അഭിമാനവും ആത്മവിശ്വാസവുമാണ് നൽകുന്നതെന്ന് ജിഡിആർഎഫ്എ (GDRFA) ദുബായ് ഡയറക്ടർ ജനറൽ ലെഫ്റ്റനന്റ് ജനറൽ മുഹമ്മദ് അഹമ്മദ് അൽ മർറി പ്രതികരിച്ചു. വിമാനത്താവളത്തിലെ സേവന നിലവാരം ലോകോത്തര നിലവാരത്തിലാണെന്ന നേതൃത്വത്തിന്റെ വിലയിരുത്തൽ, വരാനിരിക്കുന്ന വലിയ നേട്ടങ്ങളിലേക്കുള്ള ചവിട്ടുപടിയാണെന്നും അദ്ദേഹം വ്യക്തമാക്കി.

ദുബായുടെ ആഗോള മുഖച്ഛായ നിർണ്ണയിക്കുന്നതിൽ വിമാനത്താവളം വഹിക്കുന്ന പങ്കിനെ ശൈഖ് മുഹമ്മദ് എടുത്തുപറഞ്ഞത് ഉത്തരവാദിത്തങ്ങൾ ഇരട്ടിപ്പിക്കുന്നുവെന്ന് ജനറൽ ഡയറക്ടറേറ്റ് വ്യക്തമാക്കി. ലോകത്തിന്റെ വിവിധ ഭാഗങ്ങളിൽ നിന്നുള്ള ദശലക്ഷക്കണക്കിന് യാത്രക്കാർക്ക് അതിവേഗവും സുരക്ഷിതവുമായ സേവനങ്ങൾ നൽകുന്നതിൽ ജിഡിആർഎഫ്എ ഉദ്യോഗസ്ഥർ കാട്ടുന്ന മികവിനുള്ള അംഗീകാരമായാണ് ഈ പ്രസ്താവനയെ കാണുന്നത്. വിമാനത്താവളത്തിലെ ഇമിഗ്രേഷൻ നടപടികൾ മുതൽ യാത്രക്കാരുടെ സൗകര്യങ്ങൾ വരെയുള്ള ഓരോ ഘട്ടത്തിലും പുലർത്തുന്ന വിട്ടുവീഴ്ചയില്ലാത്ത ഗുണമേന്മയാണ് ദുബായെ മറ്റ് നഗരങ്ങളിൽ നിന്ന് വേറിട്ടു നിർത്തുന്നത്.

ഭാവിയിലെ വെല്ലുവിളികൾ ഏറ്റെടുക്കാൻ സജ്ജമായ രീതിയിൽ വിമാനത്താവളത്തിലെ സേവനങ്ങൾ കൂടുതൽ നവീകരിക്കുമെന്ന് അൽ മർറി പറഞ്ഞു. ശൈഖ് മുഹമ്മദിന്റെ ദീർഘവീക്ഷണത്തിൽ നിന്ന് പ്രചോദനം ഉൾക്കൊണ്ട്, നവീന സാങ്കേതികവിദ്യകളും മാനുഷിക മൂല്യങ്ങളും സമന്വയിപ്പിച്ചുകൊണ്ടുള്ള പ്രവർത്തനങ്ങളുമായി മുന്നോട്ട് പോകാനാണ് വകുപ്പിന്റെ തീരുമാനം. ദുബായിലേക്കുള്ള പ്രവേശന കവാടം എന്ന നിലയിൽ യാത്രക്കാർക്ക് ലഭിക്കുന്ന ആദ്യ അനുഭവം ഏറ്റവും മികച്ചതാക്കാൻ തങ്ങൾ പ്രതിജ്ഞാബദ്ധമാണെന്നും അദ്ദേഹം കൂട്ടിച്ചേർത്തു.

സേവന രംഗത്ത് പുതിയ റെക്കോർഡുകൾ സൃഷ്ടിച്ചുകൊണ്ടിരിക്കുന്ന ദുബായ് വിമാനത്താവളം, ആഗോള വിനോദസഞ്ചാര-സാമ്പത്തിക മേഖലകളിൽ യു.എ.ഇയുടെ കരുത്തായി തുടരുമെന്ന് നേതൃത്വം പ്രത്യാശിക്കുന്നു. ഭരണാധികാരിയുടെ പ്രശംസ ജീവനക്കാർക്കിടയിൽ പുതിയ ഉണർവ് നൽകിയിരിക്കുകയാണ്. മികവിന്റെ ഈ പാതയിൽ ഓരോ യാത്രക്കാരനും നൽകുന്ന സേവനം കൂടുതൽ ഹൃദ്യമാക്കാനുള്ള പരിശ്രമത്തിലാണ് ദുബായ് വിമാനത്താവളത്തിലെ വിവിധ വകുപ്പുകൾ.