അപേക്ഷകൾ വിലയിരുത്താൻ അഡ്വാൻസ്ഡ് എഐ പ്ലാറ്റ്ഫോം; മൂന്ന് പ്രധാന വിഭാഗങ്ങളിലായി പുരസ്കാരം.
ദുബായ്: സർക്കാർ സേവനങ്ങളുടെ കാര്യക്ഷമത വർധിപ്പിക്കുന്നതിനും ഭാവിയിലെ ഭരണസംവിധാനങ്ങൾക്ക് നൂതന പരിഹാരങ്ങൾ കണ്ടെത്തുന്നതിനുമായി ദുബായിലെ ജനറൽ ഡയറക്ടറേറ്റ് ഓഫ് ഐഡന്റിറ്റി ആൻഡ് ഫോറിനേഴ്സ് അഫയേഴ്സ് (GDRFA) ‘സയന്റിഫിക് റിസർച്ച് അവാർഡിന്റെ’ രണ്ടാം പതിപ്പിന് തുടക്കമിട്ടു. ഗവേഷകരെയും അക്കാദമിക് വിദഗ്ധരെയും നവീകരണ രംഗത്തെ പ്രതിഭകളെയും ഒരേ വേദിയിലെത്തിച്ച് സർക്കാർ പ്രവർത്തനങ്ങൾക്ക് പ്രയോജനകരമായ ശാസ്ത്രീയ ഗവേഷണങ്ങൾ പ്രോത്സാഹിപ്പിക്കുകയാണ് ഇതിന്റെ ലക്ഷ്യം.
ശാസ്ത്രീയ ഗവേഷണങ്ങളിൽ നിന്ന് ലഭിക്കുന്ന അറിവുകളെ പ്രായോഗിക പരിഹാരങ്ങളാക്കി മാറ്റുന്നതിനാണ് ഈ നോളജ് പ്ലാറ്റ്ഫോം രൂപകൽപ്പന ചെയ്തിരിക്കുന്നത്. കൃത്രിമ ബുദ്ധി (AI) അധിഷ്ഠിത സാങ്കേതികവിദ്യകൾ, നവീന ആശയങ്ങൾ എന്നിവയിലൂടെ സർക്കാർ സേവനങ്ങളുടെ ഗുണനിലവാരം ഉയർത്താൻ ഇത് സഹായിക്കും. ദുബായെ ലോകത്തിലെ ഏറ്റവും മികച്ച ഭാവിസജ്ജ നഗരമാക്കി മാറ്റുകയെന്ന യു.എ.ഇ നേതൃത്വത്തിന്റെ ദീർഘവീക്ഷണത്തിന് കരുത്തുപകരുന്നതാണ് ഈ സംരംഭം.
അവാർഡ് പ്രധാനമായും മൂന്ന് വിഭാഗങ്ങളിലായാണ് നൽകുന്നത്. ആർട്ടിഫിഷ്യൽ ഇന്റലിജൻസ്, സ്മാർട്ട് സിസ്റ്റങ്ങൾ എന്നിവയിലൂടെ ഡിജിറ്റൽ പരിവർത്തനം ലക്ഷ്യമിടുന്ന ഗവേഷണങ്ങൾക്കായി ഡിജിറ്റൽ ഇന്നൊവേഷൻ അവാർഡ് നൽകും. ഭാവി നേതൃത്വ വികസനവും വിജ്ഞാന കൈമാറ്റവും പ്രോത്സാഹിപ്പിക്കുന്ന പഠനങ്ങൾക്കായി ലീഡർഷിപ്പ് റിസർച്ച് ആൻഡ് നോളജ് മാനേജ്മെന്റ് അവാർഡും, ഉപഭോക്തൃ സേവനങ്ങൾ മെച്ചപ്പെടുത്തുന്നതിനും ജീവനക്കാരുടെ ശാക്തീകരണത്തിനുമുള്ള പ്രായോഗിക പദ്ധതികൾക്കായി ജിഡിആർഎഫ്എ ദുബായ് സർവീസസ് അവാർഡും ഏർപ്പെടുത്തിയിട്ടുണ്ട്.
അവാർഡ് നിർണയ പ്രക്രിയ കൂടുതൽ സുതാര്യമാക്കാൻ ഇത്തവണ ‘ഏജന്റിക് എഐ’ (Agentic AI) അധിഷ്ഠിത ഡിജിറ്റൽ പ്ലാറ്റ്ഫോമാണ് ഉപയോഗിക്കുന്നത്. അപേക്ഷകൾ കൃത്യമായി പരിശോധിക്കാനും മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കാനും ഈ സ്മാർട്ട് സംവിധാനം സഹായിക്കും.
വിജ്ഞാന-നവീകരണ ആവാസവ്യവസ്ഥയെ ശക്തിപ്പെടുത്തുന്നതിലേക്കുള്ള സുപ്രധാന ചുവടുവെപ്പാണ് ഈ സയന്റിഫിക് റിസർച്ച് അവാർഡെന്ന് ജിഡിആർഎഫ്എ ദുബായ് ഡയറക്ടർ ജനറൽ ലഫ്: ജനറൽ മുഹമ്മദ് അഹ്മദ് അൽ മർറി പറഞ്ഞു. സർക്കാർ വികസനത്തിനും സുസ്ഥിരമായ മാറ്റങ്ങൾ സൃഷ്ടിക്കാനും പ്രായോഗിക ശാസ്ത്രീയ ഗവേഷണങ്ങൾ അനിവാര്യമാണെന്നും, ജനങ്ങൾക്ക് നേരിട്ട് പ്രയോജനം ചെയ്യുന്ന രീതിയിൽ ഗവേഷണ ഫലങ്ങളെ പ്രായോഗികമാക്കാൻ ഈ സംരംഭം സഹായിക്കുമെന്നും അദ്ദേഹം വ്യക്തമാക്കി.
പ്രമുഖ അക്കാദമിക് വിദഗ്ധർ, ഗവേഷണ സ്ഥാപനങ്ങൾ എന്നിവയുടെ സഹകരണത്തോടെയാണ് അവാർഡ് സംഘടിപ്പിക്കുന്നത്. ഗവേഷകർക്കും അക്കാദമിക് വിദഗ്ധർക്കും എൻട്രികൾ സമർപ്പിക്കാൻ ജിഡിആർഎഫ്എയുടെ ഔദ്യോഗിക ഡിജിറ്റൽ പ്ലാറ്റ്ഫോമായ https://researchaward.gdrfad.gov.ae സന്ദർശിക്കാവുന്നതാണ്. കൂടുതൽ വിവരങ്ങൾക്ക് researchaward.gdrfad@dnrd.ae എന്ന ഇമെയിൽ വിലാസത്തിലും ബന്ധപ്പെടാം.
വിജ്ഞാന അധിഷ്ഠിത സമ്പദ്വ്യവസ്ഥയിലേക്കുള്ള യുഎഇയുടെ സുപ്രധാന ചുവടുവെപ്പുകളുടെ ഭാഗമാണ് ഈ പുരസ്കാരം. സർക്കാർ തലത്തിലുള്ള തന്ത്രപ്രധാനമായ തീരുമാനങ്ങളിലും പൊതുജന സേവനങ്ങളിലും ആർട്ടിഫിഷ്യൽ ഇന്റലിജൻസും അത്യാധുനിക ഗവേഷണങ്ങളും സമന്വയിപ്പിക്കുന്നതിൽ ദുബായ് ആഗോളതലത്തിൽ മുൻപന്തിയിലാണ്.
